ខ្មែរប៉ុស្ដិ៍ Close

ក្រសួងបរិស្ថាន ផ្ដល់ពូជជ្រូកជនជាតិចំនួន ៥៤ក្បាល ​ជូនសហគមន៍តំបន់ការពារធម្មជាតិ នៃដែនជម្រកសត្វព្រៃភ្នំណាមលៀរ ក្នុងខេត្ដមណ្ឌលគិរី

ដោយ៖ សន ប្រាថ្នា ​​ | ថ្ងៃអង្គារ ទី២០ ខែវិច្ឆិកា ឆ្នាំ២០១៨ ព័ត៌មានទូទៅ 1658
ក្រសួងបរិស្ថាន ផ្ដល់ពូជជ្រូកជនជាតិចំនួន ៥៤ក្បាល ​ជូនសហគមន៍តំបន់ការពារធម្មជាតិ នៃដែនជម្រកសត្វព្រៃភ្នំណាមលៀរ ក្នុងខេត្ដមណ្ឌលគិរីក្រសួងបរិស្ថាន ផ្ដល់ពូជជ្រូកជនជាតិចំនួន ៥៤ក្បាល ​ជូនសហគមន៍តំបន់ការពារធម្មជាតិ នៃដែនជម្រកសត្វព្រៃភ្នំណាមលៀរ ក្នុងខេត្ដមណ្ឌលគិរី

សហគមន៍តំបន់ការពារធម្មជាតិ (CPA) នៃដែនជម្រកសត្វព្រៃភ្នំណាមលៀរ កាលពីថ្ងៃទី១៩ ខែវិច្ឆិកា ឆ្នាំ២០១៨នេះ បានទទួលពូជជ្រូកជនជាតិ ឬជ្រូកកណ្ដុរចំនួន៥៤ក្បាល និងសត្វមាន់ដល់ប្រជាសហគមន៍១១គ្រួសារ ចំនួន១១០ក្បាល ព្រមទាំងសម្ភារកសិកម្មពីគម្រោងរបស់អគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន ដើម្បីជួយលើកស្ទួយប្រាក់ចំណូលប្រចាំថ្ងៃ និងកម្រិតជីវភាពរស់នៅរបស់ប្រជាសហគមន៍។

លោក រ័ត្ន វិរៈ អនុរដ្ឋលេខាធិការក្រសួងបរិស្ថាន បានមានប្រសាសន៍ថា ក្រសួងបរិស្ថាន បានរៀបចំគម្រោងចិញ្ចឹមជ្រូកជនជាតិ ឬជ្រូកកណ្ដុរនៅក្នុងដែនជម្រកសត្វព្រៃភ្នំណាមលៀរ ដើម្បីផ្ដល់ជូនដល់ប្រជាសហគមន៍យកទៅចិញ្ចឹមជាលក្ខណៈគ្រួសារ និងប្រពៃណី សំដៅជួយលើកកម្ពស់កម្រិតជីវភាពរស់នៅប្រចាំថ្ងៃ។ លោកបានបន្ដថា ការផ្ដល់ជូនពូជជ្រូក មាន់ និងសម្ភារកសិកម្មនេះ គឺជាការឆ្លើយតបតម្រូវការរស់នៅប្រចាំថ្ងៃរបស់សហគមន៍ ហើយក្រសួងបរិស្ថាន តាមរយៈអគ្គនាយកដ្ឋានសហគមន៍មូលដ្ឋាន ក៏បានរៀបចំវគ្គបណ្ដុះ​បណ្ដាលទៅលើបច្ចេកទេសចិញ្ចឹមស្ដីពីផលិតកម្មជ្រូកផងដែរ។

លោក ឈឹម កាន អភិបាលរង នៃគណៈអភិបាលខេត្តមណ្ឌលគិរី បានឱ្យដឹងថា តាងនាមគណៈអភិបាលខេត្តមណ្ឌលគិរី សូមសម្ដែងនូវក្ដីរីករាយចំពោះគម្រោងចិញ្ចឹម និងការ ផ្ដល់ពូជជ្រូកជនជាតិ និងមាន់ ដើម្បីឱ្យប្រជាសហគមន៍តំបន់ការពារធម្មជាតិ ក្នុងដែន ជម្រកសត្វព្រៃភ្នំណាមលៀរ យកទៅចិញ្ចឹមជាលក្ខណៈគ្រួសារ និងដើម្បីបង្កើនប្រាក់​ចំណូល។ លោកអភិបាលរងខេត្ដបានជំរុញឱ្យប្រជាសហគមន៍ដែលទទួលបាន​ពូជជ្រូកជនជាតិ និងមាន់ ត្រូវខិតខំថែរក្សាជ្រូកតាមការណែនាំ និងបច្ចេកទេសឱ្យ​បានល្អ។ លោកក៏បានណែនាំដល់ប្រជាសហគមន៍ត្រូវចូលរួមថែរក្សា អភិរក្សធនធាន​ធម្មជាតិ វប្បធម៌ និងប្រពៃណីរបស់បងប្អូនជនជាតិដើមភាគតិច ដើម្បីទាក់ទាញវិស័យទេស​ចរណ៍ដ៏មានសក្ដានុពលនៅក្នុងខេត្តមណ្ឌលគិរីនេះ។

បើតាមការបញ្ជាក់របស់លោក ខៀវ បូរិន អគ្គនាយកនៃអគ្គនាយកដ្ឋានសហគមន៍ មូលដ្ឋាននៃក្រសួងបរិស្ថាន​បានលើកឡើងផងដែរថា អគ្គនាយកដ្ឋានមូលដ្ឋាន បានអនុវត្តគម្រោងលើកកម្ពស់​ជីវភាពសហគមន៍តំបន់ការពារធម្មជាតិ ដើម្បីបង្កើនប្រាក់ចំណូល និងពង្រីកមុខរបរប្រជាសហគមន៍តំបន់​ការពារធម្មជាតិ សំដៅកាត់បន្ថយសម្ពាធនៃការប្រើប្រាស់ធនធានធម្មជាតិ និងចូលរួមចំណែកក្នុងការអភិរក្សជីវៈចម្រុះ៕

អត្ថបទទាក់ទង