ឧបនាយករដ្ឋមន្រ្ដី ទៀ បាញ់ ក្រឿនរំឮកអតីតយុទ្ធជន បន្តប្រកាន់វីរភាពដ៏អង់អាចក្លាហាន ឱ្យស័ក្តិសមជាកុលបុត្រដ៏ឆ្នើមរបស់ជាតិ
ឧបនាយករដ្ឋមន្រ្ដី ទៀ បាញ់ ក្រឿនរំឮកអតីតយុទ្ធជន បន្តប្រកាន់វីរភាពដ៏អង់អាចក្លាហាន ឱ្យស័ក្តិសមជាកុលបុត្រដ៏ឆ្នើមរបស់ជាតិ
លោកឧបនាយករដ្ឋមន្រ្ដី ទៀ បាញ់ រដ្ឋមន្ត្រីក្រសួងការពារជាតិ បានក្រឿនរំឮកដល់អតីតយុទ្ធកម្ពុជាទាំងអស់ ត្រូវបន្តប្រកាន់ភ្ជាប់នូវវីរភាពអង់អាចក្លាហានឱ្យស័ក្តិសមជាកុលបុត្រដ៏ឆ្នើមរបស់ជាតិ មាតុភូមិ។
ការក្រឿនរំឮកបែបនេះរបស់លោកឧបនាយករដ្ឋមន្រ្ដី ទៀ បាញ់ បានធ្វើឡើងនៅថ្ងៃទី១៦ ខែកក្កដា ឆ្នាំ២០២០នេះ នៅក្នុងឱកាសដែលលោកបានអញ្ជើញជាតំណាងលោកនាយករដ្ឋមន្រ្ដី ហ៊ុន សែន និងជាប្រជាប្រធានសមាគមអតីតយុទ្ធជនកម្ពុជាក្នុងពិធីប្រកាសទទួលស្គាល់ថ្នាក់ដឹកនាំ សមាគមអតីតយុទ្ធជនកម្ពុជា ស្ថិតនៅភូមិស្លាបតាអោន ឃុំគគីរ ស្រុកកៀនស្វាយ ខេត្តកណ្តាល។
បើតាមលោកទេសរដ្ឋមន្ត្រី គន់ គីម អគ្គលេខាធិការសមាគមអតីតយុទ្ធជនកម្ពុជា បានឱ្យដឹងថា រយៈពេល៥ឆ្នាំ គឺចាប់ពីឆ្នាំ២០១៥ ដល់ឆ្នាំ២០២០នេះ ដើម្បីឆ្លើយតបទៅនឹងគុណបំណាច់ដ៏ធំធេងរបស់អតីតយុទ្ធជនកម្ពុជា លោកនាយករដ្ឋមន្រ្ដី ហ៊ុន សែន និងលោកស្រី ប៊ុន រ៉ានី ហ៊ុន សែន បានគិតគូរសាងសង់ផ្ទះចំនួន ២,៤៦០ខ្នង។ បើប្រៀបធៀបការសាងសង់ផ្ទះជូនអតីតយុទ្ធជនទូទាំងប្រទេសទៅនឹងស្ថិតិនៃការធ្វើបច្ចុប្បន្នភាពអតីតយុទ្ធជន ក្នុងឆ្នាំ២០១៦ ដែលបានរកឃើញអតីតយុទ្ធជនសរុបចំនួន ៦,១១៤គ្រួសារ (មានដីគ្មានផ្ទះ ឬមានផ្ទះស្នាក់នៅមិនសមរម្យ គ្មានដី គ្មានផ្ទះ និងរស់នៅលើដីសាធារណៈ) គឺនៅសល់ចំនួន ៣,៦៥៤គ្រួសារទៀត ដែលត្រូវបន្តសាងសង់ និងដោះស្រាយដីសម្បទានសង្គមកិច្ចជូនបន្តទៀត។
ជាមួយគ្នានេះដែរ លោកទេសរដ្ឋមន្ត្រី គន់ គីម បានបន្តថា សមាគមអតីតយុទ្ធជនកម្ពុជា បានប្រគល់ថវិកាបេឡាមរណសង្គ្រោះជូនគ្រួសារសពសមាជិក ស.អ.ក តាមបណ្តារាជធានី-ខេត្ត សរុបចំនួន៩,៧៩៣សព ក្នុងនោះថវិកាលោកនាយករដ្ឋមន្រ្ដី ហ៊ុន សែន បានផ្តល់បំពេញបន្ថែម សម្រាប់ផ្តល់ជូនគ្រួសារសមាជិកចំនួន ៣,១២៧សព និងបំពេញថវិកាបន្ថែម ៣,៥០០រៀល ជូនសមាជិកជាគ្រួសារជនពលី មរណៈរយៈ២៥ខែ (គិតត្រឹមការផ្ទេរថវិកាប្រចាំខែកក្កដា ឆ្នាំ២០២០) សរុបថវិកា ២ពាន់លានរៀល។
ដោយឡែក លោកទេសរដ្ឋមន្ត្រី គន់ គីម បានបញ្ជាក់ថា គិតត្រឹមខែឧសភា ឆ្នាំ២០២០ សមាគមអតីតយុទ្ធជនកម្ពុជា មានសមាជិក ៧៦,៩២៣នាក់ ដែលមាននៅក្នុងបន្ទុកប្រមាណ ១០៨,៨៧១នាក់ កំពុងទទួលរបបឧបត្ថម្ភគោលនយោបាយពីរដ្ឋជារៀងរាល់ខែ ក្នុងនោះ៖ មាននិវត្តជន ចំនួន ២៦,៨៩២នាក់, ជនបាត់បង់សមត្ថភាពការងារ ចំនួន ១,៤៤៤នាក់ និងជនពិការ ចំនួន ២៦,៤៤៩នាក់ ។ សម្តេចពិជ័យសេនា ទៀ បាញ់ បានថ្លែងយ៉ាងដូច្នេះថា៖ «បងប្អូនអតីតយុទ្ធកម្ពុជាទាំងអស់ ត្រូវបន្តប្រកាន់ភ្ជាប់នូវវីរភាពអង់អាចក្លាហានឱ្យស័ក្តិសមជាកុលបុត្រដ៏ឆ្នើមរបស់ជាតិ មាតុភូមិបើទោះបីបច្ចុប្បន្ននេះ បងប្អូនបានក្លាយជាអតីតយុទ្ធជន ក៏ត្រូវបន្តរក្សាស្មារតីវីរភាពជាប្រពៃណីថ្លៃថ្លានេះឱ្យបានខ្ជាប់ខ្ជូន ដើម្បីធ្វើជាគំរូល្អដល់មនុស្សជំនាន់ក្រោយ ដែលត្រូវបន្តវេននៅក្នុងសង្គមជាតិ»។
ក្នុងឱកាសនោះដែរ លោកឧបនាយករដ្ឋមន្រ្ដី ទៀ បាញ់ បានបន្តថា ដើម្បីឱ្យស័ក្តិសមជាអតីតយុទ្ធអង់អាចក្លាហានសម្រាប់ជាតិ ទាមទារឱ្យអតីតយុទ្ធត្រូវបន្តចូលរួមអនុវត្តចលនាប្រឡងប្រណាំង៣ ពូកែរបស់អតីតយុទ្ធជនរួមមានទី១៖ ការធ្វើសេដ្ឋកិច្ចគ្រួសារពូកែ, ទី២៖ ការជួយគ្នា ដើម្បីកាត់បន្ថយភាពក្រីក្រពូកែ និងទី៣៖ ការអភិវឌ្ឍសមាគម និងសង្គមជាតិពូកែនៅគ្រប់ថ្នាក់ ធ្វើឱ្យក្លាយជាអតីតយុទ្ធជនដែលមានស្នាដៃលេចធ្លោ ទទួលបានការលើកសរសើរ និងផ្សព្វផ្សាយជូនរង្វាន់ជាគំរូតាមគោលការណ៍របស់សមាគមអតីតយុទ្ធជនកម្ពុជា។
ដោយឡែក លោកឧបនាយករដ្ឋមន្រ្ដី ទៀ បាញ់ បានឱ្យដឹងថា សម្រាប់ពិធីប្រកាសទទួលស្គាល់អនុប្រធាន អគ្គលេខាធិការរងសមាជិកគណៈកម្មាធិការកណ្តាល សមាជិកគណៈអចិន្ត្រៃយ៍សមាគមអតីតយុទ្ធជនកម្ពុជានៅថ្ងៃនេះ គឺជាការបង្ហាញពីការយកចិត្តទុកដាក់របស់រាជរដ្ឋាភិបាល ក្រោមការដឹកនាំរបស់លោកនាយករដ្ឋមន្រ្ដី ហ៊ុន សែន ដែលស្តែងបញ្ជាក់ពីការគិតគូរយកចិត្តទុកដាក់ និងដឹងគុណជានិច្ចចំពោះអតីតយុទ្ធជនកម្ពុជាទាំងអស់។
បន្ថែមពីនេះ រដ្ឋមន្ត្រីការពារជាតិ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងបង្កើតបានជាសមិទ្ធផល ស្នាដៃ និងវឌ្ឍភាពការងាររបស់សមាគមអតីតយុទ្ធជនកម្ពុជា សម្រេចបានក្នុងរយៈកាល៥ឆ្នាំកន្លងមក៕
