ទស្សនៈមិត្តអ្នកអាន៖ ក្រុមខ្មោចអតីតបក្សប្រឆាំង កំពុងបន្តប្រខាំគ្នាដណ្តើមអំណាចខ្យល់
កាលពីថ្ងៃទី២១ ខែតុលា ថ្មីៗនេះ ក្រុមខ្មោចអតីតបក្សប្រឆាំងនិយម កឹម សុខា បានវាយប្រហារយ៉ាងចាស់ដៃទៅលើក្រុមខ្មោចអតីតបក្សប្រឆាំងនិយម សម រង្ស៊ី ដែលប្រជាពលរដ្ឋបានដឹងយ៉ាងច្បាស់ជាយូរមកហើយថា ពាក្យដែលពួកគេធ្លាប់ភូតកុហកប្រជាពលរដ្ឋថា «កឹម សុខា និង សម រង្ស៊ី ជាមនុស្សតែមួយនោះ» គឺជាពាក្យការទូត ដើម្បីដណ្តើមអំណាចគ្នានៅក្នុងអតីតគណបក្សដែលត្រូវបានច្បាប់រំលាយបាត់ទៅហើយប៉ុណ្ណោះ។ តាមរយៈសារកើតទុក្ខមិនសុខចិត្តរបស់ខ្លួន ដែលនរណាក៏ដឹងដែរថាជាគំនិតរបស់ កឹម មនោវិទ្យា និង យ៉ែម ប៉ុញ្ញាឬទ្ធិ បានចោទប្រកាន់ក្រុមខ្មោចអតីតបក្សប្រឆាំងនិយម សម រង្ស៊ី ថាជាក្រុមអ្នកនយោបាយក្រៅបក្សមួយក្តាប់តូច បាននិងកំពុងញុះញង់ប្រជាពលរដ្ឋឱ្យប្រើប្រាស់វប្បធម៌ហិង្សា និងប៉ុនប៉ងឈានទៅរកការគ្រប់គ្រងអំណាចតាមបែបបដិវត្តន៍ហិង្សាយ៉ាងកប់ៗមាត់ ដែលបញ្ជាក់ច្បាស់ថាក្រុមទាំងពីរនេះមិនមែនជាមនុស្សតែមួយស្អីនោះទេ។
អ្វីដែលគេមិនអាចចោទប្រកាន់បានមកលើវិធានការច្បាប់របស់រាជរដ្ឋាភិបាល ថាកំពុងតែរំលោភសិទ្ធិនៃការបញ្ចេញមតិនោះ គឺនៅត្រង់ថា ក្រុមខ្មោចអតីតបក្សប្រឆាំងនិយម កឹម សុខា បានទទួលស្គាល់ និងមិនគាំទ្រសកម្មភាពរបស់ក្រុមអ្នកនយោបាយក្រៅបក្សមួយចំនួនរួម និងអតីតសមាជិកគណៈអចិន្ត្រៃយ៍មួយចំនួននិយម សម រង្ស៊ី ដែលបានសម្រេចជ្រើសរើសគោលជំហរហិង្សាចង់ធ្វើរដ្ឋប្រហារ ប្រកាសផ្តួលរំលំរាជរដ្ឋាភិបាល និងការជេរប្រមាថព្រះមហាក្សត្រ ដែលទង្វើនេះគឺពិតជាផ្ទុយទាំងស្រុងពីគោលការណ៍ឡើងកាន់អំណាចតាមបែបប្រជាធិបតេយ្យ ហើយដែលមិនអាចអត់ឱនឱ្យបានជាដាច់ខាត។ ក្រុមខ្មោចអតីតបក្សប្រឆាំងនិយម កឹម សុខា ក៏បានអំពាវនាវដល់ប្រជាពលរដ្ឋកុំឱ្យលង់ខ្លួនចាញ់ការបោកប្រាស់ និងការអុជអាលរបស់ក្រុមខ្មោចអតីតបក្សប្រឆាំងនិយម សម រង្ស៊ី ផងដែរ ពីព្រោះបើបងប្អូនប្រជាពលរដ្ឋនៅតែជឿលើការញុះញង់គឺប្រាកដណាស់នឹងត្រូវប្រឈមមុខនឹងច្បាប់ ហើយនឹងត្រូវចាប់ខ្លួន និងដាក់ឃុំក្នុងពន្ធនាគារជាក់ជាមិនខាន។
ក្រុមខ្មោចអតីតបក្សប្រឆាំងនិយម កឹម សុខា ក៏បានប្រកាសមិនទទួលស្គាល់នូវតួនាទីប្រធានស្តីទី របស់អ្នកនយោបាយរត់ចោលស្រុក សម រង្ស៊ី ផងដែរ ហើយបានអះអាងថាសមាជដែលបានធ្វើកាលពីខែធ្នូ ឆ្នាំ២០១៨នោះ គឺជាសមាជខុសច្បាប់មានបំណងបំបែកកម្លាំងអតីតបក្សខ្មោចរបស់ខ្លួនជាចម្រៀកៗដែលធ្វើឱ្យបាត់បង់នូវមូលដ្ឋានគាំទ្រពីប្រជាពលរដ្ឋទាំងស្រុងទៀតផង។
ជារួម ទោះបីជាក្រុមខ្មោចអតីតបក្សប្រឆាំងនិយម កឹម សុខា និងក្រុមខ្មោចអតីតបក្សប្រឆាំងនិយម សម រង្ស៊ី កំពុងប្រខាំគ្នាដើម្បីដណ្តើមអំណាចខ្យល់សម្រាប់ក្រុមរបស់ខ្លួនយ៉ាងណាក្តី ហើយទោះបីជាក្រុមមួយខិតខំថ្លែងសារទុក្ខដើម្បីដោះបន្ទុកផ្លូវច្បាប់សម្រាប់ខ្លួនក្តី ក៏វិធានការច្បាប់នៅតែបន្តអនុវត្តចំពោះបុគ្គល ឬក្រុមអតីតបក្សខ្មោចដែលមានបំណងតែមួយចង់ផ្តួលរំលំរាជរដ្ឋាភិបាលស្របច្បាប់កើតចេញពីការបោះឆ្នោតដែលមានសម្លេងគាំទ្ររហូត៨៣,០២% តាមរយៈការធ្វើរដ្ឋប្រហារ ឬបដិវត្តពណ៌ដោយឃុបឃិតជាមួយបរទេស ជាដរាបដោយគ្មានការលើកលែងជាដាច់ខាត។
ម្យ៉ាងទៀត ច្បាស់ណាស់ថា កងកម្លាំងមានសមត្ថកិច្ចពាក់ព័ន្ធទាំងអស់នឹងចាត់វិធានការយ៉ាងម៉ឺងម៉ាត់បំផុត និងតឹងរឹងបំផុតចំពោះពួកមេក្លោងដែលជាឧក្រិដ្ឋជន និងជនទាំងឡាយណាដែលសាកល្បងប្រថុយចូលរួមប្រឆាំងនឹងសុខសន្តិភាព ដើម្បីរក្សាសន្តិសុខសណ្តាប់ធ្នាប់នៃរដ្ឋ។ ជាមួយគ្នានោះដែរប្រជាពលរដ្ឋគ្រប់រូបត្រូវចូលរួមថែរក្សាសណ្តាប់ធ្នាប់សង្គម និងសមិទ្ធផលនានាដែលកំពុងមាន ដោយមិនត្រូវចាញ់បោកនូវឧបាយកលខ្មៅកខ្វក់នោះឡើយ ពោលគឺប្រជាពលរដ្ឋនឹងមិនចូលរួមនៅក្នុងផែនការធ្វើរដ្ឋប្រហារផ្តួលរំលំរាជរដ្ឋាភិបាលស្របច្បាប់ឡើយ។ ផ្ទុយទៅវិញ បងប្អូនប្រជាពលរដ្ឋនៅតែបន្តចូលរួមថែរក្សាសន្តិភាពដែលយើងខិតខំរកបានដោយលំបាកនេះ ដើម្បីធានាការពារ និងថែរក្សាសន្តិភាព ស្ថិរភាពសង្គម និងវិបុលភាពរបស់ប្រទេសជាតិ ព្រមទាំងសេចក្តីសុខសាន្តរបស់កូនចៅយើង និងជាពិសេសដើម្បីសេចក្តីសុខរបស់ប្រជាជនកម្ពុជាទាំងមូល ហើយជនរួមជាតិខ្មែរក៏នឹងមិនចាញ់ឧបាយកលមេក្លោងរដ្ឋប្រហារទាំងនោះដែរព្រោះពួកគាត់យល់យ៉ាងច្បាស់ថា ការចាញ់បោកពួកឧក្រិដ្ឋជនទាំងនោះ អាចនឹងនាំឲ្យខ្លួនពួកគាត់ជាប់ពាក់ព័ន្ធនឹងអំពើរួមគំនិតក្បត់ ដែលត្រូវមានទោស ធ្ងន់ធ្ងរតាមច្បាប់ ហើយពួកគាត់នឹងចូលរួមប្រឆាំងឧក្រិដ្ឋកម្មបំផ្លិចបំផ្លាញជាតិនេះ ដោយសហការរាយការណ៍អំពីផែនការក្បត់របស់ពួកឧទ្ទាម និងមុខសញ្ញាពាក់ព័ន្ធជូនទៅអាជ្ញាធរមានសមត្ថកិច្ចគ្រប់លំដាប់ថ្នាក់ដើម្បីឈានទៅចាត់វិធានការច្បាប់ឲ្យមានប្រសិទ្ធភាព ដែលចុងក្រោយបំផុតផែនការធ្វើរដ្ឋប្រហាររបស់មេឧក្រិដ្ឋជនក្បត់ជាតិ នឹងទទួលបរាជ័យយ៉ាងអាម៉ាស់បំផុត៕
ដោយ៖ សួន ចំរើន
