កំណើនគ្រោះថ្នាក់ចរាចរណ៍ឆ្នាំ២០១៩ ឈានដល់ចំណុចប្រកាសអាសន្ន
កំណើនគ្រោះថ្នាក់ចរាចរណ៍ឆ្នាំ២០១៩ ឈានដល់ចំណុចប្រកាសអាសន្ន
ក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០១៩ និងទិសដៅការងារឆ្នាំ២០២០ នាព្រឹកថ្ងៃទី២១ ខែមករា ឆ្នាំ២០២០ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានប្រកាសថា អត្រាកំណើនគ្រោះថ្នាក់ចរាចរណ៍ផ្លូវគោកនៅឆ្នាំ២០១៩ កើតឡើងចំនួន ៤១២១លើក សម្លាប់មនុស្ស ១៩៨១នាក់ និងរងរបួស ៦១៤១នាក់ គឺដល់ចំណុចប្រកាសអាសន្នហើយ។
សម្តេចក្រឡាហោម ស ខេង បានណែនាំដល់គ្រប់ភាគីពាក់ព័ន្ធ ត្រូវរកវិធីដោះស្រាយ កាត់បន្ថយគ្រោះថ្នាក់ចរាចរណ៍។ ពោលគឺរកវិធីបែបណា ឲ្យអ្នកប្រើប្រាស់ផ្លូវទាំងអស់ ភ្ញាក់រលឹក គោរពច្បាប់ មិនមែនខ្លាចប៉ូលិសចរាចរណ៍នោះទេ។
គណៈកម្មាធិការជាតិសុវត្ថិភាពចរាចរណ៍ផ្លូវគោក បានប្រកាសថា គ្រោះថ្នាក់ចរាចរណ៍ផ្លូវគោក នៅទូទាំងប្រទេស នាឆ្នាំ២០១៩ បានកើតឡើងចំនួន ៤១២១លើក សម្លាប់មនុស្ស ១៩៨១នាក់ និងរងរបួស ៦១៤១នាក់។
របាយការណ៍ដដែល បង្ហាញថា គ្រោះថ្នាក់ចរាចរណ៍ផ្លូវគោក នៅឆ្នាំ២០១៩ ច្រើនជាងគេ កើតឡើង នៅក្នុងរាជធានីភ្នំពេញ ដែលបណ្តាលឱ្យមនុស្សស្លាប់ ៣៤៨នាក់ ខេត្តព្រះសីហនុ ស្លាប់ ១៤៩នាក់ និងខេត្តកណ្តាល ស្លាប់ ១៤៣នាក់។
ចំណែកមូលហេតុ ដែលបណ្តាលឱ្យមានគ្រោះថ្នាក់ចរាចរណ៍ផ្លូវគោក នៅឆ្នាំ២០១៩ រួមមាន ការបើកបរលើសល្បឿនកំណត់ ៣៨%, បើកបរមិនគោរពសិទ្ធិ ២៣%, មិនប្រកាន់ស្តាំ ១៣%, វ៉ាជែង ៩%, ស្រវឹង៥%, កត្តាយានយន្ត ២% និងងងុយដេក ១%។
គ្រោះថ្នាក់ចរាចរណ៍នៅឆ្នាំ២០១៩ កើនឡើង ៨៤៥លើក ស្មើនឹង ២៦% បើធៀបនឹងឆ្នាំ២០១៨។ ក្នុងនោះ អ្នកស្លាប់កើន ២២០នាក់ ស្មើនឹង ១២% ខណៈអ្នករងរបួសកើន ១៣៧១នាក់ ស្មើនឹងប្រមាណ ២៩%។
របាយការណ៍ បានឱ្យដឹងថា ក្នុងចំណោមអ្នកស្លាប់ ដោយសារគ្រោះថ្នាក់ចរាចរណ៍នេះ ភាគច្រើន ជាអ្នកធ្វើដំណើរតាមម៉ូតូ ដែលមានចំនួន ១៥៤២នាក់ នៃចំនួនអ្នកស្លាប់សរុប ១៩៨១នាក់ ស្មើនឹង ៧៨ភាគរយ។ ក្នុងនោះ អ្នកស្លាប់ ដោយធ្វើដំណើរតាមម៉ូតូ មិនពាក់មួកសុវត្ថិភាពមានចំនួន ១១៨៦នាក់ ស្មើនឹង ៧៧ភាគរយ។
គណៈកម្មាធិការជាតិសុវត្ថិភាពចរាចរណ៍ផ្លូវគោក បានបញ្ជាក់ថា បញ្ហាប្រឈម សម្រាប់គ្រោះថ្នាក់ចរាចរណ៍ នៅឆ្នាំ២០១៩ គឺរចនាសម្ព័ន្ធផ្លូវថ្នល់ កាន់តែចង្អៀត ដោយសារកំណើនយានយន្ត ដែលមាន ៣៦ភាគរយ តម្រូវការធ្វើចរាចរណ៍ដឹកជញ្ជូនកាន់តែកើនឡើង កន្លែងខ្លះ ត្រូវរងការខូចខាត ឬខ្វះផ្លាកសញ្ញា, កង្វះការគ្រប់គ្រងទ្រូងផ្លូវ ចិញ្ចើមផ្លូវ និងចំណីផ្លូវ បណ្តាលឱ្យផ្លូវសម្រាប់ធ្វើចរាចរណ៍កាន់តែចង្អៀត, ស្មារតីនៃការគោរពច្បាប់របស់ប្រជាពលរដ្ឋនៅមានកម្រិត នៅតែខ្លាចនគរបាលជាងខ្លាចច្បាប់, សមត្ថភាពមន្ត្រីអនុវត្តច្បាប់នៅមានកម្រិត និងគុណភាពការងារ មិនទាន់ឆ្លើយតប តាមសំណូមពរដោយខ្វះមធ្យោបាយឧបករណ៍សម្ភារៈប្រតិបត្តិការ៕
SWIFT NEWS
