លោកនាយករដ្ឋមន្ត្រី ហ៊ុន សែន ដឹកដៃកូនប្រុសច្បងទៅផ្តល់កម្លាំងចិត្តដល់ប្រធានាធិបតីចិន គ្រាដែលចិនកំពុងទទួលរងគ្រោះដ៏កាចសាហាវដោយវីរុសកូរ៉ូណា (Video inside)
លោកនាយករដ្ឋមន្ត្រី ហ៊ុន សែន ដឹកដៃកូនប្រុសច្បងទៅផ្តល់កម្លាំងចិត្តដល់ប្រធានាធិបតីចិន គ្រាដែលចិនកំពុងទទួលរងគ្រោះដ៏កាចសាហាវដោយវីរុសកូរ៉ូណា (Video inside)
(ប៉េកាំង)៖ នៅក្នុងឱកាសទស្សនកិច្ចការងារបន្ទាន់ នៅប្រទេសចិនលើកនេះ លោកនាយករដ្ឋមន្ត្រី ហ៊ុន សែន នាយករដ្ឋមន្រ្តីនៃកម្ពុជា មិនមែនទៅសួរសុខទុក្ខលោកប្រធានាធិបតីចិន ស៊ី ជីនពីង តែលោកឯងនោះទេ លោកថែមទាំងដឹកនាំកូនប្រុសច្បងរបស់លោក គឺលោកឧត្តមសេនីយ៍ឯក ហ៊ុន ម៉ាណែត ទៅលើកទឹកចិត្តរដ្ឋាភិបាល និងប្រជាជនចិនផងដែរ ខណៈដែលចិនកំពុងទទួលរងគ្រោះដ៏កាចសាហាវដោយវីរុសកូរ៉ូណា។
លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូមួយក្រុម អញ្ជើញទៅដល់រដ្ឋធានីប៉េកាំង ប្រទេសចិន នៅវេលាម៉ោង៣៖៣០នាទីរសៀល (ម៉ោងនៅប៉េកាំង) ថ្ងៃទី០៥ ខែកុម្ភៈ ឆ្នាំ២០២០នេះ ដែលលោកបានក្លាយជាមេដឹកនាំប្រទេសដំបូងគេនៅលើពិភពលោក ដែលហ៊ានទៅកាន់ប្រទេសចិន គ្រាដែលចិនកំពុងផ្ទុះជំងឺកាចសហាវថ្មី។
ក្នុងនាមជាមិត្តដែកថែកជាមួយភាគីចិន លោកនាយករដ្ឋមន្ត្រី ហ៊ុន សែន បានបង្ហាញអំពីទឹកចិត្តរបស់លោកចំពោះរដ្ឋាភិបាល និងប្រជាជនចិនដោយលោកមិនបិទជើង យន្តហោះជាមួយប្រទេសចិន ឬយកប្រជាពលរដ្ឋ ឬនិស្សិតចាកចេញពីប្រទេសចិននោះឡើយ ពោលគឺលោកនាយករដ្ឋមន្ត្រីបានបង្ហាញអំពីគុណធម៌ក្នុងនាមជាមេដឹកនាំ ដោយមិនរត់ចោលមិត្តក្នុងគ្រាលំបាកឡើយ។
សាររបស់លោកនាយករដ្ឋមន្ត្រី ហ៊ុន សែន បានធ្វើឱ្យប្រជាជនចិន មានការរំជើបរំជួល ព្រមទាំងបានទទួលស្វាគមន៍សម្តេចយ៉ាងកក់ក្តៅ សម្រាប់ទស្សនកិច្ចការងារលើនេះ។
ជាពិសេសទៀតនោះនៅថ្ងៃទី០៥ ខែកុម្ភៈ ឆ្នាំ២០២០នេះ ព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ជាទីគោរពសក្ការៈដ៏ខ្ពង់ខ្ពស់បំផុត បានសព្វព្រះរាជហឫទ័យ ប្រោសព្រះរាជទានព្រះរាជសារជូន លោក ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន ចំពោះការផ្ទុះឡើងនូវមេរោគកូរ៉ូណា។
ក្នុងព្រះរាជសារលិខិតនោះព្រះមហាក្សត្រនៃកម្ពុជា ទ្រង់បានបង្ហាញនូវអារម្មណ៍សោកសៅក្រៃលែង ចំពោះការផ្ទុះឡើងនៃវីរុសកូរ៉ូណា ដែលបានធ្វើឱ្យប៉ះពាល់ ដល់ប្រទេសចិន និងបណ្តាលឱ្យបាត់បង់ជីវិតប្រជាពលរដ្ឋ។ ព្រះករុណា ជាអម្ចាស់ជីវិតលើត្បូង ទ្រង់បានបួងសួងសូមឲ្យប្រទេសចិន ដើម្បីឲ្យទទួលបានជោគជ័យ ពេញលេញក្នុងការទប់ស្កាត់ការរីករាលដាល និងគ្រប់គ្រងជំងឺឆ្លងនេះបាន៕
