រដ្ឋមន្រ្ដីក្រសួងពាណិជ្ជកម្ម៖ កម្ពុជាកំពុងចាប់ដៃគូពង្រីកទីផ្សារជាមួយរុស្ស៊ី ក្នុងការនាំចេញសម្លៀកបំពាក់សម្រាប់រដូវរងារ ឬអាវធំ
រដ្ឋមន្រ្ដីក្រសួងពាណិជ្ជកម្ម៖ កម្ពុជាកំពុងចាប់ដៃគូពង្រីកទីផ្សារជាមួយរុស្ស៊ី ក្នុងការនាំចេញសម្លៀកបំពាក់សម្រាប់រដូវរងារ ឬអាវធំ
រដ្ឋមន្រ្ដីក្រសួងពាណិជ្ជកម្មបានអះអាងថា ក្រៅពីទីផ្សារការនាំចេញសម្លៀកបំពាក់ទៅកាន់ សហភាពអឺរុប និងសហរដ្ឋអាមេរិកនោះ កម្ពុជាកំពុងតែចាប់ដៃគូជាមួយប្រទេសរុស្ស៊ី ដោយផ្ដោតសំខាន់ទៅលើសម្លៀកបំពាក់សម្រាប់រដូវរងារ អាវរោមសត្វ ឬអាវធំ ដែលជាសក្ដានុពល ក្នុងការពង្រីកទីផ្សារធំក្នុងការនាំចេញសម្លៀកបំពាក់ពីកម្ពុជា។
ក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ២០១៨ និងទិសដៅអនុវត្តន៍ការងារពាណិជ្ជកម្មឆ្នាំ២០១៩ កាលពីព្រឹកថ្ងៃទី២៤ ខែធ្នូ ឆ្នាំ២០១៨ នៅទីស្ដីការក្រសួងពាណិជ្ជកម្ម លោក ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម បានមានប្រសាសន៍ថា រាជរដ្ឋាភិបាលកម្ពុជា បានចាប់ដៃគូលើកិច្ចព្រមព្រៀងពាណិជ្ជកម្មអឺរ៉ុប-អាស៊ី ក្នុងនោះ គឺផ្ដោតជាមួយប្រទេសរុស្ស៊ី បន្ទាប់ពីចរចាររួចរាល់ហើយ កម្ពុជានឹងបើកទីផ្សារសម្លៀកបំពាក់សម្រាប់រដូវរងារទៅកាន់ប្រទេសរុស្ស៊ី ដែលជាសក្ដានុពលក៏ដូចជាកាលានុវត្ដភាពរបស់កម្ពុជាផងដែរ។ លោកបានបញ្ជាក់ថា បន្ទាប់ពីទីផ្សាររុស្ស៊ី កម្ពុជាគឺសមាជិកនៃកិច្ចព្រមព្រៀងពាណិជ្ជកម្មគ្រប់ជ្រុងជ្រោយ ដែលអាចចរចាចប់នៅឆ្នាំ២០១៩ខាងមុខនេះ ហើយនេះគឺជាទីផ្សារធំ មានមនុស្សជាងពាក់កណ្ដាលពិភពលោក ដែលកម្ពុជាមានឱកាសនាំចេញទៅកាន់ប្រទេស ផ្សេងៗជាច្រើនទៀតដូចជាប្រទេសចិន ឥណ្ឌា កូរ៉េខាងត្បូង ជប៉ុន អូស្រ្ដាលី និងប្រទេស ណូវែលសេឡង់។ លោករំពឹងថា ក្នុងឆ្នាំ២០១៩ខាងមុខ កម្ពុជានឹងមានភាពប្រកួតប្រជែង និងធ្វើការនាំចេញនូវផលិតផលបានច្រើន ជាពិសេសការនាំចេញសម្លៀកបំពាក់សម្រាប់រដូវរងារ ដែលរហូតមកដល់ពេលនេះ កម្ពុជាកំពុងចរចាបន្ដខិតខំជំរុញតាមនីតិវិធី និងយន្ដការនៃ ការសម្របសម្រួលទៅតាមប្រទេសនីមួយៗ។
លោករដ្ឋមន្រ្ដីបានបន្ដថា បច្ចុប្បន្ននេះ ការនាំចេញផលិតផលសម្រេចរបស់កម្ពុជា មិនទាន់មានអ្វីដែលធ្វើឱ្យប៉ះពាល់នោះទេ ដែលការវិនិយោគមកពីបរទេសគឺនៅតែមានច្រើន ជាពិសេសប្រទេសចិន ដែលបានមកវិនិយោគធ្វើរោងចក្រកែច្នៃដំឡូងមី រោងចក្រកែច្នៃមៀន ការបង្កើតរោងចក្រផលិតកាបូបជាដើម ដែលនេះជាសញ្ញាល្អក្នុងវិស័យសេដ្ឋកិច្ច ក៏ដូចជាការ ធ្វើពាណិជ្ជកម្មនៅកម្ពុជា។
ជាមួយគ្នានេះដែរ ក្រសួងពាណិជ្ជកម្មសម្រេចបាននូវកិច្ចការកែទម្រង់ស៊ីជម្រៅ លើវិស័យជាច្រើនដូចជា ការពង្រឹងអភិបាលកិច្ចល្អ ការផ្តល់សេវាសាធារណៈតាមប្រព័ន្ធស្វ័យប្រវត្តិកម្ម ការកសាង និងវិសោធនកម្មលិខិតបទដ្ឋានច្បាប់ជាច្រើន ការដាក់ចេញនូវគោលនយោបាយពាណិជ្ជកម្មក្នុងប្រទេស ដើម្បីទ្រទ្រង់ថ្លៃកសិផល ការពារសុវត្ថិភាពម្ហូបអាហារ ការពង្រីកកូតានាំចេញ អង្ករបន្ថែមទៅកាន់ទីផ្សារចិន និងទីផ្សារដទៃទៀត ការបើកច្រកទីផ្សារក្រៅប្រទេស តាមរយៈចុះកិច្ចព្រមព្រៀងពាណិជ្ជកម្មសេរីជាលកុ្ខណៈទ្វេភាគី និងពហុភាគីជាដើម។
យោងតាមរបាយការណ៍ក្រសួងពាណិជ្ជកម្មបានឱ្យដឹងថា ការនាំចេញរបស់កម្ពុជា មានកំណើនប្រមាណ១០ភាគរយ ក្នុងឆ្នាំ២០១៨ ដែលកំណើននេះទទួលបានពីការបន្តកើនឡើងនៃវិស័យកាត់ដេរ និងការនាំចេញផលិតផលកសិកម្ម និងឧស្សាហកម្ម តាមរយៈការខិតខំបើកច្រកទីផ្សារ នាំចេញទៅកាន់ជាង ១៤៧ប្រទេស នៅទូទាំងពិភពលោក។ ចំពោះការនាំចេញនេះ មានទំហំប្រមាណជា ៦០ភាគរយ នៃផលិតផលក្នុងស្រុកសរុបរបស់ កម្ពុជា៕
