លោកនាយករដ្ឋមន្ត្រី ហ៊ុន សែន ស្នើឱ្យអាជ្ញាធរបង្កើតសហគមន៍អ្នកចឹញ្ចឹមត្រី ដើម្បីងាយស្រួលតតាំងថ្លៃជាមួយឈ្មួញក្នុងការកំណត់តម្លៃ
លោកនាយករដ្ឋមន្ត្រី ហ៊ុន សែន ស្នើឱ្យអាជ្ញាធរបង្កើតសហគមន៍អ្នកចឹញ្ចឹមត្រី ដើម្បីងាយស្រួលតតាំងថ្លៃជាមួយឈ្មួញក្នុងការកំណត់តម្លៃលោកនាយករដ្ឋមន្ត្រី ហ៊ុន សែន បានស្នើឱ្យអាជ្ញាធរពាក់ព័ន្ធរួមទាំងក្រសួងកសិកម្ម រុក្ខាប្រមាញ់ និងនេសាទ ព្រមទាំងបងប្អូនប្រជាពលរដ្ឋ បង្កើតសហគមន៍អ្នកចិញ្ចឹមត្រី ដើម្បីងាយស្រួលក្នុងការតតាំងជាមួយឈ្មួញ សម្រាប់កំណត់តម្លៃលក់ត្រី។
ថ្លែងក្នុងការអញ្ជើញចុះពិនិត្យមើលវឌ្ឍនភាពនិងផែនការអភិវឌ្ឍ នៃការធ្វើវារីវប្បកម្មនៅកម្ពុជា នៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាបរបស់រដ្ឋបាលជលផល ដែលមានទីតាំងស្ថិត នៅភូមិបាទី ឃុំពាមរក៍ ស្រុកពាមរក៍ ខេត្តព្រៃវែង នាព្រឹកថ្ងៃទី១៤ ខែកក្កដា ឆ្នាំ២០២០ លោកនាយករដ្ឋមន្ត្រី ហ៊ុន សែន បានលើកឡើងពីបញ្ហារបស់ប្រជាកសិករចិញ្ចឹមត្រីលើបញ្ហាតម្លៃត្រីថោកនៅពេលទទួលផល ត្រង់ចំណុចនេះ លោកបានស្នើឱ្យអាជ្ញាធរពាក់ព័ន្ធគួរបង្កើតឱ្យមានសហគមន៍អ្នកចិញ្ចឹមត្រី ដើម្បីធ្វើការតវ៉ាជាមួយឈ្មួញទិញត្រី។
លោកបានបញ្ជាក់ថា បើសិនប្រជាកសិករលក់ត្រីដោយខ្លួនឯងនោះឈ្មួញពិបាកឱ្យតម្លៃព្រោះអ្នកខ្លះលក់ថ្លៃ អ្នកខ្លះថោកដែលធ្វើឱ្យឈ្មួញពិបាក ចូលទិញ ដូច្នេះគួរបង្កើតសហគមន៍ មួយដើម្បីលក់ត្រីមានភាពងាយស្រួល។ លោកបានលើកឡើងថា ការចឹញ្ចឹមត្រីទទួលបានផលច្រើនជាងការធ្វើស្រែ ដោយមានការចំណេញច្រើនគួរសម ដោយធ្វើការលើផ្ទៃដីប្រហាក់ប្រហែលគ្នា។
លោកនាយករដ្ឋមន្ត្រី ហ៊ុន សែន បានស្នើឱ្យសមត្ថកិច្ចដែលចុះចាប់បង្រ្កាបបទល្មើសជលផលខុសច្បាប់ដោយប្រើប្រាស់ស្បៃ អួនដាក់ត្រី មិនត្រូវចាប់យកស្បៃទៅដុតចោលដូចមុនទៀតទេ គឺត្រូវទុកស្បៃទាំងនោះឱ្យប្រជាកសិករ អ្នកចឹញ្ចឹមត្រី យកទៅ បាំងត្រីក្នុងស្រះដែលលិចទឹក។ លោកបានថ្លែងថា “ពេលនេះខ្ញុំស្នើសុំឱ្យសមត្ថកិច្ចដែលចាប់បានស្បែ អួនដែលជនល្មើសយកទៅដាក់ចាប់ត្រីខុសច្បាប់ដោយកុំដុតចោលដូចមុនទៀត ដោយទុកយកមកឱ្យប្រជាកសិករអ្នកចឹញ្ចឹមត្រីនៅពេលទឹកលិចស្រះរបស់ពួកគាត់វិញ”។
លោកបន្ថែមថា ការទុកស្បៃនេះចំណេញច្រើនជាង ព្រោះនៅពេលយកស្បៃនេះមកឱ្យប្រជាកសិករមិនសូវចំណាយលុយច្រើនក្នុងការទិញស្បៃមកបាំងឃាត់មិនឱ្យចេញពីស្រះនៅពេលរដូវទឹកលិចស្រះ៕
