លោកនាយករដ្ឋមន្ត្រី ហ៊ុន សែន ឆ្លើយទៅនឹងសំនួរ បើអ្នកដំណើរលើនាវាមានផ្ទុកកូរ៉ូណា?
លោកនាយករដ្ឋមន្ត្រី ហ៊ុន សែន ឆ្លើយទៅនឹងសំនួរ បើអ្នកដំណើរលើនាវាមានផ្ទុកកូរ៉ូណា?
«ចុះបើមានជំងឺកូរ៉ូណានេះ នៅលើនាវា តើកម្ពុជាអនុញ្ញាតឱ្យចូលទេ? ខ្ញុំអាចឆ្លើយតបយ៉ាងច្បាស់ថា ប្រសិនបើមានអ្នកជំងឺនេះ នៅលើនាវា ខ្ញុំនឹងឱ្យចូលយ៉ាងលឿនបំផុត តាមដែលអាចធ្វើទៅបាន»។ នេះជាការថ្លែងបញ្ជាក់របស់លោកនាយករដ្ឋមន្ត្រី ហ៊ុន សែន ទៅកាន់អ្នកកាសែត ក្នុងអំឡុងពេលលោកទៅទទួលស្វាគមន៍អ្នកដំណើរលើនាវាទេសចរណ៍ Westerdam នៅខេត្តព្រះសីហនុ នាព្រឹកថ្ងៃទី១៤ ខែកុម្ភៈ ឆ្នាំ២០២០។
លោកនាយករដ្ឋមន្ត្រី ហ៊ុន សែន បានលើកឡើងថា៖ «មូលហេតុនៅត្រង់ថា ប្រសិនបើមានអ្នកជំងឺនៅលើនាវានេះ តើយើងទុកឱ្យអ្នកជំងឺទាំងនោះ ស្លាប់នៅលើនាវានេះ បន្ទាប់ទៅសាកសពតើត្រូវទម្លាក់ចោលក្នុងទឹកសមុទ្រ ឬក៏ត្រូវទុកនៅលើនាវា។ នេះគឺជាបញ្ហាដែលត្រូវទទួលខុសត្រូវរបស់ពិភពលោក ក៏ដូចជាការទទួលខុសត្រូវរបស់យើង ក្នុងឋានៈជាសមាជិកនៃសហគមន៍អន្តរជាតិដែលមានការទទួលខុសត្រូវ»។
លោកនាយករដ្ឋមន្ត្រី បន្តថា ពេលនេះពុំមែនជាពេលដែលត្រូវភ័យខ្លាច និងរើសអើងជាតិសាសន៍នោះទេ តែជាពេលត្រូវរួបរួមសាមគ្គីគ្នា ដើម្បីដោះស្រាយបញ្ហាប្រឈមនានា ដែលបាននឹងកំពុងយាយី មិនត្រឹមតែប្រទេសមួយទេ គឺប្រទេសជាច្រើនបានជួបប្រទះរឿងរ៉ាវនេះទៅហើយ។
«ថ្ងៃនេះ ប្រសិនបើខ្ញុំមកទទួលប្រជាពលរដ្ឋនៃបណ្តាប្រទេសរហូតដល់ ៤១សញ្ជាតិនៅទីនេះ បែរជាគ្រោះថ្នាក់ដល់ខ្លួនខ្ញុំ វាក៏សក្តិសមនឹងពលីកម្មដែលខ្ញុំធ្វើដើម្បីមនុស្សជាតិផងដែរ។ តើឱ្យយើងនិយាយពីការគោរពសិទ្ធិមនុស្សអ្វីទៅ បើសិទ្ធិរស់រាន្តមានជីវិត មិនត្រូវបានគោរពផងនោះ»។ នេះជាការលើកឡើងបន្ថែមរបស់ប្រមុខរាជរដ្ឋាភិបាលកម្ពុជា៕
