អត្ថបទខ្លី៖ សារព័ត៌មាន The Wall Street Journal កំពុងបង្ខូចឈ្មោះកម្ពុជាទាំងកម្រោល
អត្ថបទខ្លី៖ សារព័ត៌មាន The Wall Street Journal កំពុងបង្ខូចឈ្មោះកម្ពុជាទាំងកម្រោល
ថ្មីៗនេះក្នុងសំណេរដ៏អាក្រក់បំផុត និងក្នុងគោលបំណងទុច្ចរិត ដែលសារព័ត៌មាន The Wall Street Journal បានសរសេរព័ត៌មានក្លែងក្លាយក្នុងចេតនាបង្ខូចឈ្មោះកម្ពុជាលើឆាកអន្តរជាតិ ហើយត្រូវបានជួយបន្ទរផ្សាយដោយសារព័ត៌មានវីអូអេ (VOA) ថា ប្រទេសចិនបានចុះហត្ថលេខាលើកិច្ចព្រមព្រៀងជាសម្ងាត់មួយ ដើម្បីអនុញ្ញាតឲ្យកងទ័ពរបស់ខ្លួន ប្រើប្រាស់មូលដ្ឋានទ័ពជើងទឹកកម្ពុជា។ កិច្ចព្រមព្រៀងនោះគឺកម្ពុជាផ្តល់ឲ្យភាគីចិននូវសិទ្ធិផ្តាច់មុខ ធ្វើជាមូលដ្ឋានទាហានជើងទឹកចិនជាផ្នែកមួយនៅឈូងសមុទ្រខ្មែរ ហើយនៅជិតព្រលានយន្តហោះធំមួយ ដែលកសាងដោយចិននឹងអនុញ្ញាតឲ្យចិនប្រើជាមូលដ្ឋានយោធារយៈពេល៣០ឆ្នាំ ដាក់ទ័ព ដាក់គ្រឿងសព្វាវុធ កន្លែងចតជាដើម»។ តើកម្ពុជាត្រូវការវត្តមានយោធាចិនលើទឹកដីរបស់ខ្លួនដើម្បីអ្វី? តើរដ្ឋធម្មនុញ្ញកម្ពុជាឆ្នាំ១៩៩៣ អនុញាតិឱ្យរាជរដ្ឋាភិបាលធ្វើដូច្នេះបានឬទេ? នោះគឺជាព័ត៌មានក្លែងក្លាយទាំងស្រុងនៅចំពោះមុខការពិតទាំងឡាយនៅកម្ពុជា?
ប្រតិកម្មឆ្លើយតបភ្លាមៗពីសំណាក់ប្រមុខរាជរដ្ឋាភិបាលកម្ពុជា លោក ហ៊ុន សែន នាព្រឹកថ្ងៃទី២២ ខែកក្កដា ឆ្នាំ២០១៩នេះ បានប្រកាសតាមបណ្តាញព័ត៌មាន Fresh News ថា ការផ្សព្វផ្សាយព័ត៌មានស្តីអំពីកម្ពុជាចុះហត្ថលេខាជាសម្ងាត់ជាមួយចិន ប្រើប្រាស់មូលដ្ឋានយោធា គឺ ជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា។ លោក នាយករដ្ឋមន្រ្តីបានថ្លែងបញ្ជាក់ច្បាស់ថា នេះជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា។ គ្មានរឿងបែបនេះកើតឡើងនោះទេ ព្រោះមូលដ្ឋានយោធា បរទេសវាបានប្រឆាំងនឹងរដ្ឋធម្មនុញ្ញរបស់កម្ពុជា។
ជាការពិត រដ្ឋធម្មនុញ្ញកម្ពុជា ឆ្នាំ១៩៩៣ មាត្រា៥៣ ចែងថា ព្រះរាជាណាចក្រកម្ពុជាប្រកាន់ខ្ជាប់ជានិច្ចនូវនយោបាយអព្យាក្រិតអចិន្រ្តៃយ៍ និង មិនចូលបក្សសម្ព័ន្ធ។ ព្រះរាជាណាចក្រកម្ពុជារួមរស់ដោយសន្តិសហវិជ្ជមានជាមួយប្រទេសជិតខាង និងប្រទេសដទៀតទាំងអស់នៅលើសកលលោក។ ព្រះរាជាណាចក្រកម្ពុជាមិនចងសម្ព័ន្ធយោធា ឬ ចូលក្នុងកិច្ចព្រមព្រៀងយោធាណាមួយ ដែលមិនស្របនឹងអន្យាក្រឹតភាពរបស់ខ្លួនឡើយ។ ព្រះរាជាណាចក្រកម្ពុជាមិនអនុញាតិឱ្យមានមូលដ្ឋានយោធាបរទេសនៅលើទឹកដីរបស់ខ្លួន ហើយក៏មិនអនុញាតឱ្យមានមូលដ្ឋានយោធារបស់ខ្លួននៅបរទេសដែរ លើកលែងតែក្នុងក្របខណ្ឌ នៃសំណូមពររបស់អង្កការសហប្រជាជាតិ។
ជារួម ការចុះផ្សាយរបស់សារព័ត៌មានរបស់ The Wall Street Journal ហើយត្រូវបានផ្សាយបន្ទរដោយសារព័ត៌មាន វីអូអេ គឺ ពិតជាការចុះផ្សាយមានលក្ខណមួលបង្កាច់ បំពុល បំភាន់ និង ក្នុងចេតនាអាក្រក់បំផុតប្រឆាមងនឹងកម្ពុជា និងធ្វើឱ្យកម្ពុជាមានឈ្មោះអាក្រក់លើឆាកអន្តរជាតិ។ ប្រជាជនកម្ពុជាពិតជាមានការសោកស្តាយនូវចេតនាទុច្ចរិតរបស់មហាអំណាចបរទេសមួយ ដែលមានបំណងយកកម្ពុជាធ្វើជាខែល ដើម្បីកេងចំណេញក្នុងជម្លោះនៃភូមិសាស្រ្តនយោបាយរបស់ខ្លួន ដែលបម្រើដល់ផលប្រយោជន៍ក្នុងតំបន់ជាយុទ្ធសាស្រ្ត នៃឥណ្ឌូប៉ាស៊ីហ្វីករបស់ខ្លួនដ៏គួរស្អប់ខ្ពើមបំផុត៕
ដោយ ឡុង បូរិតា
