អ្នកវិភាគចៅចាក់ស្មុក៖ សម រង្ស៊ី ដឹងថាខ្លួននឹងមិនវិលត្រឡប់ចូលកម្ពុជាវិញតាមការកំណត់ ទើបខំព្យាយាមផ្លាស់ប្តូរលក្ខខណ្ឌភ្នាល់ដើម្បីគេចវេសពីការភ្នាល់ និងស្វែងរកលេសបម្រើគោលដៅបដិវត្តន៍ពណ៌

ដោយ៖ លី វិទ្យា​​ | ថ្ងៃចន្ទ ទី២ ខែកញ្ញា ឆ្នាំ២០១៩​ | ទស្សនៈ - នយោបាយ | 0 |
អ្នកវិភាគចៅចាក់ស្មុក៖ សម រង្ស៊ី ដឹងថាខ្លួននឹងមិនវិលត្រឡប់ចូលកម្ពុជាវិញតាមការកំណត់ ទើបខំព្យាយាមផ្លាស់ប្តូរលក្ខខណ្ឌភ្នាល់ដើម្បីគេចវេសពីការភ្នាល់ និងស្វែងរកលេសបម្រើគោលដៅបដិវត្តន៍ពណ៌ អ្នកវិភាគចៅចាក់ស្មុក៖ សម រង្ស៊ី ដឹងថាខ្លួននឹងមិនវិលត្រឡប់ចូលកម្ពុជាវិញតាមការកំណត់ ទើបខំព្យាយាមផ្លាស់ប្តូរលក្ខខណ្ឌភ្នាល់ដើម្បីគេចវេសពីការភ្នាល់ និងស្វែងរកលេសបម្រើគោលដៅបដិវត្តន៍ពណ៌

សម្តេចតេជោ ហ៊ុន សែន ពិតជាបាននិងកំពុងដេញទាន់ទាន់កែងហើយព្រមទាំងបកស្បែកមុខដ៏អាក្រក់ ដែលពោរពេញដោយការភូតកុហក​បោកប្រាស់​ពីទណ្ឌិតក្បាលខូច សម រង្ស៊ី ខណៈទណ្ឌិតរត់គេចពីគុករូបនេះបានព្យាយាមគេចវេសពីការទទួលភ្នាល់បកវិញរបស់សម្តេចតេជោ ហ៊ុន សែន ចំពោះការបបួលរបស់ខ្លួន។ គេចវេសពីការភ្នាល់ដោយសារតែ សម រង្ស៊ី បានដឹងខ្លួនឯងយ៉ាងច្បាស់ថា ខ្លួននឹងចាញ់ការភ្នាល់ជាថ្មីម្តងទៀតដូចករណីភ្នាល់លើសំណុំរឿង កឹម សុខា ហើយខ្លួនមិន​ហ៊ានវិលត្រឡប់ចូលក្នុងប្រទេសកម្ពុជាវិញនៅថ្ងៃទី៩ ខែវិច្ឆិកា ឆ្នាំ ២០១៩ ដូចដែលបានប្រកាសក្តែងៗឡើយ ព្រោះការកំណត់កាលបរិច្ឆេទនៃការវិលត្រឡប់នេះ គ្រាន់តែនៅក្នុងគោលបំណងរៃអង្គាសប្រាក់សម្រាប់ក្រុមខ្លួនប៉ុណ្ណោះ។ ហេតុដូច្នេះហើយបានជាទណ្ឌិត សម រង្ស៊ី បានព្យាយាមកែប្រែលក្ខន្តិកៈនៃការភ្នាល់​ដែលផ្តល់​ឱកាសឱ្យខ្លួនច្រើន។ អ្វីដែលមនុស្សម្នាចង់ដឹងគឺថាតើសម រង្ស៊ី ហ៊ានចូលឬមិនហ៊ានចូលក្នុងទឹកដីកម្ពុជា? ព្រោះបើសម រង្ស៊ី ចូលនៅថ្ងៃទី៩ ខែវិច្ឆិកា ពិតណាស់ គឺនឹងត្រូវចាប់បញ្ជូនទៅចូលគុកភ្លាមៗនិង គ្មានឱកាសដើរដង្ហែរក្បួនដូចកាលពីខែកក្កដា ឆ្នាំ២០១៣ ឡើយ ហើយប្រសិនបើសម រង្ស៊ី មិនវិលចូលកម្ពុជាវិញ ក៏ជីវិតនយោបាយខ្លួននឹងបញ្ចប់ផងដែរ ព្រោះគ្មាននរណាទៅលក់ស្រូវពូជមកគាំទ្រអ្នកនយោបាយបោកប្រាស់ដូចសម រង្ស៊ី នេះទេ។ ជីវិតនយោបាយសម រង្ស៊ី នៅពេលនេះបានឈានដល់ដំណាក់កាលដកចង្កាមាន់ រួចស្រេចទៅហើយ គឺនៅតែថ្ងៃទី៩ ខែវិច្ឆិកាមកដល់ដាក់ម្ឈូសហែរទៅដុតតែប៉ុណ្ណោះ។ ប៉ុន្តែសម រង្ស៊ី នៅតែ ព្យាយាមស្រោចស្រង់ជីវិតចុងក្រោយរបស់ខ្លួនដោយការភ្នាល់ ប៉ុន្តែបែរព្យាយាមគេចវេសពីភ្នាល់ទៅវិញ។

ក្នុងចេតនាគេចវេសយ៉ាងពិតប្រាកដពីការភ្នាល់ព្រោះដឹងថា ខ្លួននឹងមិនវិលមកជាន់ទឹកដីកម្ពុជាវិញ សម រង្ស៊ី បានលើកឡើងនូវលក្ខខណ្ឌដែលបង្កប់ដោយភាពពិសពុលក្នុងការអនុវត្តផែនការបដិវត្តន៍ ពណ៌ដោយបានលើកឡើងថា «នៅថ្ងៃ០៩ វិច្ឆិកា ២០១៩ ខាងមុខនេះ បើចំនួនប្រជាពលរដ្ឋ ដែលនឹងមកស្វាគមន៍ខ្ញុំនៅលើទឹកដីប្រទេសកម្ពុជា — ដោយមិនមានការរារាំង ឬបំភិតបំភ័យអ្វីឡើយ — មានតិចជាងមួយលាននាក់ ខ្ញុំនឹងយល់ព្រមឱ្យកម្លាំងលោក ហ៊ុន សែន ចាប់រូបខ្ញុំ ហើយខ្ញុំក៏យល់ព្រមបញ្ចប់ជីវិតនយោបាយរបស់ខ្ញុំ នៅពេលជាមួយគ្នានោះដែរ។ តែបើចំនួនប្រជាពលរដ្ឋដែលគាំទ្រខ្ញុំកើនដល់ទៅមួយលាននាក់ ឬលើសចំនួននេះទៅទៀត (មានន័យថា ប្រមាណ ៣ ដង ច្រើនជាង នៅថ្ងៃ ១៩ កក្កដា ២០១៣ គឺថ្ងៃមាតុភូមិនិវត្តន៍របស់ខ្ញុំចុងក្រោយ បន្ទាប់ពីការនិរទេសខ្លួន ៤ ឆ្នាំ) តើពេលនោះលោក ហ៊ុន សែន យល់ព្រមចុះចេញពីតំណែងភ្លាមមួយរំពេចឬទេ ដោយបង្ហាញការគោរពឆន្ទៈប្រជារាស្ត្រ ដែលទាមទារឲ្យគាត់ចុះចេញ? យើងនឹងសុំឲ្យអង្គការសហប្រជាជាតិ និង/ឬ សារព័ត៌មានអន្តរជាតិ ធ្វើជាសាក្សី នៃការភ្នាល់គ្នា ប្រកបដោយភាពថ្លៃថ្នូរនេះ»

អ្វីដែល សម រង្ស៊ី លើកឡើងនេះគឺបានបង្ហាញយ៉ាងច្បាស់ក្រឡែតពីចរិតក្រឡិចក្រឡិចរបស់អ្នក នយោបាយមាន់សម្លររូបនេះ ដោយយកប្រជាពលរដ្ឋមកដាក់ភ្នាល់វិញ ប្រើប្រាស់ប្រជាពលរដ្ឋជាឈ្នាន់ នយោបាយ និងយកប្រជាពលរដ្ឋឱ្យប្រឈមមុខច្បាប់ជំនួសខ្លួន។ នេះក៏បង្ហាញថា នៅពេលមានអាសន្ន សម រង្ស៊ី បានយកប្រជាពលរដ្ឋមកដោះស្រាយឧបសគ្គ មិនគិតពីជីវិតប្រជាពលរដ្ឋ ដែលស្របនឹងទង្វើបច្ចុ ប្បន្នរបស់ខ្លួនរត់ចោលស្រុក និងរត់ចោលប្រជាជន ព្រមទាំងប្រមាថជីវិតអ្នកដទៃថាគ្មានតម្លៃដូចដែលជន នេះធ្លាប់លើកឡើងថា «មិនភ្លើវិលត្រឡប់មកកម្ពុជាឱ្យរដ្ឋាភិបាលចាប់ដាក់គុកដូច កឹម សុខា និងស្លាប់ខ្លួន ឥតប្រយោជន៍ដូចខ្មោច កែម ឡី» ឡើយ។ នេះពិតជាចរិតដ៏ថោកទាបរបស់សម រង្ស៊ី ដែលមានឈាមជ័រជាជនក្បត់ជាតិតត្រកូល។ អ្វីដែលសំខាន់ដែលសាធារណមតិចង់ដឹងមិនមែនជាការកំណត់លក្ខខណ្ឌដោយយកប្រជាជនមកពាំងការពារជនកំសាកដូចសម រង្ស៊ី នេះទេ ថា តើ សម រង្ស៊ី ខ្លួនឯងមានភាពហ៊ានគ្រប់គ្រាន់ ដើម្បីវិលត្រឡប់មកកម្ពុជាវិញដែរឬទេ ដោយមិនចាំបាច់គិតដល់ថា សម រង្ស៊ី ហ៊ានមកជាប់គុកនៅ ស្រុកខ្មែរដែរឬយ៉ាងណាផង។ ប៉ុន្តែផែនការដែលសម រង្ស៊ី កំពុងអនុវត្តដើម្បីជួយសង្គ្រោះជីវិតនយោបាយ របស់ខ្លួនគឺមិនមែនមកដេកគុកទេ គឺជាការអនុវត្តផែនការចាស់របស់ពួកក្បត់ជាតិប៉ុណ្ណោះ។

គ្រប់គ្នាមានភាពប្រាកដនិយមថា ផែនការនៃការវិលត្រឡប់របស់ សម រង្ស៊ី ដើម្បីមកដឹកនាំធ្វើបដិវត្តពណ៌ជាថ្មីក្នុងការដណ្តើមអំណាចនៅកម្ពុជា។ ប៉ុន្តែ សម រង្ស៊ី បានប្រើប្រាស់ការភ្នាល់ដោយដាក់លក្ខខណ្ឌផ្សេងៗដើម្បីអាចបើកច្រកឱ្យខ្លួនធ្វើតេស្តកម្លាំងគាំទ្រខ្លួនផង និងលេសប្រមូលផ្តុំមនុស្សដើម្បីឱ្យជួយ ការពារខ្លួនផង និងបន្តអនុវត្តផែនការបដិវត្តន៍ពណ៌ដែលខ្លួនបានរៀបចំ។ ក្នុងផែនការនៃការវិលត្រឡប់របស់សម រង្ស៊ី មកកម្ពុជាវិញ ក្រុមប្រឆាំងនៅក្រៅប្រទេសបានរៀប​ចំសកម្មភាព​ចំនួន៥៖

  • ១)- បង្កើតក្រុមការងាររៀបចំកម្លាំងទទួលទណ្ឌិត សម រង្ស៊ី
  • ២)- ពង្រីកសកម្មភាពការទូត
  • ៣)- ពង្រីកការផ្សព្វផ្សាយព័ត៌មានជុំវិញបញ្ហារសើបៗ នៅក្នុងសង្គមដើម្បីបញ្ឋេះកំហឹងប្រជាពលរដ្ឋសំដៅជំរុញចលនាខាងក្នុងដែលបានបាត់បង់ជំនឿ និងសេចក្តីទុកចិត្តលើខ្លួនឱ្យកម្រើកឡើងវិញ
  • ៤)- ទំនាក់ទំនងឱ្យស្អិតរមួតជាមួយមជ្ឈដ្ឋានអ្នកប្រជាធិបតេយ្យដើម្បីបង្ហាញថាខ្លួននៅតែមានសកម្ម ភាពនិងមានគេទទួលស្គាល់ និង
  • ៥)- រៀបចំថវិកាសម្រាប់អនុវត្តផែនការ។ បន្ថែមលើសកម្មភាពទាំង៥ គោលដៅខាងលើ សម រង្ស៉ី បានចាប់ផ្តើមឃោសនាឱ្យកម្លាំងក្នុងស្រុកប្រឆាំងនឹងរាជរដ្ឋាភិបាល តាមរយៈការញុះញង់ឱ្យកម្លាំងប្រដាប់អាវុធបះបោរ និងការបញ្ឆេះកំហឹងសង្គមដើម្បីញុះញង់ឱ្យប្រជាជនបះបោរប្រឆាំងនឹងអាជ្ញាធរមានសមត្ថកិច្ច តាមរយៈបំផុស បំភាន់ បំភ្លៃ និងបំផ្លើសព័ត៌មានលើបញ្ហារសើបរបស់សង្គម តាមគ្រប់រូបភាព។

ការរៀបចំកម្លាំងប្រឆាំងខាងក្នុង ដើម្បីគាំទ្រ និងស្វាគមន៍ការវិលត្រឡប់មកវិញរបស់ សម រង្ស៉ី គឺធ្វើឡើងក្នុងល្បិចកល ដើម្បីប្រើប្រាស់កម្លាំងទាំងនេះ ជាខែលការពារខ្លួនផង និងជាកម្លាំងប្រឆាំងនឹងការអនុវត្តច្បាប់របស់អាជ្ញាធរមានសមត្ថកិច្ចផង។ ដូច្នេះ ច្បាស់ណាស់ថា គោលដៅនយោបាយពិតប្រាកដនៅពីក្រោយការប្រកាសវិលត្រឡប់របស់ សម រង្ស៉ី គឺការប៉ុនប៉ងប្រមូលកម្លាំងជាថ្មីដើម្បីដឹកនាំចលនាបដិវត្តន៍ពណ៌ជាថ្មី ដើម្បីមហិច្ឆតាអំណាចផ្ទាល់ខ្លួន។ ការបញ្ចុះបញ្ចូលឱ្យអឺរ៉ុបដក EBA ពីកម្ពុជា និងការបញ្ចុះបញ្ចូលឱ្យអាមេរិកដាក់ទណ្ឌកម្មលើកម្ពុជា ជាផ្នែកមួយដ៏សំខាន់នៃការអនុវត្តផែនការដ៏ពិសពុលរបស់ សម រង្ស៊ី ក្នុងគោលបំណងរុញច្រានឱ្យកម្ពុជាធ្លាក់ចូលក្នុងវិបត្តិសេដ្ឋកិច្ច និងសង្គម ដែលជាកត្តាអនុគ្រោះផ្នែកនយោបាយសម្រាប់ក្រុមប្រឆាំងញុះញង់ប្រមូលកម្លាំង ដើម្បីធ្វើបដិវត្តន៍ពណ៌ជាថ្មី។ ហេតុដូច្នេះហើយបាន ជា សម រង្ស៊ី ព្យាយាមផ្លាស់ប្តូរលក្ខខណ្ឌ និងក្រឡិចក្រឡុចបាយបិណ្ឌជាបាយបាត្រដើម្បីបង្កើតលេសប្រើ កម្លាំងប្រជាជន និងអនុវត្តផែនការបដិវត្តន៍ពណ៌ចំពោះមុខនៃភាពក្រឡិចក្រឡុចរបស់ សម រង្ស៊ី និងដើម្បីរុញ សម រង្ស៊ី ឱ្យទទួលស្គាល់ការពិតពីភាពកំសាកញីរបស់ខ្លូននោះ ព្រមទាំងជីកកប់ជីវិតនយោបាយសម រង្ស៊ីផងនោះ សម្តេចតេជោ ហ៊ុន សែន បានមានប្រសាសន៍ប្រាប់សារព័ត៌មានហ្វ្រេសញូវនៅល្ងាចថ្ងៃទី៣០ ខែសីហា ប៉ុន្មានម៉ោងក្រោយ សម រង្ស៊ី ផ្លាស់ប្តូរលក្ខខណ្ឌដោយសម្តេចតេជោ មានប្រសាសន៍ថា៖ «ខ្ញុំបានឃើញហើយការលើកឡើងភ្នាល់របស់អ្នកឯង ជាវាទង្វើគួរឱ្យអស់សំណើច និងបង្ហាញចេតនាច្បាស់ក្រឡែតចង់គេចចេញពីការអនុវត្តច្បាប់របស់កម្លាំងសមត្ថកិច្ចកម្ពុជា និងជាលេសមួយមិនត្រឡប់មកកម្ពុជា»

ដូច្នេះខ្ញុំសូមបញ្ជាក់ច្បាស់ៗឡើងវិញថា កម្លាំងសមត្ថកិច្ចនឹងចាប់អ្នកឯងញាត់គុកតាមដីកាតុលាការ ក្នុងរយៈពេល ២៤ ម៉ោង បើក្លាហានហ៊ានចូលប្រទេសកម្ពុជា បើចាប់មិនបានទេខ្ញុំសុខចិត្តចុះចេញពីតំណែង។ អ្នកឯងគ្រាន់តែឆ្លើយហ៊ាន ឬមិនហ៊ាន? សម្តេចតេជោនាយករដ្ឋមន្រ្តី បានបញ្ជាក់បន្តថា «ប៉ុន្តែទោះបីអ្នកឯងហ៊ាន ឬមិនហ៊ាន មិនសំខាន់ទេ, កម្លាំងសមត្ថកិច្ចបានត្រៀមរៀបចំដើម្បីចាប់អ្នកឯងបញ្ចូលគុក ប្រសិនបើអ្នកឯងហ៊ានចូលកម្ពុជា ហើយមិនចាំបាច់ត្រូវការសងលើតម្លៃនៃការភ្នាល់ណានោះទេ»

សម រង្ស៊ី គឺជនមានទោសជាប់នឹងខ្លួន ហើយក៏ជាមនុស្សអស់តម្លៃសម្រាប់ជាតិ និងប្រជាជន ថែមទាំងជាសត្រូវរបស់ប្រជាជនថែមទៀតផងដែលត្រូវប្រឈមនឹងការអនុ វត្តច្បាប់នៅពេលដែលជាន់ដីកម្ពុជាភ្លាម។ ប្រសិនបើសម រង្ស៊ីវិលចូលមកកម្ពុជាវិញ ទំនងជាសម រង្ស៊ី គ្មានឱកាសកាន់ក្បាលមីក្រូស្រែកឡូឡា ដង្ហែរក្បួនតាមផ្លូវ គ្មានឱកាសថើបដីខ្មែរដូចកាលពីឆ្នាំ ២០១៣ ឡើយ ប៉ុន្តែសម រង្ស៊ី នឹងត្រូវកម្លាំងសមត្ថកិច្ចវាយខ្នោះតាំងពីក្នុងយន្តហោះម្ល៉េះ។

គ្មានប្រជាពលរដ្ឋណាដែលហែរហាមបានឡើយ មានតែសមត្ថកិច្ច ក្រៀកសម រង្ស៊ី ចូលគុក ហើយទំនងមានតែដេកគុកទេដែលមានសុវត្ថិភាពជាង។ សម រង្ស៊ី នឹងមិនមាន ភាពក្លាហានគ្រប់គ្រាន់ក្នុងការទទួលយកការភ្នាល់ឡើយ សូម្បីតែការភ្នាល់ដែលផ្តួចផ្តើមឡើងដោយអង្គ ព្រោកប្រាជ្ញរបស់លោក ខាន់ សុវណ្ណ ក៏មិនហ៊ានផង ចុះទម្រាំនឹងការភ្នាល់ជាមួយសម្តេចតេជោ ហ៊ុន សែន ទៀត តើសម រង្ស៊ី ម្តេចនឹងហ៊ានទៅព្រោះសម រង្ស៊ី ខ្លាចចាញ់សម្បថពេលចាញ់ការភ្នាល់ និងមិនគោរពពាក្យសន្យា។ សម្តេចតេជោហ៊ុន សែន បានលើកឡើងភ្ជាប់នឹងការភ្នាល់ថា៖ «ប្រសិនបើអ្នកណាម្នាក់មិនគោរពលើការសន្យានៃការភ្នាល់នេះ ខ្ញុំសូមឱ្យវត្ថុស័ក្តិសិទ្ធិលើលោកផ្តាច់ជីវិតអ្នកដែលមិនគោរពការសន្យា និងក្រុមគ្រួសារទាំងពូជតែម្តង។ តើអ្នកឯងហ៊ាន ឬមិនហ៊ាន?»

ទោះបីយ៉ាងណា សម រង្ស៊ី និងបក្ខពួករបស់ខ្លួនទំនងជាមានការភ័ន្តច្រឡំថាការភ្នាល់នេះនាំឱ្យខ្លួចគេផុតពីការអនុវត្តច្បាប់ ប៉ុន្តែសូមម្សៀរសម រង្ស៊ី និងគូកនចងចាំថា ទោះបីជាមានការភ្នាល់យ៉ាងណាក៏ ដោយ ការអនុវត្តច្បាប់ត្រូវតែធ្វើ។ ហើយក៏ចាប់ខ្លួនសម រង្ស៊ី មិនមែនស្ថិតនៅលើការវិលមកឬមិនវិលមក និងមានអ្នកហែរហម​ប៉ុន្មានលាននាក់ដូចសម រង្ស៊ី អះអាងឡើយ ប៉ុន្តែនេះគឺជាកាតព្វកិច្ចរបស់សមត្ថកិច្ច ហើយប្រជាពលរដ្ឋខ្មែរភាគច្រើនបានគាំទ្រចំពោះ​ការអនុវត្តច្បាប់ចាប់ខ្លួន​ជនក្បត់ជាតិសម រង្ស៊ី នេះដើម្បី ពង្រឹងនីតិរដ្ឋ ហើយការអនុវត្តច្បាប់គឺជាកិច្ចការស្នូលដើម្បីថែរក្សាការពារសុខសន្តិភាព និងការអភិវឌ្ឍ ដូចដែលកម្ពុជាបានធ្វើ​កាលពីថ្ងៃទី១៦ ខែវិច្ឆិកា ឆ្នាំ ២០១៧ ប្រឆាំងនឹងគណបក្សសង្គ្រោះជាតិ។ នៅពេលនេះ សម្តេចតេជោ ហ៊ុន សែន បានយកតំណែងនាយករដ្ឋមន្ត្រី ដែលប្រជាពល​រដ្ឋបោះឆ្នោតគាំទ្រដើម្បីប្តូរនឹងការចាប់ខ្លួនជនក្បត់ជាតិ សម រង្ស៊ី ក៏ចង់បង្ហាញថាទណ្ឌិតសម រង្ស៊ី ជាជនចង្រៃជាតិដែលចាំ បាច់ទោះក្នុងតម្លៃណាក៏ត្រូវចាប់​ជនក្បត់​ជាតិញាត់គុកឱ្យខាងតែបាន៕

ដោយ៖ ចៅចាក់ស្មុក
រាជធានីភ្នំពេញ ថ្ងៃទី៣០ ខែសីហា ឆ្នាំ២០១៩

បញ្ចេញមតិ
ពាក្យគន្លឹះទាក់ទង
អត្ថបទទាក់ទង