ទស្សនៈមិត្តអ្នកអាន៖ កាសែត ដឺវ៉លស្ត្រីត ហ្សូណល (The Wall Street Journal) ល្មមឈប់ផ្សព្វផ្សាយព័ត៌មានក្លែងក្លាយទៅ!
ទស្សនៈមិត្តអ្នកអាន៖ កាសែត ដឺវ៉លស្ត្រីត ហ្សូណល (The Wall Street Journal) ល្មមឈប់ផ្សព្វផ្សាយព័ត៌មានក្លែងក្លាយទៅ!
កាលពីថ្ងៃទី២១ ខែកក្កដា ឆ្នាំ២០១៩ សារព័ត៌មាន ដឺវ៉លស្ត្រីត ហ្សូណល (The Wall Street Journal) បានសរសេរព័ត៌មានបង្កើតរឿងមិនពិតពីកម្ពុជា ដែលបានធ្វើឱ្យកាសែតបរទេសមួយនេះបាត់បង់អស់នូវតម្លៃខ្លួនជាសារព័ត៌មានដែលគួរឱ្យទុកចិត្តនោះ។ សំណេរលើកឡើងនូវរឿងដដែលៗអំពីបញ្ហាឥទ្ធិពលនៃមូលដ្ឋានយោធារបស់ចិននៅក្នុងប្រទេសកម្ពុជានេះ គឺជារឿងមួលបង្កាច់ព័ត៌មានសុទ្ធសាធ។ កាសែត The Wall Street Journal បានចុះផ្សាយបំភ្លៃព័ត៌មានដូច្នេះថា៖ «ប្រទេសចិនបានចុះហត្ថលេខាលើកិច្ចព្រមព្រៀងជាសម្ងាត់មួយដើម្បីអនុញ្ញាតឲ្យកងទ័ពរបស់ខ្លួន ប្រើប្រាស់មូលដ្ឋានទ័ពជើងទឹកកម្ពុជា។ កិច្ចព្រមព្រៀងនោះគឺកម្ពុជាផ្តល់ឲ្យភាគីចិននូវសិទ្ធិផ្តាច់មុខធ្វើជាមូលដ្ឋានទាហានជើងទឹកចិនជាផ្នែកមួយនៅឈូងសមុទ្រខ្មែរ ហើយនៅជិតព្រលានយន្តហោះធំមួយដែលកសាងដោយចិននឹងអនុញ្ញាតឲ្យចិនប្រើជាមូលដ្ឋានយោធារយៈពេល៣០ឆ្នាំ ដាក់ទ័ព ដាក់គ្រឿងសព្វាវុធ កន្លែងចតជាដើម» ។
តើការលើកឡើងបែបនេះ ពួកគេមានចេតនាអ្វីឱ្យពិតប្រាកដមកលើកម្ពុជា? ឬក៏ពួកគេគ្រាន់តែយកបញ្ហាវត្តមាននៃអ្នកវិនិយោគ និងអ្នកទេសចរណ៍ដ៏ច្រើនសន្ធឹកសន្ធាប់របស់ចិនធ្វើជាលេសដើម្បីមួលបង្កាច់ និងទម្លាក់កំហុសមកលើកម្ពុជា? វាជាការគួរឱ្យសោកស្តាយខ្លាំងណាស់ចំពោះជនបរទេសមួយចំនួនដែលបានព្យាយាមធ្វើអំពើអាក្រក់ម្តងហើយម្តងទៀតចំពោះប្រជាជនកម្ពុជា ដែលគ្មានកំហុសអ្វីទាល់តែសោះលើបញ្ហាដែលពួកគេបានចោទប្រកាន់ទាំងអស់នេះ។ កម្ពុជា គ្មានភាពចាំបាច់អនុញ្ញាតឱ្យប្រទេសណាមួយមកធ្វើសង្គ្រាម ឬសាកល្បងគ្រាប់កាំភ្លើងរបស់ពួកគេនៅលើប្រទេសរបស់ខ្លួននោះទេ។ គោលនយោបាយរបស់គណបក្សប្រជាជនកម្ពុជា ជាពិសេស ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន គឺមិនអនុញ្ញាតឱ្យបរទេសមកប្រយុទ្ធគ្នាលើទឹកដីកម្ពុជា ជាដាច់ខាត។ សូមពួកបរទេសមួយចំនួនតូចនោះកុំព្យាយាមយកកម្ពុជាធ្វើជាទីលានសាកល្បងមនោគមន៍វិជ្ជា និងជាទីលានសាកល្បងអាវុធឱ្យសោះ។ កម្ពុជាចាត់ទុកប្រទេសទាំងអស់នៅលើពិភពលោកគឺជាមិត្តភក្តិដែលត្រូវរួមសហការគ្នាក្នុងការអភិវឌ្ឍសេដ្ឋកិច្ច។ កម្ពុជា មានបំណងចង់ឱ្យមិត្តភក្តិបរទេសទាំងអស់អញ្ជើញមកប្រកួតប្រជែងគ្នាលើការអភិវឌ្ឍសេដ្ឋកិច្ច សង្គម ក្នុងទឹកដីកម្ពុជាតែប៉ុណ្ណោះ។ ផ្ទុយមកវិញកម្ពុជាសូមបដិសេធជាដាច់ខាតនូវការប្រកួតប្រជែងខាងផ្នែកមនោគមន៍វិជ្ជា និងភូមិសាស្ត្រនយោបាយក្នុងគោលបំណងបំបែកបំបាក់ និងសម្លាប់ខ្មែរដូចក្នុងទស្សវត្សន៍ឆ្នាំ៧០។
ជារួម សូមបងប្អូនប្រជាពលរដ្ឋខ្មែរទាំងនៅក្នុង និងក្រៅប្រទេស រួមទាំងមិត្តភក្តិបរទេសទាំងអស់ដែលបានទទួលនូវព័ត៌មានប្រឌិតនេះហើយមានកង្វល់ សូមជឿជាក់ និងទុកចិត្តចំពោះការដឹកនាំនិងការអនុវត្តនូវគោលនយោបាយរបស់រាជរដ្ឋាភិបាលដែលបានប្រកាន់នូវជំហរប្រកបដោយឯករាជ្យភាព បូរណភាពទឹកដី និងមិនចូលបក្សសម្ព័ន្ធ។ ជាច្រើនលើកច្រើនសារមកហើយ រាជរដ្ឋាភិបាលកម្ពុជា បានបញ្ជាក់ម្តងហើយម្តងទៀតថា ចាប់តាំងពីឆ្នាំ១៩៨៩មក កម្ពុជាគ្មានកងទ័ពប្រយុទ្ធបរទេសនៅលើទឹកដីកម្ពុជានោះទេ គឺមានតែតំណាងអនុព័ន្ធយោធាប្រចាំស្ថានទូតរបស់ប្រទេសជាមិត្តប៉ុណ្ណោះ។ ដូច្នេះព័ត៌មានដែលកាសែត ដឺវ៉លស្ត្រីត ហ្សូណល (The Wall Street Journal ) បានផ្សព្វផ្សាយនោះគឺជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា។ ពួកគេល្មមឈប់ប្រើព័ត៌មានក្លែងបន្លំអំពីវត្តមានកងទ័ពចិននៅលើទឹកដីកម្ពុជា ដើម្បីប្រឆាំងនិងភាពសុខដុមរមនានៃប្រជាជនកម្ពុជាតទៅទៀតទៅ៕
ដោយ៖ យី វិត (ប្រជាពលរដ្ឋនៅខេត្ត សៀមរាប)
