មេឧទ្ទាមក្រៅច្បាប់ឆ្លៀតយកបញ្ហាវិបត្តិកូវីដ-១៩ ដើម្បីផ្តួលរំលំរដ្ឋាភិបាល
មេឧទ្ទាមក្រៅច្បាប់ឆ្លៀតយកបញ្ហាវិបត្តិកូវីដ-១៩ ដើម្បីផ្តួលរំលំរដ្ឋាភិបាល
ខណៈពេលដែលពិភពលោកនិយាយជារួម និងកម្ពុជានិយាយដោយឡែកបាននិងកំពុងទទួលរងផលប៉ះពាល់យ៉ាងធ្ងន់ធ្ងរដោយសារការធ្លាក់ចុះនៃសេដ្ឋកិច្ចសាកល ហើយបង្កើតឲ្យមានវិបត្តិសង្គមទូទាំងពិភពលោកកាន់តែអូសបន្លាយ ក្នុងសភាពមិនប្រាកដប្រជា ដែលបង្ករឡើងដោយការផ្ទុះមេរោគគូវីដ១៩ ចុងក្រោយនេះ មេឧទ្ទាមក្រៅច្បាប់បានឆ្លៀតឱកាសដ៏ល្ងង់ខ្លៅបំផុត ដើម្បីធ្វើការវាយប្រហារលើការកាត់បន្ថយថវិកាជាតិជាងពាក់កណ្តាលរបស់រដ្ឋាភិបាលថា ជានយោបាយបញ្ច្រាសទិស និងចៀសមិនផុតពីរាស្រ្តក្រោកបះបោរទម្លាក់ជាក់ជាមិនខាន។ តើរដ្ឋាភិបាលរបស់លោកនាយករដ្ឋមន្រ្តី ហ៊ុន សែន អាចនឹងត្រូវដួលរលំដូចការលើកឡើងរបស់មេឧទ្ទាមក្រៅច្បាប់ឬទេ?
វាច្បាស់បំផុត បើទោះបី សេដ្ឋកិច្ចកម្ពុជាត្រូវបានធ្លាក់ចុះដោយសារការទទួលផលប៉ះទង្គិចពីការរីករាលដាលនៃមេរោគកូវីដ-១៩ ក៏ដោយក៏ រដ្ឋាភិបាលដឹកនាំដោយលោកនាយករដ្ឋមន្រ្តី ហ៊ុន សែន មិនអាចដួលរលំតាមការបន់ស្រន់របស់មេឧទ្ទាមក្រៅច្បាប់បានឡើយ ហើយការញុះញង់បំផុសបំផុល ដុតកំហឹងប្រជាជនឲ្យងើបផ្តួលរំលំរដ្ឋាភិបាលក្នុងពេលនេះ គឺ ពិតជាទង្វើក្បត់ជាតិ ទង្វើបំបះបំបោរ ជាអំពើភេវរកម្ម និងវិទ្ធង្សនាសេដ្ឋកិច្ច ដូចដែលមេឧទ្ទាមក្រៅច្បាប់រូបនេះ ធ្លាប់តែងតែបានដាក់ផែនការឲ្យសកម្មជនរបស់ខ្លួនទាំងអស់នៅក្នុងប្រទេសអនុវត្តផែនការវិច្ឆេទកម្មសេដ្ឋកិច្ចកន្លងមក ក្នុងទិសដៅបង្កើតឲ្យមានអស្ថេរភាពសង្គម ដោយធ្វើការញុះញង់ និងបំផុសបំផុលឲ្យប្រជាជនមួយចំនួន ដែលជាប់ជំពាក់បំណុលគ្រឹះស្ថានមីហិរញ្ញវត្ថុ និងធនាគារក្នុងប្រទេសងើបឡើងប្រឆាំងនឹងរដ្ឋាភិបាល ហើយប្រឆាំងនឹងកាតព្វកិច្ចសងបំណុលរបស់ខ្លួនជាមួយនឹងបណ្តាមីក្រូហិរញ្ញវត្ថុ និងធនាគារទាំងនោះ។
ក្នុងស្ថានភាពនៃវិបត្តិសេដ្ឋកិច្ចសង្គម និងការចូលរួមទប់ស្កាត់ការរីករាលដាលមេរោគកូវីដ-១៩នេះផងដែរ ប្រជាជនកម្ពុជាភាគច្រើនលើសលុបបាននិងកំពុងរួមរស់ក្នុងសុខសន្តិភាព ស្ថេរភាពនយោបាយ មិនត្រូវការចូលរួមក្នុងអំពើបោកប្រាស់ ញុះញង់ បំផុសបំផុលដុតកំហឹងប្រជាជនពីសំណាក់មេឧទ្ទាមក្រៅច្បាប់ឲ្យធ្លាក់ចូលក្នុងអំពើបង្ករឲ្យមានអស្ថេរភាព និងអសន្តិសុខសង្គមបានឡើយ។ ប្រជាជនកម្ពុជាភាគច្រើនលើសលុបបាននិងកំពុងគិតគូរនិងយកចិត្តទុកដាក់អំពីជីវភាព និងសេដ្ឋកិច្ចគ្រួសារក្នុងពេលដែលប្រទេសជាតិកំពុងជួបវិបត្តិដោយសារការរីករាលនៃមេរោគកូវីដ-១៩យ៉ាងប្រាកដ។
ផ្ទុយពីការគិតដ៏ល្ងង់ខ្មៅបំផុតរបស់មេឧទ្ទាមក្រៅច្បាប់ រដ្ឋាភិបាលកម្ពុជាដែលមានលោកនាយករដ្ឋមន្រ្តី ហ៊ុន សែន ជាប្រមុខដឹកនាំបានយកចិត្តទុកដាក់បំផុត ដោយបានដាក់ចេញនូវវិធានការជាបន្តបន្ទាប់គ្រប់ជ្រុងជ្រោយដោយប្រយ័ត្នប្រយែងទៅតាមដំណាក់កាលច្បាស់លាស់បំផុត ដើម្បីរក្សាស្ថេរភាពម៉ាក្រូសេដ្ឋកិច្ច និងបានរៀបចំដាក់ចេញផែនការជាកញ្ចប់ក្នុងការស្តារសេដ្ឋកិច្ចទាំងក្នុងពេលកំពុងជួបវិបត្តិកូវីដ-១៩ និងជាមួយទស្សនៈវិស័យក្រោយវិបត្តិកូវីដ-១៩ ពិសេស ការកាត់ចំណាយជាងពាក់កណ្តាលរបស់រដ្ឋាភិបាល គឺ ជាអភិក្រមទូទៅដ៏ត្រឹមត្រូវបំផុត សម្រាប់សេដ្ឋកិច្ចក្នុងពេលមានវិបត្តិដោយសារកូវីដ-១៩ ដែលជាមាយាទរបស់រាជរដ្ឋាភិបាលរបស់លោកនាយករដ្ឋមន្រ្តី ក្នុងការប្រកាន់យក គឺ សន្សំលុយ ហើយមិនមែនសន្សំតែតួលេខទេ គឺ សន្សំសាច់ប្រាក់។ ហើយបច្ចុប្បន្នដោយសារមាយាទ និងការចេះសន្សំនេះហើយ ដែលអាចធ្វើឲ្យរដ្ឋាភិបាលសល់សាច់ប្រាក់ដល់ជាង៣៥០០លានដុល្លារ។
ចំពោះជីវភាពរបស់ប្រជាជនក្រីក្រទូទាំងប្រទេស ដែលត្រូវបានរដ្ឋាភិបាលបាននិងកំពុងពិនិត្យជាក់ស្តែងតាមស្ថានភាពនៃភាពក្រីក្រ គឺលោកនាយករដ្ឋមន្រ្តី ហ៊ុន សែន នៅព្រឹកថ្ងៃចន្ទ ទី២២ ខែមិថុនា ឆ្នាំ២០២០ ក្នុងដំណើរអញ្ជើញចុះត្រួតពិនិត្យការដ្ឋានសាងសង់ ព្រលានយន្តហោះអន្តរជាតិភ្នំពេញថ្មី ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាលបានថ្លែងបញ្ជាក់ថា នៅថ្ងៃទី២៤ ខែមិថុនា រដ្ឋាភិបាលនឹងបញ្ចេញថវិកាប្រមាណ២៥លានដុល្លារ សម្រាប់ផ្តល់ជូនប្រជាពលរដ្ឋប្រមាណ៦០ម៉ឺនគ្រួសារ។
ជាការពិតមេដឹកនាំក្រុមប្រឆាំងផ្កាប់មុខមួយនេះ នៅតែកំពុងបានដើរលើការគិតខុស មិនដែលត្រូវខាងយុទ្ធសាស្រ្តចំពោះការដឹកនាំរបស់លោកនាយករដ្ឋមន្រ្តីជារៀងរហូតមក ហើយដោយសារភាពល្ងង់ខ្លៅនេះហើយ ដែលលោកនាយករដ្ឋមន្រ្តី ហ៊ុន សែន អាចប្រើអ្នកនយោបាយដ៏ល្ងង់ខ្មៅបំផុតមួយនេះឱ្យជួយកែរដ្ឋធម្មនុញ្ញពីសំឡេង២ភាគ៣មក៥០%បូក១បានយ៉ាងស្រួល។ កន្លងមកថ្មីៗនេះ មេឧទ្ទាមក្រៅច្បាប់ ដែលគេស្គាល់ថា ជាអ្នកនយោបាយចាញ់មិនដែលឈ្នះ ហើយស្ទើរតែបាត់ឈ្មោះក្នុងពិភពនយោបាយអាត្មានិយមរត់ចោលស្រុក នៅខំប្រឹងទាំងគ្មានសង្ឃឹម ព្យាយាមយកឈ្នះលើការដឹកនាំរបស់លោកនាយករដ្ឋមន្រ្តី ហ៊ុន សែន ក្នុងគ្រប់សមរភូមិចាញ់ មិនដែលឈ្នះ បន្តឆ្លៀតប្រើប្រាស់ឧបាយកលខ្មៅក្រខ្វក់បំផុតរបស់ខ្លួនជាថ្មីម្តងហើយម្តងទៀត ក្នុងផែនការវិច្ឆេទកម្មសេដ្ឋកិច្ចលើវិស័យធនាគារ និងមីក្រូហិរញ្ញវត្ថុ ក្នុងរឿងការខ្ចីបុលរបស់ប្រជាជនមួយចំនួន។
ជាការពិត ក្នុងឆ្នាំ២០២០នេះ សេដ្ឋកិច្ចកម្ពុជាបាននិងកំពុងទទួលរងនូវផលប៉ះទង្គិចធ្ងន់ធ្ងរបង្ករឡើងដោយការរីករាលដាលនៃមេរោគកូវីដ-១៩ ហើយជាលទ្ធផលសេដ្ឋកិច្ចកម្ពុជានឹងមានកំណើនអវិជ្ជមានដែលពុំធ្លាប់មានក្នុងប្រវត្តិសាស្រ្តទំនើបរបស់ខ្លួន ក្នុងរង្វង់១.៩%។ ទោះបីយ៉ាងណាក៏ដោយក្នុងឆ្នាំ២០១៩កន្លងទៅ សេដ្ឋកិច្ចកម្ពុជាសម្រេចបានកំណើនខ្ពស់ក្នុងអត្រា៧% ខណៈពេលដែលសេដ្ឋកិច្ចពិភពលោកមានកំណើនថមថយត្រឹមតែ២.៩%ក្នុងឆ្នាំ២០១៩ ដែលបណ្តាលមកពីការតានតឹងនៃសង្រ្គាមពាណិជ្ជកម្មរវាងសហរដ្ឋអាមេរិក និងចិន ភាពមិនប្រកដប្រជានៃការចាកចេញរបស់អង់គ្លេសពីសហភាពអឺរុប និងភាពតានតឹងក្នុងភូមិសាស្រ្តនយោបាយតំបន់។ល។
សម្រាប់ការរំពឹងទុកជាវិជ្ជមាននោះ គឺ ក្នុងឆ្នាំ២០២១សេដ្ឋកិច្ចសាកលនឹងត្រូវបានព្យាករណ៍ថា នឹងងើបឡើងមកវិញក្នុងអត្រា៥.៨% ក្រោមការរំពឹងទុកថាជំងឺនេះនឹងធូរស្រាលជាបណ្តើរៗក្នុងឆមាសទី២ ឆ្នាំ២០២០នេះបូករួមនឹងលទ្ធផលទទួលបានពីគោលនយោបាយគាំទ្រសេដ្ឋកិច្ចពីរដ្ឋាភិបាលនីមួយៗដែលធ្វើឲ្យសកម្មភាពសេដ្ឋកិច្ចត្រឡប់មកសភាពធម្មតាវិញ។ ទោះបីក្នុងស្ថានភាពមិនប្រាកដប្រជាយ៉ាងណាក៏ដោយក៏ ក្នុងឆ្នាំ២០២១ខាងមុខ សេដ្ឋកិច្ចកម្ពុជាត្រូវបានរំពឹងថានឹងអាចងើបឡើងវិញមកក្នុងអត្រាកំណើន៣.៥% ដោយសរការរំពឹងទុកការងើបឡើងវិញយឺតនៃសកម្មភាពសេដ្ឋកិច្ច ជាពិសេស ការកើនឡើងក្នុងកម្រិតទាបនៃតម្រូវការខាងក្រៅ និងទំនុកចិត្តទីផ្សារក្នុងស្រុក។
ជារួម បើទោះបី សេដ្ឋកិច្ចកម្ពុជាធ្លាក់ចុះ ដោយបានទទួលផលប៉ះទង្គិចពីការរីករាលដាលនៃមេ
រោគកូវីដ-១៩ក៏ដោយក៏ស្ថានភាពនៃវិបត្តិនេះមិនអាចធ្វើឲ្យរដ្ឋាភិបាលរបស់លោកនាយករដ្ឋមន្រ្តី ហ៊ុន សែន ដួលរលំបានឡើយ។ ពីព្រោះ រដ្ឋាភិបាលបានរៀបចំក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ឆ្នាំ២០២១ខាងមុខនេះយ៉ាងលំអិតបំផុត ដើម្បីស្តារសេដ្ឋកិច្ចសង្គមកម្ពុជាឡើងវិញ។ ដូច្នេះហើយ លោកនាយករដ្ឋមន្រ្តី ហ៊ុន សែន បានថ្លែងថា កូវីដ-១៩ មិនអាចសម្លាប់រដ្ឋាភិបាលរបស់លោកបាននោះទេ ហើយលោកក៏បានថ្លែងថា អ្នកដែលរង់ចាំឱ្យរាជរដ្ឋាភិបាលរបស់លោកដួលរលំនោះ គឺ កំពុងធ្លាក់ចូលក្នុងការវង្វេងទិសដៅហើយ៕
ដោយ ឡុង បូរិតា
