សល់ ៤ខែទៀត បុណ្យសមុទ្រនៅកំពតនឹងមកដល់! លោក ថោង ខុន និងអភិបាលខេត្ត ជំរុញឱ្យអនុវត្តការងារពាក់ព័ន្ធបន្តទៀត

សល់ ៤ខែទៀត បុណ្យសមុទ្រនៅកំពតនឹងមកដល់! លោក ថោង ខុន និងអភិបាលខេត្ត ជំរុញឱ្យអនុវត្តការងារពាក់ព័ន្ធបន្តទៀត

ខណៈនៅសល់ពេលតែ៤ខែទៀត ពិធីរៀបចំបុណ្យសមុទ្រលើកទី៨ ជុំទី២ នៅខេត្តកំពត នឹងឈានចូលមកដល់ហើយនោះ ក្រសួងទេសចរណ៍ រដ្ឋបាលខេត្តកំពត តំណាងក្រសួង ស្ថាប័ន មន្ទីរ អង្គភាព រួមជាមួយវិស័យឯកជនពាក់ព័ន្ធ បានជួបប្រជុំគ្នាសាជាថ្មីនៅសាលាខេត្តកំពត នៅថ្ងៃទី២៦ ខែសីហា ឆ្នាំ២០១៩នេះ ក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និងលោក ជាវ តាយ អភិបាលខេត្តកំពត។

ដើម្បីត្រៀមរៀបចំព្រឹត្តិការណ៍ទេសចរណ៍នេះ ប្រកបដោយភាពរលូន រាជរដ្ឋាភិបាលបានសម្រេចបង្កើតគណៈកម្មការអន្តរក្រសួង ដើម្បីត្រៀមរៀបចំពិធីបុណ្យសមុទ្រ ក្នុងនោះមានលោក ថោង ខុន ជាប្រធាន លោក ជាវ តាយ ជាអនុប្រធានអចិន្ត្រៃយ៍ និងស្ថាប័នពាក់ព័ន្ធជាសមាជិក។ ជាមួយនឹងគោលបំណងដើម្បីធ្វើឱ្យខេត្តកំពតមានសក្ដានុពលកាន់តែមានភាពទាក់ទាញផងនោះ លោក ថោង ខុន បានណែនាំនូវអនុសាសន៍មួយចំនួនដល់ក្រុមការងារតាមអនុគណៈកម្មការនិមួយៗ អនុវត្តបន្ត ក្នុងនោះរួមមាន៖

* ដើម្បីកំណត់យកខេត្តកំពតជាខេត្តគំរូក្នុងការរៀបចំវិថីម្ហូបអាហារ (Food Sreet) លោក ថោង ខុន បានណែនាំទៅក្រុមការងារត្រូវពន្លឿនការរៀបចំ Food Street នេះឱ្យបានទាន់ពិធីបុណ្យសមុទ្រខាងមុខ ដោយត្រូវរៀបចំហេដ្ឋារចនាសម្ពន្ធក្នុងតំបន់វិថីម្ហូបអាហារ។ ត្រូវរៀបចំសណ្តាប់ធ្នាប់ សោភ័ណភាពទីក្រុង រៀបចំឲ្យមានផ្លូវថ្មើរជើង សោភ័ណភាពសំយាបផ្ទះ ពិសេសតំបន់ដែលមានលំនៅស្ថានពីជំនាន់បារាំងដែលនៅក្បែរវិថីម្ហូបអាហារ។

* ខណៈការកសាងកំពង់ផែទេសចរណ៍ខេត្តកំពត កំពុងដំណើរការទៅតាមផែនការនោះ លោករដ្ឋមន្ត្រី បានជំរុញឱ្យកសាងផ្លូវ ដាក់ភ្លើងបំភ្លឺទៅកាន់កំពង់ផែទេសចរណ៍ថ្មីនេះ ដើម្បីត្រៀមបម្រើដល់ការដឹកជញ្ជូនភ្ញៀវទេសចរ។

* ចំពោះផែនការបង្កើតឆ្នេរកំពតថ្មី លោក ថោង ខុន បានណែនាំឱ្យគិតគូរលើការរៀបចំចាក់ខ្សាច់ឱ្យបានច្រើន ត្រូវរៀបចំឱ្យមានសេវាកម្មមួយចំនួន ស្តង់ បង្គន់អនាម័យ ការពង្រឹងសុវត្ថិភាព ពិសេសត្រូវធានាបាននិរន្តរភាព។

* ត្រូវពង្រឹងគុណភាពសេវាដឹកជញ្ជូនទេសចរតាមផ្លូវទឹក ដូចជាត្រូវរៀបចំកំពង់ផែជិះទូកតាមព្រែកកំពតនេះប្រកបដោយសុវត្ថិភាព ត្រូវមានពោងសុវត្ថិភាពសម្រាប់ឱ្យទេសចរពាក់ពេលជិះទូកទេសចរណ៍។ ចំណែកកម្លាំងនគរបាលចរាចរណ៍ផ្លូវទឹកត្រូវពង្រឹងការងារនេះផងដែរ។

* លោកបានដាក់អនុសាសន៍ដល់អាជ្ញាធរ ត្រូវចុះពន្យល់ប្រាប់ម្ចាស់ភោជនីយដ្ឋាន-អាហារដ្ឋាន ឱ្យត្រូវដាក់បញ្ជីរាយនាមមុខម្ហូបអាហារ និងតារាងតម្លៃសេវារបស់ខ្លួន ត្រូវបន្តពង្រឹងអនាម័យ សេវាម្ហូបអាហារ ត្រូវគិតគូរដល់ការរៀបចំឱ្យមានបង្គន់អនាម័យស្អាត។ ចំណែកឯបញ្ហាក្រដាសធ្លាក់ក្រោមតុ គឺដាច់ខាតមិនត្រូវឱ្យមានតទៅទៀតឡើយ ត្រូវតែបន្តអនុវត្តយុទ្ធនាការ «គ្មានសំរាមក្រោមតុនៅតាមភោជនីយដ្ឋាន-អាហារដ្ឋាន» តទៅទៀត។

* ត្រូវបង្កើនការបណ្ដុះបណ្ដាលមគ្គុទ្ទេសក៍ទេសចរណ៍ និងត្រូវពង្រឹងសមត្ថភាពរបស់ពួកគេបន្ថែម ដើម្បីឆ្លើយតបនឹងកំណើនភ្ញៀវទេសចរ ដែលកំពុងងាកមកទស្សនាខេត្តកំពតកាន់តែច្រើន។

* រមណីយដ្ឋានទេសចរណ៍នានានៅក្នុងខេត្តកំពត ត្រូវពង្រឹងសេវាកម្មឱ្យបានល្អប្រសើរឡើងវិញ ត្រូវមានការគ្រប់គ្រងសំរាម សេវាលក់ដូរ ចំណតយានយន្តឱ្យបានត្រឹមត្រូវ។ លោក បានលើកឡើងថា ទីតាំងណាដែលពាក់ព័ន្ធប្រវត្តិសាស្ត្រ ឬរមណីយដ្ឋានប្រវត្តិសាស្ត្រ ស្នើខេត្តរៀបចំកំណត់ទីតាំងភូមិសាស្ត្រឡើងវិញ ដើម្បីការពារអភិរក្ស និងអភិវឌ្ឍន៍ឲ្យបានល្អ ដើម្បីស្នើសុំរាជរដ្ឋាភិបាលជាថ្មី តាមរយៈក្រសួងមានសមត្ថកិច្ច។

* ត្រូវបង្កើនការកសាងផ្លូវទៅកាន់រមណីយដ្ឋានសំខាន់មួយចំនួនក្នុងខេត្ត ដូចជារមណីយដ្ឋានភ្នំកំពង់ត្រាត ភ្នំឈ្ងោក រមណីយដ្ឋានចម្ការម្រេច នៅតំបន់កូនសត្វជាដើម។

* ត្រូវរៀបចំឱ្យមានសេវាកម្សាន្តឱ្យបានច្រើននៅលើភ្នំបូកគោ ពិសេសគឺការបោះតង់ទស្សនាកាឡាក់ស៊ីមីលគីវ៉េ (Galaxy Milki way) ពីព្រោះបូកគោជាគោលដៅទេសចរណ៍ដ៏ទាក់ទាញប្រចាំខេត្តកំពត ក៏ដូចជាប្រទេសកម្ពុជាផងដែរ។

* ត្រូវរៀបចំគោលដៅទេសចរណ៍ថ្មីនៅលើកោះសេះ ដែលមានវិសាលភាពជាង ៥០០ហិកតា ដោយត្រូវរៀបចំឱ្យមានការដឹកជញ្ជូនភ្ញៀវទេសចរ ការពារសុវត្ថិភាពជូនភ្ញៀវទេសចរ ត្រូវកៀរគរឱ្យមានការវិនិយោគលើកោះសេះនេះដើម្បីរៀបចំឱ្យមានកញ្ចប់ទស្សនកិច្ចថ្មីសម្រាប់ខេត្តកំពត។ លោកបានកោតសរសើរពីសក្ដានុពលទេសចរណ៍ដែលមាននៅលើកោះនេះ ពីព្រោះនៅជិតកោះត្រល់ ក្បែរព្រំដែនសមុទ្រជាមួយវៀតណាម។

* ត្រូវត្រួតពិនិត្យលើការការពារសន្តិសុខ សណ្ដាប់ធ្នាប់ ការបញ្ជៀសចរាចរណ៍នៅពេលបុណ្យសមុទ្រមកដល់ទីតាំងចំណតរបស់ភ្ញៀវ ហើយត្រូវត្រៀមកម្លាំងការពារសន្តិសុខ សណ្ដាប់ធ្នាប់ ពិសេសត្រូវគិតគូរពីការធ្វើដំណើររបស់ភ្ញៀវទេសចរឡើងទៅភ្នំបូកគោ។

លោក ថោង ខុន បានលើកឡើងថា រាល់ការវិនិយោគនៅតំបន់ទេសចរណ៍ទាំងអស់ ត្រូវមានប្លងគោល និងប្លង់មេអភិវឌ្ឍន៍ឱ្យបានច្បាស់លាស់ មិនអាចធ្វើដោយគ្មានការឆ្លងកាត់ការត្រួតពិនិត្យពីសំណាក់អាជ្ញាធរខេត្ត ឬរាជរដ្ឋាភិបាលនោះឡើយ ៕