កូវីដ១៩៖ អ.ស.ប.អំពាវនាវការពារស្ត្រីពីហិង្សាក្នុងគ្រួសារ នៅឱកាសវិធានការបង្ខាំងឱ្យនៅផ្ទះ
កូវីដ១៩៖ អ.ស.ប.អំពាវនាវការពារស្ត្រីពីហិង្សាក្នុងគ្រួសារ នៅឱកាសវិធានការបង្ខាំងឱ្យនៅផ្ទះនៅក្នុងពេលដែលប្រជាជនរាប់ពាន់លាននាក់នៅទូទាំងពិភពលោកត្រូវបង្ខាំងឲ្យនៅតែក្នុងផ្ទះ, លោកអគ្គលេខាធិការអង្គការសហប្រជាជាតិ អំពាវនាវឱ្យគ្រប់ប្រទេសទាំងអស់ ការពារស្ត្រី ពីការរងគ្រោះដោយអំពើហិង្សា ក្នុងគ្រួសារ។ ប្រសាសន៍អំពាវនារបស់អគ្គលេខាធិការអង្គការសហប្រជាជាតិ ធ្វើឡើងពីថ្ងៃអាទិត្យ បន្ទាប់ពីលោកបានស្នើឱ្យពិភពផ្អាកជម្លោះនិងអំពើហិង្សាគ្រប់ប្រភេទ រួមទាំងហិង្សាលើស្ត្រីផង ហើយរួបរួមគ្នាទប់ស្កាត់ការរីករាលដាលនៃជំងឺកូវីដ១៩។
គួរជ្រាបដែរថា ក្នុងឱកាសនៃចំណាត់ការដាក់បង្ខាំងប្រជាជនឱ្យនៅក្នុងផ្ទះដើម្បីបញ្ជ្រៀសការចម្លងកូវីដ-១៩ គឺចំនួនករណីអំពើហិង្សាលើស្ត្រីនៅតាមគេហដ្ឋាន មានការកើនឡើង នៅបណ្តាទីក្រុងជាច្រើនរបស់សហរដ្ឋអាមេរិក។ នេះបើតាមការកត់សម្គាល់របស់ អង្គការសហប្រជាជាតិដើម្បីស្ត្រី (UN Women)។ នៅឥណ្ឌា គ្រាន់តែមួយសប្តាហ៍មកនេះ ឯកសារប្តឹងផ្តល់ទាក់ទងនឹងហិង្សាលើនារីភេទ កើនឡើងមួយគុណនឹងពីរ។ នៅតួកគីវិញ មានករណីឃាតកម្មលើស្ត្រីភេទ រឹតតែច្រើន នាប៉ុន្មានសប្តាហ៍ចុងក្រោយនេះ។ នៅអាហ្វ្រិកខាងត្បូង គ្រាន់តែមួយសប្តាហ៍ មានពាក្យបណ្តឹង ៩ ម៉ឺន ករណី ទាក់ទងនឹងអំពើហិង្សាលើស្ត្រី។ នៅបារាំងវិញ ក៏ចំនួនអំពើហិង្សាតាមផ្ទះកើនឡើងដែរ។ ចំណែកនៅអូស្ត្រាលី រដ្ឋាភិបាលបានកត់សម្គាល់ឃើញថា ការស្វែងរកជំនួយតាមបណ្តាញអ៊ីនធ័រនែត បានកើនឡើង៧៥ភាគរយ។ អូស្ត្រាលី ក៏ទើបតែបានចេញកញ្ចប់ថវិកា ជាច្រើនលានដុល្លារ ដើម្បីជួយសង្គ្រោះនារីរងគ្រោះក្នុងឱកាសនេះ។
នេះប្រសាសន៍ របស់លោក អគ្គលេខាធិការអង្គការសហប្រជាជាតិ៖
«អំពើហិង្សា ពុំមែន មានតែនៅសមរភូមិប្រយុទ្ធ។ ប៉ុន្តែ ស្ត្រីនិងក្មេងស្រីជាច្រើន បានទទួលរងអំពើហិង្សាដោយផ្ទាល់ នៅកន្លែងដែលពួកគេ គួរតែមានសុវត្ថិភាព តែហិង្សាបានកើតមាន នៅក្នុងផ្ទះរបស់ពួកគេផ្ទាល់តែម្តង។ មូលហេតុនេះហើយ ទើបខ្ញុំអំពាវនាវ ថ្ងៃនេះ ជាថ្មីម្តងទៀត សូមឱ្យមានសន្តិភាពនៅតាមផ្ទះ តាមកន្លែងស្នាក់នៅ នៅគ្រប់ជ្រុងជ្រោយនៃពិភពលោក។
យើងយល់ដឹងគ្រប់ហើយថា វិធានការសំខាន់ចាំបាច់ នៅពេលនេះ ដើម្បីទប់ស្កាត់កូវីដ-១៩ គឺចំណាត់ការដាក់បង្ខាំងឱ្យប្រជាជនសម្ងំនៅតែក្នុងផ្ទះ។ ក៏ប៉ុន្តែ ស្ត្រីខ្លះ បែរជាត្រូវប្រឈមមុខនឹងស្វាមី ឬដៃគូ ដែលប្រើហិង្សាទៅវិញ។
ប៉ុន្មានសប្តាហ៍កន្លងទៅនេះ បញ្ហាសេដ្ឋកិច្ចនិងបញ្ហាសង្គម បានកើតឡើងខ្លាំង និងការភ័យខ្លាចក៏មានច្រើន។ ទន្ទឹមនឹងគ្នានេះ ពិភពលោកបានជួបប្រទះនឹងអំពើហិង្សាដ៏អាក្រក់នៅតាមផ្ទះដែរ។ នៅប្រទេសមួយចំនួន ស្ត្រីរងគ្រោះ ដែលខំស្វះស្វែងរកជំនួយ ឬហៅទូរសព្ទរកជំនួយ មានចំនួនកើនឡើង ទ្វេដង។
បុគ្គលិកសុខាភិបាល និងនគរបាល កំពុងតែរវល់មមាញឹក និងមានគ្នីគ្នាមិនគ្រប់គ្រាន់ទេ ហើយនៅកន្លែងខ្លះ ខ្វះខាតទាំងធនធានមនុស្សនិងថវិកា។ មណ្ឌលទទួលឱ្យស្នាក់នៅបណ្តោះអាសន្នសម្រាប់ស្រ្តីរងគ្រោះ បានត្រូវបិទទ្វារ ហើយកន្លែងផ្សេងៗ ក៏ពេញអស់ដែរ។
ដូច្នេះហើយ ខ្ញុំសូមលើកទឹកចិត្តឱ្យរដ្ឋាភិបាលទាំងអស់ ចាត់វិធានការបង្ការការពារអំពើហិង្សាលើស្ត្រីភេទ និងចាត់បញ្ចូលវិធានការនេះ ទៅក្នុងផែនការសកម្មភាពថ្នាក់ជាតិ សម្រាប់ទប់ស្កាត់ជំងឺកូវីដ១៩ដែរ។
អាជ្ញាធរគួរតែផ្តល់ជំនួយបន្ថែម ដូចជា សេវាកម្មទូរសព្ទសុំជំនួយបន្ទាន់ពាក់ព័ន្ធនឹងហិង្សាលើស្ត្រី ហើយនិងសហការរៀបចំក្រុមការងារជាមួយអង្គការសង្គមស៊ីវិលដែលធ្វើការក្នុងវិស័យនេះ។ ត្រូវតែធានាថា ប្រព័ន្ធតុលាការនៅតែបន្តសកម្មភាពស៊ើបអង្កេតនិងផ្តន្ទាទោសចំពោះជនល្មើស។ បង្កើតមធ្យោបាយផ្តល់ព័ត៌មានរហ័សទាក់ទងនឹងហិង្សា ដូចជានៅតាមឱសថស្ថាន និងតាមផ្សារជាដើម។ ហើយបង្កើនចំនួនមណ្ឌលសុំស្នាក់នៅបណ្តោះអាសន្ន ទុកជាវិស័យអាទិភាពមួយដែរ។ ធ្វើយ៉ាងណា ជួយសម្រួលមធ្យោបាយឱ្យនារីរងគ្រោះអាចសុំជំនួយ ដោយពិតប្រាកដនិងប្រកបដោយសុវត្ថិភាព កុំឱ្យជនល្មើសដឹងខ្លួន និងធ្វើបាបពួកនាងរឹតតែខ្លាំង។
សិទ្ធមនុស្សនិងសេរីភាពសម្រាប់ស្ត្រីភេទ គឺសំខាន់ចាំបាច់ណាស់ ដើម្បីទ្រទ្រង់សាមគ្គីភាពនិងភាពរឹងមាំទាំរបស់សង្គម។
យើងចូលរួមទាំងអស់គ្នា! យើងអាចបញ្ជៀសអំពើហិង្សានៅគ្រប់ទីកន្លែង គ្រប់តំបន់ជម្លោះ ក៏ដូចជានៅតាមផ្ទះដែរ ដូចអ្វីដែលយើងកំពុងប្រឹងយកឈ្នះលើកូវីដ១៩អ៊ីចឹង!» RFI
