ខ្មែរប៉ុស្ដិ៍ Close

រដ្ឋមន្ត្រីការពារប្រទេសឡាវ ថ្លែងថាកម្ពុជាគឺជាប្រទេសមួយដែលមានភាពស្រស់ស្អាត និងមានការអភិវឌ្ឍរីកចម្រើនយ៉ាងឆាប់រហ័ស

ដោយ៖ សន ប្រាថ្នា ​​ | ថ្ងៃសៅរ៍ ទី២៩ ខែធ្នូ ឆ្នាំ២០១៨ ព័ត៌មានទូទៅ 1815
រដ្ឋមន្ត្រីការពារប្រទេសឡាវ ថ្លែងថាកម្ពុជាគឺជាប្រទេសមួយដែលមានភាពស្រស់ស្អាត និងមានការអភិវឌ្ឍរីកចម្រើនយ៉ាងឆាប់រហ័សរដ្ឋមន្ត្រីការពារប្រទេសឡាវ ថ្លែងថាកម្ពុជាគឺជាប្រទេសមួយដែលមានភាពស្រស់ស្អាត និងមានការអភិវឌ្ឍរីកចម្រើនយ៉ាងឆាប់រហ័ស

បន្ទាប់ពីបានជួបពិភាក្សាការងារជាមួយលេខាធិការប្រតិបត្តិនៃអង្គការអ្នកនិយមកណ្ដាលអន្តរជាតិរួចហើយ លោកនាយករដ្ឋមន្រ្តី ហ៊ុន សែន បានជួបពិភាក្សាការងារជាមួយលោក ចាន់ សាម៉ន ចាន់ញ៉ាឡាត រដ្ឋមន្ត្រីការពារប្រទេសឡាវ ជាបន្តទៀត។ ក្នុងជំនួបនោះ លោក ចាន់ សាម៉ន ចាន់ញ៉ាឡាត បានគោរពពាំនាំនូវការសាកសួរសុខទុក្ខពីថ្នាក់ដឹកនាំឡាវ ចំពោះលោកនាយករដ្ឋមន្រ្តី ហ៊ុន សែន ហើយក៏បានវាយតម្លៃខ្ពស់ចំពោះដំណើរការវិវត្តន៍ និងការអភិវឌ្ឍរបស់កម្ពុជា។ លោកបានមានប្រសាសន៍ថា កម្ពុជាគឺជាប្រទេសមួយដែលមានភាពស្រស់ស្អាត ហើយក៏មានការរីកចម្រើនអភិវឌ្ឍន៍យ៉ាងលឿនយ៉ាងឆាប់រហ័សផងដែរ។

លើសពីនេះទៅទៀត លោក ក៏បានគោរពជម្រាបជូនពីជំនួបលោកផ្ទាល់ជាមួយនឹងលោកឧបនាយករដ្ឋមន្រ្តី ទៀ បាញ់ ទាក់ទងទៅនឹងកិច្ចសហប្រតិបត្តិការរវាងក្រសួងការពារជាតិប្រទេសឡាវ និងក្រសួងការពារជាតិកម្ពុជា ដែលសង្កត់ធ្ងន់ទៅលើការហ្វឹកហាត់ និងការផ្លាស់ប្តូរទស្សនកិច្ចរវាងគ្នានិងគ្នា និងការផ្លាស់ប្តូរព័ត៌មានរវាងគ្នាទៅវិញទៅមក។ លើសពីនេះទៅទៀតលោកក៏បានគោរពនូវការអបអរសាទរចំពោះខួបនៃការបញ្ចប់សង្គ្រាមរបស់ប្រទេសកម្ពុជា និងការដាក់សម្ពោធវិមានឈ្នះឈ្នះនៅថ្ងៃស្អែកនេះ។

ជាការឆ្លើយតប លោកនាយករដ្ឋមន្ត្រី ហ៊ុន សែន ក៏បានវាយតម្លៃខ្ពស់ចំពោះកិច្ចសន្ទនារវាងលោក ចាន់ សាម៉ន ចាន់ញ៉ាឡាត និងលោកឧបនាយករដ្ឋមន្រ្តី ទៀ បាញ់ ហើយក៏បានស្នើសុំឱ្យជំរុញបន្ថែមទៀតនូវកិច្ចសហប្រតិបត្តិការរវាងកងទ័ព និងកងទ័ព រវាងប្រជាជន និងប្រជាជនព្រោះថានេះគឺជាកត្តាសំខាន់ក្នុងការអភិវឌ្ឍសង្គម។

លោកនាយករដ្ឋមន្រ្តី ហ៊ុន សែន ក៏បានជម្រាបលោករដ្ឋមន្ត្រីការពារប្រទេសឡាវផងដែរ អំពីដំណើរការនៃការបញ្ចប់សង្គ្រាម តាមរយៈការដាក់ចេញនូវនយោបាយឈ្នះឈ្នះនេះ ក៏ដូចជាការចុះចូលនៃអតីតមេដឹកនាំខ្មែរក្រហមនៅផ្ទះរបស់លោក ហើយលោកបានកំណត់យកថ្ងៃទី២៩ ខែធ្នូ ជាខួបនៃការបញ្ចប់សង្គ្រាម ដែលធ្វើឲ្យប្រទេសជាតិទទួលបានការបង្រួបបង្រួមជាតិ មានសុខសន្តិភាព និងមានការអភិវឌ្ឍរីកចំរើនរហូតដល់សព្វថ្ងៃនេះ៕

អត្ថបទទាក់ទង