អ្នកនាំពាក្យសាលារាជធានីភ្នំពេញ ច្រានចោលព័ត៌មានក្លែងក្លាយដែលថា មានអាជីវករម្នាក់​ស្លាប់ដោយសារកូវីដ១៩ នៅផ្សារជម្ពូវ័ន

ដោយ៖ សន ប្រាថ្នា​​ | ថ្ងៃព្រហស្បតិ៍ ទី២៦ ខែមីនា ឆ្នាំ២០២០​ | ព័ត៌មានទូទៅ |
អ្នកនាំពាក្យសាលារាជធានីភ្នំពេញ ច្រានចោលព័ត៌មានក្លែងក្លាយដែលថា មានអាជីវករម្នាក់​ស្លាប់ដោយសារកូវីដ១៩ នៅផ្សារជម្ពូវ័ន អ្នកនាំពាក្យសាលារាជធានីភ្នំពេញ ច្រានចោលព័ត៌មានក្លែងក្លាយដែលថា មានអាជីវករម្នាក់​ស្លាប់ដោយសារកូវីដ១៩ នៅផ្សារជម្ពូវ័ន

លោក ម៉េត មាសភក្តី អ្នកនាំពាក្យសាលារាជធានីភ្នំពេញ នៅថ្ងៃទី២៦ ខែមីនា ឆ្នាំ២០២០នេះ បានច្រានចោលនូវការផ្សព្វផ្សាយព័ត៌មានក្លែងក្លាយមួយដែលថា មានអាជីវករលក់ទូរស័ព្ទនៅផ្សារជម្ពូវ័នម្នាក់ បានស្លាប់ដោយជំងឺកូវីដ១៩។

ប្រតិកម្មនេះបានធ្វើឡើងបន្ទាប់ពីមានជនអនាមិក បានបង្កើតសារសំឡេងមួយតាមបណ្តាញសង្គមថា មានអ្នកលក់ទូរស័ព្ទម្នាក់នៅផ្សារខាងលើនេះ បានស្លាប់ដោយសារឆ្លងជំងឺកូវីដ១៩ ហើយបំភ្លៃទៀតថា អាជ្ញាធរបានបិទផ្សារជម្ពូវ័នជាដើម។

អ្នកនាំពាក្យ​សាលារាជធានីភ្នំពេញ​ បានអំពាវនាវដល់ប្រជាពលរដ្ឋកុំជឿ ព្រោះនេះជាសារសម្លេងប្រឌិតឡើង​ដោយចេតនាយ៉ាងពិតប្រាកដ ក្នុងការបង្កើតចលាចលក្នុងសង្គម ជាពិសេសនៅរាជធានីភ្នំពេញ។ ពាក់ព័ន្ធករណីនេះ កម្លាំងសមត្ថកិច្ច​បាននឹងកំពុងស្រាវជ្រាវស្វែងរក​ជនបង្កនេះដើម្បីយកមកផ្តន្ទាទោសតាមច្បាប់។

លោក ម៉េត មាសភក្ក្តី ក៏សូមអំពាវនាវដល់បងប្អូនប្រជាពលរដ្ឋជៀសវាងចែកចាយដំណឹងដែលគ្មានប្រភពច្បាស់លាស់ បង្កើតឡើងដោយជនទុច្ចរិតតទៅទៀត។

ជាមួយគ្នានេះ គណៈកម្មការផ្សារជម្ពូវ័នបានបំភ្លឺអំពីរឿងនេះ ដូចខាងក្រោម៖

ខ្ញុំបាទប្រធានគណៈកម្មការផ្សារជម្ពូវ័នសូមច្រានចោលពាក្យចរចាមរ៉ាមថា នៅផ្សារជម្ពូវ័នមានករណីអ្នកលក់ទូរស័ព្ទស្លាប់ដោយជំងឺកូវិដ១៩ ហើយផ្សារបិទទាំងស្រុង នេះគឺជាព័ត៌មានមិនពិត មិនមានករណីស្លាប់ដោយការឆ្លងជំងឺកូវិដ១៩នោះទេ ហើយផ្សារនៅបើកលក់ជាធម្មតា។

ដូចនេះសារសំឡេងដែលត្រូវបានចែកចាយនៅតាម Messenger និង Telegram នោះគឺជាសារសំឡេងមិនពិត សូមបងប្អូនប្រជាពលរដ្ឋកុំមានការយល់ច្រលំ និងឈប់ចែកចាយនូវសំឡេងក្លែងក្លាយទាំងនោះ។

បញ្ចេញមតិ
ពាក្យគន្លឹះទាក់ទង
    អត្ថបទទាក់ទង