កូវីដ-១៩ ៖ ក្រសួងសុខាភិបាលដៃម្ខាងត្រូវទប់ទល់នឹងជំងឺ ដៃម្ខាងត្រូវទប់ទល់នឹងព័ត៌មានក្លែងក្លាយ
កូវីដ-១៩ ៖ ក្រសួងសុខាភិបាលដៃម្ខាងត្រូវទប់ទល់នឹងជំងឺ ដៃម្ខាងត្រូវទប់ទល់នឹងព័ត៌មានក្លែងក្លាយ
ក្រសួងសុខាភិបាល កាលពីថ្ងៃទី ២៨ កុម្ភៈ បានបើកវគ្គបណ្តុះបណ្តាលខ្លីមួយដល់បណ្តាអ្នកសារព័ត៌មានកម្ពុជា ស្តីពី ពីជំងឺខូវីដ-19 ដែលកំពុងរាតត្បាតនៅក្នុងប្រទេសជាច្រើននៅលើពិភពលោក។ ដោយឡែកសម្រាប់កម្ពុជា បើទោះបីជាជំងឺនេះមិនទាន់ឆ្លងមកលើប្រជាពលរដ្ឋកម្ពុជាណាម្នាក់ក្តី ក៏ប៉ុន្តែ វាកំពុងបង្កការភ័យខ្លាចដល់ប្រជាពលរដ្ឋកម្ពុជាភាគច្រើន។ ក្នុងនោះ ការបំផុសព័ត៌មានក្លែងក្លាយកាន់តែច្រើន កាន់តែធ្វើឲ្យប្រជាពលរដ្ឋ មានការភ័យខ្លាចទ្វេឡើង។ តើហេតុអ្វី?
លោស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នៅថ្ងៃទី០៨ ខែមីនា ឆ្នាំ២០២០នេះ បានចេញមកទាត់ចោល និងថ្កោលទោសចំពោះសកម្មជន Facebook ដែលមាននិន្នាការប្រឆាំង ដែលបង្ហោះព័ត៌មានបំពុល បំណងធ្វើឲ្យមានភាពចលាចលសង្គម បានលើកឡើងថា «គ្រប់មន្ទីរពេទ្យឲ្យតែសង្ស័យមានឆ្លង Covid-19 នឹងចាក់ថ្នាំសម្លាប់ចោល»។
លោកស្រី វណ្ណឌីន បានទាត់ចោលការលើកឡើង បែបល្ងង់ខ្លៅរបស់សកម្មជនប្រឆាំង និងស្នើឲ្យអាជ្ញាធរមានសមត្ថកិច្ច ស្វះស្វែងរកវិធីធ្វើយ៉ាងណាចាប់ខ្លួនជននោះ មកផ្តន្ទាទោសតាមច្បាប់ កុំឲ្យនៅតែបន្តបង្កើតព័ត៌មានបំពុល ធ្វើឲ្យសង្គមចលាចលបែបនេះទៀត។
លោកស្រី ឱ វណ្ណឌីន បានចាត់ទុកការបង្ហោះព័ត៌មានប្រឌិននេះថា «ជាពាក្យសំដីអសីលធម៌ និងប្រឌិតបំពុលសង្គមទាំងស្រុង។ សូមកុំជឿ និងសុំឲ្យអាជ្ញាធរពាក់ព័ន្ធ ចាត់ការតាមផ្លូវច្បាប់»។
ជាមួយគ្នានេះ លោកស្រីនៅតែអំពាវនាវយ៉ាងទទូច ដល់បងប្អូនប្រជាពលរដ្ឋ ពិសេសអ្នកលេង Facebook សូមកុំជឿទៅលើព័ត៌មានមិនផ្លូវការ ឬការបង្ហោះ Facebook ដែលគ្មានប្រភពច្បាស់ ហើយសូមមេត្តាជឿជាក់លើរាជរដ្ឋាភិបាល ក្រសួងសុខាភិបាល ប្រសិនមានអ្វីវិវត្តន៍ថ្មី ក្រសួងនឹងជម្រាបជូនភ្លាមៗ ដើម្បីឲ្យប្រជាពលរដ្ឋបានដឹង ងាយស្រួលបង្ការ៕
