តើកាំភ្លើងទំនើបទាំង៣៥ដើម ដែលបម្រុងនាំទៅវៀតណាមជាប្រភេទអ្វីខ្លះ?
តើកាំភ្លើងទំនើបទាំង៣៥ដើម ដែលបម្រុងនាំទៅវៀតណាមជាប្រភេទអ្វីខ្លះ?កាំភ្លើងទំនើបចំនួន ៣៥ដើម ដែលបង្កប់នៅក្នុងទំនិញ បម្រុងនាំចេញទៅប្រទេសវៀតណាម ត្រូវបានកម្លាំងគយ និងរដ្ឋាករ សហការជាមួយប៉េអឹមលើផ្ទៃប្រទេស ធ្វើការបង្ក្រាប និងឃាត់ខ្លួនមនុស្សពីរ នៅចំណុចភូមិក្រវៀនជើង ឃុំជាំក្រវៀន ស្រុកមេមត់ ខេត្តត្បូងឃ្មុំ កាលពីថ្ងៃទី២៨ ខែតុលា ឆ្នាំ២០១៨។
កាំភ្លើងទាំង៣៥ដើម មានប្រភេទដូចជា៖
១- RETAY, G19C ប្រភេទប្រើគ្រាប់ពិត bol ជ័រចំនួន ០៣ដើម។
២- SENTETIEN F99T ប្រភេទប្រើគ្រាប់ពិត bol ជ័រចំនួន ០៥ដើម។
៣- GAMOPT85 ប្រភេទប្រើហ្គាសគ្រាប់ជ័រចំនួន ០៣ដើម។
៤- SMETWESSON, P9C ប្រភេទប្រើហ្គាសគ្រាប់ជ័រចំនួន ០៥ដើម។
៥- ZORAKI, 914 ប្រភេទប្រើហ្គាសគ្រាប់ជ័រ ០៥ដើម។
៦- WALTHER, CP99 ប្រភេទប្រើហ្គាសគ្រាប់ជ័រចំនួន ០៣ដើម។
៧- M84 ប្រភេទប្រើហ្គាសគ្រាប់ជ័រចំនួន ០៨ដើម។
៨- RETAY, P114 ប្រភេទប្រើហ្គាសគ្រាប់ជ័រចំនួន ០៣ដើម។
ជនសង្ស័យដែលឃាត់ខ្លួនមានដូចជា៖
១- ឈ្មោះ ប៉ែន អឿមសុង ភេទប្រុស អាយុ២៩ឆ្នាំ រស់នៅភូមិធម្មយុទ្ធ ឃុំផ្អេស្រុកកំពង់ឆ្នាំង ខេត្តកំពង់ឆ្នាំង។
២- ឈ្មោះ ជួន ចាន់ ភេទប្រុស អាយុ២៦ឆ្នាំ រស់នៅភូមិធ្លក សង្កាត់សួង ក្រុងសួង ខេត្តត្បូងឃ្មុំ។
វត្ថុតាំង និងជនសង្ស័យទាំងពីរនាក់ ត្រូវបាននាំខ្លួនទៅកាន់ទីបញ្ជាការដ្ឋានកងរាជអាវុធហត្ថខេត្តត្បូងឃ្មុំដើម្បីចាត់ការតាមនីតិវិធី។
តាមការឆ្លើយសារភាពរបស់ជនសង្ស័យបានឲ្យដឹងថា កាំភ្លើងទាំងនេះខ្លួនបានសាងពីរថយន្តមួយគ្រឿងផ្សេងទៀតនៅផ្សារអូឡាំពិក លាយឡំជាមួយទំនិញចម្រុះ ដោយមិនបានដឹងថា ជាអាវុធទេ។ ហើយទំនិញដែលដឹកនោះ គឺខ្លួនដឹកចេញទៅប្រទេសវៀតណាម តាមច្រកទន្លេចាម បានចំនួន៤ជើងហើយ ក៏ត្រូវសមត្ថកិច្ចគយចាប់ឃាត់តែម្តង។
ពាក់ព័ន្ធនឹងករណីនេះដែរ កាលពីថ្ងៃទី២៥ ខែតុលា ឆ្នាំ២០១៨ កម្លាំងគយស្រុកអារញ្ញ ខេត្តស្រះកែវ ជាប់ព្រំដែនកម្ពុជា បានរកឃើញកាំភ្លើងចំនួន ១៨ដើម ដែលដាក់ក្នុងកេសក្រដាសបង្កប់ក្រោមផ្កា ដើម្បីនាំចូលមកកម្ពុជា។ ប៉ុន្តែសមត្ថកិច្ចថៃ មិនបានបង្ហាញអំពីអត្តសញ្ញាណអ្នកដែលពាក់ព័ន្ធនោះទេ។
បើតាមសមត្ថកិច្ចកម្ពុជានៅច្រកព្រំដែនបានឲ្យដឹងថា កាំភ្លើងទាំង ១៨ដើម ដែលគយថៃចាប់ គឺជាប្រភេទកាំភ្លើងដូចទៅនឹងកាំភ្លើងដែលគយ និងរដ្ឋាករកម្ពុជា ចាប់បានចំនួន ៣៥ដើមនៅចំណុចភូមិក្រវៀនជើង ឃុំជាំក្រវៀន ស្រុកមេមត់ ខេត្តត្បូងឃ្មុំ កាលពីល្ងាចថ្ងៃទី២៨ ខែតុលា ឆ្នាំ២០១៨៕
ប្រភព៖ ខ្លីៗ
