ទស្សនៈមិត្តអ្នកអាន៖ ទិវាទទួលទានអំបុកថ្ងៃទី៩ វិច្ឆិកា គឺជាកម្លាំងមហាសាមគ្គីជាតិ ដើម្បីការពាជាតិ សាសនា ព្រះមហាក្សត្រ
ទស្សនៈមិត្តអ្នកអាន៖ ទិវាទទួលទានអំបុកថ្ងៃទី៩ វិច្ឆិកា គឺជាកម្លាំងមហាសាមគ្គីជាតិ ដើម្បីការពាជាតិ សាសនា ព្រះមហាក្សត្រ
ផែនការធ្វើរដ្ឋប្រហាររបស់មេឧទ្ទាមក្បត់ជាតិ សម រង្ស៊ី នៅថ្ងៃទី៩ ខែវិច្ឆិកា ត្រូវបានលោកនាយករដ្ឋមន្ត្រី ហ៊ុន សែន បកអាក្រាត និងបន្សាបឱ្យរលាយសាបសូន្យដូចអំបិលត្រូវទឹកយ៉ាងអាម៉ាស ក្រោយពីការថ្លែងសាររបស់លោក កាលពីព្រឹកថ្ងៃទី២ ខែតុលា កន្លងទៅថ្មីៗនេះអំពាវនាវឱ្យប្រជាពលរដ្ឋទូទាំងប្រទេសទទួលទានអំបុកគ្រប់ៗគ្នា និងគ្រប់ទីកន្លែងចាប់ពីថ្ងៃទី៩ ដល់ថ្ងៃទី១២ ខែវិច្ឆិកា ខាងមុខនេះ។
ដូចកាលពីអំឡុងខែមិថុនាកន្លងទៅដែរ មេឧទ្ទាមក្បត់ជាតិ និងគូកន បានប្រើឧបាយកលជួបជុំអ្នករួមគំនិតក្បត់ជាតិចង់ផ្តួលរំលំរាជរដ្ឋាភិបាលឱ្យទទួលទាននំបញ្ចុក ដើម្បីសាកល្បងប្រមូលផ្តុំកម្លាំងរបស់ខ្លួននៅទូទាំងប្រទេសឱ្យងើបបះបោរ ក្នុងគោលបំណងផ្តួលរំលំរាជរដ្ឋាភិបាល ម្តងរួចមកហើយ ប៉ុន្តែក៏ត្រូវបានបុរសខ្លាំងខាងយុទ្ធសាស្ត្រ លោក ហ៊ុន សែន បំផ្លាញផែនការប្រមូលផ្តុំនោះបានដោយជោគជ័យផងដែរ។
មកដល់ពេលបច្ចុប្បន្ននេះ ដោយសារតែមហិច្ឆិតាចង់បានឡើងកាន់អំណាចផ្ទាល់ខ្លួន មេឧទ្ទាមក្បត់ជាតិនៅតែចិញ្ចឹមចិត្តប្រើល្បិចប្រមូលផ្តុំកម្លាំងបះបោរដដែលនេះ ដោយយកលេសនៃការវិលត្រឡប់របស់ខ្លួននៅថ្ងៃទី៩ ខែវិច្ឆិកា ឆ្នាំ២០១៩ ជាការញុះញង់ប្រជាពលរដ្ឋឱ្យមកហែរហមទទួលខ្លួនដើម្បីឱ្យមានចលាចលសង្គម ក្នុងបំណងគេចវេសពីការអនុវត្តច្បាប់របស់សមត្ថកិច្ច។ ប៉ុន្តែ សម្រាប់អ្នកតាមដានស្ថានការណ៍ និងប្រជាពលរដ្ឋ ទូទៅនៅកម្ពុជាសុទ្ធតែបានដឹងថាទណ្ឌិតក្បត់ជាតិ និងគូកន បានឃោសនាអំពីលេសនៃការវិលមកកម្ពុជាវិញនៅថ្ងៃទី៩ វិច្ឆិកា ឆ្នាំ២០១៩ ខាងមុខ គឺពិតជាផែនការដ៏គំរក់ដើម្បីមកដណ្តើមអំណាចតាមបែបមិនប្រជាធិបតេយ្យ ដែលជាឆ្នួនបញ្ឆេះនូវសង្គ្រាមស៊ីវិលនៅកម្ពុជាសារជាថ្មី ហើយជាអំពើដែលផ្ទុយពីច្បាប់ដែលមានចែងនៅក្នុងរដ្ឋធម្មនុញដែលជាច្បាប់កំពូលថែមទៀត។ ដូច្នេះហើយបានជាលោកនាយករដ្ឋមន្ត្រី ហ៊ុន សែន ត្រូវប្រើយុទ្ធសាស្ត្របង្រ្កាបឧបាយកលដ៏គំរក់នេះដោយប្រើវិធីសាស្ត្រត្រជាក់ តែមុតស្រួចតបទៅវិញប្រកបដោយប្រសិទ្ធភាព ដោយការអំពាវនាវរួមគ្នាជាមួយប្រជាពលរដ្ឋទទួលទានអំបុកនៅទូទាំងប្រទេសជំនួសវិញ ដើម្បីការពារជាតិ សាសនា ព្រះមហាក្សត្រ ជាពិសេសការពារសុខសន្តិភាពជំនួសវិញ។
គេនៅចាំបានថា បន្ទាប់ពីការរត់ទៅសុំអង្វរឱ្យបរទេសដាក់សម្ពាធគំរាមដកពន្ធអនុគ្រោះ EBA នៅអឺរ៉ុប និងពន្ធ GSP នៅអាមេរិកគ្មានប្រសិទ្ធភាព ដល់ប្រក្រតីភាព និងការអភិវឌ្ឍរបស់កម្ពុជាមក ពួកក្រុមឧទ្ទាមក្រៅច្បាប់រត់ចោលស្រុកនេះបានប្តូរយុទ្ធសាស្ត្រ និងប្រើឧបាយកលញុះញង់ពលរដ្ឋ និងកម្លាំងប្រដាប់អាវុធឱ្យប្រើអំពើហិង្សាវិញម្តងដើម្បីផ្លាស់ប្តូររបបរាជានិយមតែម្តង តាមរយៈការវាយប្រហារទៅលើស្ថាប័នព្រះមហាក្សត្រ ដែលប្រជាពលរដ្ឋកម្ពុជាគោរពស្រឡាញ់ដោយជំរុញឱ្យអង្គព្រះមហាក្សត្រដាក់រាជ្យ និងប្រើថវិកាទិញទឹកចិត្ត និងញុះញង់កងទ័ពឱ្យប្រឆាំងនិងរដ្ឋអំណាចស្របច្បាប់កើតចេញពីការបោះឆ្នោត ដែលទង្វើនេះគឺពិតជាផែនការផ្លាស់ប្តូររបបរាជានិយម និងផ្តួលរំលំរាជរដ្ឋាភិបាលដោយការធ្វើរដ្ឋប្រហារយ៉ាងពិតប្រាកដ ហើយដែលទង្វើនេះច្បាប់នៅកម្ពុជា មិនអាចអត់ឱនឱ្យបានឡើយ។ មានភស្តុតាងកាន់តែច្រើនឡើងៗ ដែលឆ្លុះបង្ហាញឱ្យឃើញថាមេក្លោងក្បត់ ជាតិ និងគូកនពិតជាកំពុងធ្វើរដ្ឋប្រហារបំផ្លាញជាតិខ្លួនឯង គឺការញុះញង់ប្រជាជនឱ្យងើបឈរបះបោរ ការបំផុសកងកម្លាំងប្រដាប់អាវុធឱ្យបះបោរ ការបំផុសកំហឹងពលករក្រៅប្រទេសឱ្យបះបោរ ការ ប្រមាថធ្ងន់ធ្ងរដល់អង្គព្រះមហាក្សត្រ និងការរៀបចំត្រៀមថវិកាទិញទឹកចិត្តជនស្ម័គ្រស្លាប់នៅក្នុងផែន ការរដ្ឋប្រហារនោះទៀតផង។ ទង្វើដណ្តើមអំណាចដោយកំរោលបែបនេះ គឺពិតជាបានដើរផ្ទុយពីគោលការណ៍នៃលទ្ធិប្រជាធិបតេយ្យ ហើយត្រូវបានលោកស្រី រ៉ូណាស្មីត អ្នករាយការណ៍ពិសេសខាងផ្នែកសិទ្ធិមនុស្សប្រចាំកម្ពុជា ប្រកាសមិនគាំទ្រផងដែរ។ ការជ្រើសរើសមេដឹកនាំប្រទេសគឺត្រូវធ្វើតាមរយៈការបោះឆ្នោតដែលមានកាលបរិច្ឆេទកំណត់ច្បាស់លាស់នៅក្នុងរដ្ឋធម្មនុញ្ញរៀងរាល់៥ឆ្នាំម្តង ដែលជាច្បាប់កំពូលរបស់ជាតិ គឺមិនមែនជាការកេណ្ឌប្រជាពលរដ្ឋមកធ្វើបាតុកម្ម ទម្លាក់នាយករដ្ឋមន្ត្រីជាប់ឆ្នោត ហើយលើកខ្លួនឯង និងគូកន ឱ្យឡើងកាន់អំណាចជំនួសនោះទេ។
ជារួម សម្តីប្រមាថអង្គព្រះមហាក្សត្រជាសាធារៈ អំពើញុះញង់ប្រជាពលរដ្ឋឱ្យបះបោរ និងសកម្មភាពចលនាកងទ័ពឱ្យផ្តាច់ខ្លួន របស់មេឧទ្ទាមក្រៅច្បាប់ និងគូកន គឺជាអំពើក្បត់ជាតិ សាសនា ព្រះមហាក្សត្រដែលមិនអាចអត់ឱនឱ្យបានឡើយ ហើយជនទាំងឡាយណាចូលរួមនៅក្នុងអំពើក្បត់ជាតិជាមួយក្រុមឧទ្ទាមទាំងនោះ គឺពិតជាបានប្រព្រឹត្តិនូវបទល្មើសពីបទរួមគំនិតក្បត់ហើយត្រូវតែចាប់បញ្ជូនមកអនុវត្តច្បាប់ដោយគ្មានការលើកលែងទោសជាដាច់ខាត ព្រោះការចូលរួមអនុវត្តនៅក្នុងផែនការនៃរដ្ឋប្រហារនៅថ្ងៃទី៩ ខែវិច្ឆិកា ឆ្នាំ២០១៩ នោះ គឺពិតជាអំពើបំផ្លាញនូវសន្តិសុខសង្គម សណ្តាប់ធ្នាប់ជាតិ។
ផ្ទុយមកវិញក្នុងនាមយើងជាប្រជាពលរដ្ឋដែលគោរព ស្រឡាញ់របបរាជានិយម យើងត្រូវរួមគ្នាជ្រោងទង់សន្តិភាពដែលយើងកំពុងទទួលបានផ្លែផ្កាដូចសព្វថ្ងៃ ដើម្បីបន្តអភិវឌ្ឍប្រទេសជាតិយើងឱ្យកាន់តែសម្បូរណ៍សប្បាយ ដោយមិនត្រូវជឿលើការអូសទាញរបស់ក្រុមជនក្បត់ជាតិ ក្បត់ព្រះមហាក្សត្រ ដែលមានមេឧទ្ទាមក្រៅច្បាប់ជាមេក្លោងនោះឡើយ។ ជាងនេះទៀត ដើម្បីសេចក្តីសុខរបស់ខ្លួនយើង ក្រុមគ្រួសារយើង កូនចៅយើង សូមបងប្អូនប្រជាពលរដ្ឋបន្តផ្សព្វផ្សាយនូវការអំពាវនាវរបស់លោកនាយករដ្ឋមន្ត្រី ហ៊ុន សែន ចូលរួមអបអរសារទរទិវាបុណ្យជាតិរបស់យើងតាមរយៈការចូលរួមទទួលទានអំបុកសន្តិភាពទាំងអស់គ្នា ចាប់ពីថ្ងៃទី៩ វិច្ឆិកា រហូតដល់ថ្ងៃទី១២ វិច្ឆិកា ដើម្បីបង្ហាញនូវសាមគ្កីភាព និងភាពសុខដុរមនារបស់បងប្អូននៅក្នុងឱកាសពិធីបុណ្យឯករាជ្យជាតិ និងបុណ្យអ៊ុំទូក បណ្តែតប្រទីប សំពះព្រះខែ និងអកអំបុក ដែលជាប្រពៃណីរបស់ជាតិយើង ហើយសូមបងប្អូនយល់ថា «ទិវាទទួលទានអំបុកថ្ងៃទី៩ វិច្ឆិកា គឺជាកម្លាំងមហាសាមគ្គីជាតិ ដើម្បីការពារជាតិ សាសនា ព្រះមហាក្សត្រ» យើង៕
ដោយ៖ សួន ចំរើន
