នៅដើមខែតុលានេះ លោកនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំកំពូលមេគង្គ-ជប៉ុនលើកទី១០ នៅទីក្រុងតូក្យូ

ដោយ៖ រៀម វណ្ណា​​ | ថ្ងៃសុក្រ ទី២១ ខែកញ្ញា ឆ្នាំ២០១៨​ | ព័ត៌មានទូទៅ |
នៅដើមខែតុលានេះ លោកនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំកំពូលមេគង្គ-ជប៉ុនលើកទី១០ នៅទីក្រុងតូក្យូ នៅដើមខែតុលានេះ លោកនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំកំពូលមេគង្គ-ជប៉ុនលើកទី១០ នៅទីក្រុងតូក្យូ

លោកនាយករដ្ឋមន្ត្រី​ ហ៊ុន សែន ​នឹងអញ្ជើញចូលរួមក្នុងកិច្ចប្រជុំកំពូលមេគង្គ-ជប៉ុនលើកទី១០ នៅទីក្រុងតូក្យូ ប្រទេសជប៉ុន ដែលនឹងរៀបចំឡើងនាដើមខែតុលាខាងមុខនេះ។ នេះបើតាមសេចក្តីប្រកាសព័ត៌មាន ស្ដីពីលទ្ធផលនៃដំណើរទស្សនកិច្ចនៅប្រទេសជប៉ុនរបស់លោក​ ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ។

ឧបនាយករដ្ឋមន្ត្រី ប្រាក់ សុខុន បានបំពេញទស្សនកិច្ចរយៈពេល២ថ្ងៃ នៅប្រទេសជប៉ុន ចាប់ពីថ្ងៃទី១៨-១៩ ខែកញ្ញា ឆ្នាំ២០១៨ តាមការអញ្ជើញរបស់លោក តារ៉ូ កូណូ រដ្ឋមន្ត្រីការបរទេសជប៉ុន។

ដំណើរទស្សនកិច្ចនេះ រួមជាមួយនឹងដំណើរទស្សនកិច្ចរបស់លោក តារ៉ូ កូណូ មកកាន់ប្រទេសកម្ពុជាកាលពីខែមេសា កន្លងទៅ មានគោលបំណងជំរុញទំនាក់ទំនងជិតស្និទ្ធ និងភាពជាដៃគូនៃកិច្ចសហប្រតិបត្តិការ ឱ្យកាន់តែខ្លាំងក្លាថែមទៀតរវាងកម្ពុជា និងជប៉ុន ស្របពេលដែលឆ្នាំនេះប្រទេសទាំងពីរកំពុងប្រារព្ធខួបលើកទី ៦៥ឆ្នាំ នៃការបង្កើតទំនាក់ទំនងការទូត។

ក្នុងអំឡុងពេលទស្សនកិច្ចនោះ ឧបនាយករដ្ឋមន្រ្តីកម្ពុជា បានជួបពិភាក្សាប្រកបដោយមិត្តភាពជាមួយសមភាគីជប៉ុន ដែលក្នុងឱកាសនោះ លោក ប្រាក់ សុខុន បានពាំនាំការថ្លែងអំណរគុណរបស់លោកនាយករដ្ឋមន្ត្រី​ ហ៊ុន សែន ជូនចំពោះលោក ស៊ីនហ្សូ អាបេ នាយករដ្ឋមន្ត្រីជប៉ុន ដែលបានផ្ញើលិខិតអបអរសាទរជូនលោកនាយករដ្ឋមន្ត្រី​ បន្ទាប់ពីត្រូវបានតែងតាំងជានាយករដ្ឋមន្ត្រីនៃកម្ពុជា ជាថ្មីម្តងទៀត ក្រោយការបោះឆ្នោតទូទៅប្រកបដោយជោគជ័យ នាពេលថ្មីៗនេះ។

សេចក្ដីប្រកាសខាងលើបានឱ្យដឹងថា ក្នុងកិច្ចប្រជុំនោះ ឧបនាយករដ្ឋមន្រ្តី ប្រាក់ សុខុន ក៏បានបញ្ជាក់ពីការចូលរួមរបស់លោក​នាយករដ្ឋមន្រ្តី ហ៊ុន សែន ក្នុងកិច្ចប្រជុំកំពូលមេគង្គ-ជប៉ុនលើកទី១០ ដែលនឹងរៀបចំឡើងនៅដើមខែក្រោយនេះ នៅទីក្រុងតូក្យូ ហើយក៏បានពិភាក្សាជាមួយលោក កូណូ អំពីរបៀបវារៈនៃកិច្ចប្រជុំកំពូលនេះផងដែរ៕

 

បញ្ចេញមតិ
ពាក្យគន្លឹះទាក់ទង
អត្ថបទទាក់ទង