ឧត្តមសេនីយ៍ឯក ឌី វិជ្ជា ៖ ភ្នាក់ងារសន្តិសុខឯកជនបានចូលរួម ចំណែកយ៉ាងសកម្មក្នុងការថែរក្សាសន្តិសុខសណ្តាប់ធ្នាប់សង្គម
ឧត្តមសេនីយ៍ឯក ឌី វិជ្ជា ៖ ភ្នាក់ងារសន្តិសុខឯកជនបានចូលរួម ចំណែកយ៉ាងសកម្មក្នុងការថែរក្សាសន្តិសុខសណ្តាប់ធ្នាប់សង្គម
ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរង នគរបាលជាតិ និងជាប្រធាននាយកដ្ឋានកណ្ដាលសន្ដិសុខ បានមាន ប្រសាសន៍ថា ភ្នាក់ងារសន្តិសុខឯកជនបានចូលរួមចំណែកយ៉ាងសកម្ម ក្នុងការថែរក្សាសន្តិសុខសណ្តាប់ធ្នាប់សង្គម ហើយមិនតែប៉ុណ្ណោះ ពួកគាត់មានតួនាទីជាកម្លាំងជំនួយ ដ៏សំខាន់ដល់អាជ្ញាធរមានសមត្ថ កិច្ចផងដែរខណៈកងកម្លាំងសមត្ថកិច្ចមិនបានដាក់គ្រប់ទីកន្លែងនោះ ។
ការលើកឡើងរបស់ឯកឧត្តម ឧត្តមសេនីយ៍ឯក គឺបានធ្វើឡើងនៅក្នុង កម្មវិធីបើកវគ្គបណ្តុះបណ្តាលបំប៉នជំនាញភ្នាក់ងារសន្តិសុខឯកជនលើកទី២ នាថ្ងៃទី២១ ខែមីនា ឆ្នាំ២០១៨នេះ នៅសណ្ឋាគារឌីវិត ខណ្ឌសែនសុខរាជធានីភ្នំពេញដោយមានតំណាងក្រុមហ៊ុនសន្តិសុខ ឯកប្រមាណជិតពីររយនាក់ចូលរួម ។
ឯកឧត្តម ឧត្តមសេនីយ៍ឯក ឌី វិជ្ជា បានថ្លែងថា« ក្រុមហ៊ុនសន្តិសុខ ទាំងអស់ ត្រូវតែជ្រាបគ្រប់គ្នាថា សន្តិសុខឯកជនពុំមែនមានតួនាទី ត្រឹមតែជាអ្នកការពារទ្រព្យសម្បត្តិឯកជន ឬក៏សហគ្រាសគ្រឹះស្ថាន ឯកជនប៉ុណ្ណោះទេ តែក៏មានកាតព្វកិច្ចចូលរួមការពារសាធារណៈ សន្តិសុខសង្គម និងអាយុជីវិតរបស់ប្រជាពលរដ្ឋផងដែរ ជាពិសេស មានតួនាទីជាកម្លាំងជំនួយដ៏សំខាន់ដល់អាជ្ញាធរមានសមត្ថកិច្ច» ។
ឯកឧត្តមឧត្តមសេនីយ៍ឯកបានបន្តទៀតថា ព្រះរាជាណាចក្រកម្ពុជា មានការអភិវឌ្ឍន៍លើគ្រប់វិស័យក្រោមការដឹកនាំប្រកបដោយគតិបណ្ឌិត និងបញ្ញាញាណរបស់ប្រមុខរាជរដ្ឋាភិបាលធ្វើឲ្យប្រទេសជាតិទទួលបាន សុខសន្តិភាព ស្ថិរភាពសង្គម។ ហេតុនេះបានធ្វើឲ្យទាក់ទាញអ្នក វិនិយោគជាច្រើនមកបណ្តាក់ទុនស្ទើរគ្រប់វិស័យ ។ ក្នុងនោះវិស័យ សន្តិសុខឯកជន គឺជាវិស័យដ៏សំខាន់មួយដែលត្រូវចូលរួមចំណែក យ៉ាងសកម្មក្នុងការថែរក្សាសន្តិសុខ សណ្តាប់ធ្នាប់ ទ្រព្យសម្បត្តិ សុវត្ថិភាព អាយុជីវិត ជូនប្រជាពលរដ្ឋ អ្នកវិនិយោគ ភ្ញៀវទេស ចរណ៍ជាតិ អន្តរជាតិផង ។
ហេតុដូច្នេះហើយ ទើបរាជរដ្ឋាភិបាល ជាពិសេសក្រសួងមហាផ្ទៃ តែងតែយកចិត្តទុកដាក់ជម្រុញ និងលើកទឹកចិត្តដល់វិស័យសន្តិសុខ ឯកជន នៅក្នុងប្រទេសកម្ពុជាឲ្យទទួលបានទំនុកចិត្តក្នុងការប្រកប អាជីវកម្មរបស់ខ្លួនដោយសុខស្ថិរភាព និងនិត្យានុកូលភាព។
ជាក់ស្តែករាជរដ្ឋាភិបាលកម្ពុជា បានសម្រេចបង្កើតនាយកដ្ឋានគ្រប់ គ្រងសន្តិសុខឯកជន កាលពីឆ្នាំ២០១៦ កន្លងទៅនេះ គឺដើម្បីគ្រប់គ្រង គាំពារសហការ និងផ្តល់និត្យានុកូលភាពដល់ក្រុមហ៊ុនផ្តល់សេវា សន្តិសុខឯកជន និងសហគ្រាសគ្រឹះស្ថាន ដែលប្រើប្រាស់សន្តិសុខ ឯកជនទូទាំងព្រះរាជាណាចក្រកម្ពុជា ។
ឯកឧត្តមបានបន្តទៀតថា ស្តែងចេញពីការយកចិត្តទុកដាក់នេះហើយ ទើបធ្វើឲ្យយើងទាំងអស់គ្នាបានជួបជុំគ្នានៅទីនេះ ក្នុងពិធីបើកវគ្គបំប៉ន ជំនាញភ្នាក់ងារសន្តិសុខឯកជននាឱកាសនេះ ។ ដោយយោងតាមស្មារតី សេចក្តីណែនាំរបស់ក្រសួងមហាផ្ទៃ និងពិនិត្យឃើញថាភ្នាក់ងារសន្តិសុខ ឯកជនបានចូលរួមចំណែកយ៉ាងសកម្មក្នុងការថែរក្សាសន្តិសុខសណ្តាប់ ធ្នាប់ ទ្រព្យសម្បត្តិ សុវត្ថិភាព អាយុជីវិត ជូនប្រជាពករដ្ឋ អ្នកវិនិយោគ ភ្ញៀវទេសចរណ៍ជាតិ អន្តរជាតិ ។
ឯកឧត្តមបានបន្តទៀតថា ការបើកវគ្គបណ្តុះបណ្តាលនេះគឺមិនមែន មើលងាយសមត្ថភាពដល់បងប្អូនដែលជាសន្តិសុខឯកជននោះទេ គឺ ធ្វើឡើងដើម្បីបង្កើនសមត្ថភាពដល់ពួកគាត់បន្ថែមទៀត ទាំងជំនាញ ការពារ និងគ្រប់គ្រងស្ថានភាពផ្សេងៗ ដែលកើតឡើងជាយថាហេតុ ណាមួយ ។
ក្នុងនោះដែរ ឯកឧត្តម ឧត្តមសេនីយ៍ឯក លឹម សុខារស្មី ប្រធាន នាយកដ្ឋានគ្រប់គ្រងសន្តិសុខឯកជនបានបញ្ជាក់ដែរថា វគ្គបំប៉ន ជំនាញភា្នក់ងារសន្តិសុខឯកជនលើកទី២នេះ មានសិក្ខាកាមចូលរួម ១៨៥នាក់ មកពីក្រុមហ៊ុនសន្តិសុខឯកជនផ្ដល់សេវាកម្ម ៤៤ក្រុមហ៊ុន មកពីសហគ្រឹះស្ថាន ១៧គ្រឹះស្ថាន ។
សូមរំលឹកថា សន្តិសុខឯកជនទាំងអស់នៅទូទាំងប្រទេសកម្ពុជា គឺមានចំនួនជាងបីម៉ឺននាក់មកពីក្រុមហ៊ុនប្រមាណជាងពីររយក្រុមហ៊ុនហើយពួកគេ នឹងទទួលបានវគ្គបណ្តុះបណ្តាលជាបន្តបន្ទាប់ទៀតពី អគ្គស្នងការដ្ឋាននគរបាលជាតិដើម្បីចូលរួមរក្សាសន្តិសុខសណ្តាប់ធ្នាប់ ជាមួយនិងកងកម្លាំងនគរបាល ៕
