Jack Ma ថា អាមេរិក និងចិន អាចនឹងបង្កសង្រ្គាមពាណិជ្ជកម្មរយៈពេលយូរ
Jack Ma ថា អាមេរិក និងចិន អាចនឹងបង្កសង្រ្គាមពាណិជ្ជកម្មរយៈពេលយូរ
មហាសេដ្ឋី Jack Ma បានប្រាប់អ្នកវិនិយោគថា ជម្លោះពាណិជ្ជកម្មរវាងប្រទេសចិន-អាមេរិក អាចមានរយៈពេលដល់ទៅ២០ឆ្នាំ និងធ្វើឱ្យប៉ះពាល់ខ្លាំងជាងអ្វីដែលគេធ្លាប់គិត។
“វានឹងមានរយៈពេលវែង។ វានឹងក្លាយជាភាពរញ៉េរញ៉ៃ។ មិនមែន២០ខែ ឬ ២០ថ្ងៃ ប៉ុន្តែអាច ២០ឆ្នាំ”។ ការលើកឡើងនេះ ធ្វើឡើងក្នុងសន្និសីទប្រចាំឆ្នាំសម្រាប់វិនិយោគិន Alibaba កាលពីថ្ងៃអង្គារ ប៉ុន្មានម៉ោងក្រោយផែនការយកពន្ធលើទំនិញចិន ដែលមានតម្លៃប្រមាណ ២០០ ពាន់លានដុល្លារ របស់រដ្ឋបាលលោកប្រធានាធិបតីអាមេរិក ដូណាល់ ត្រាំ។
លោក Ma បន្ថែមថា កំណើនភាពតានតឹងនៃសង្គ្រាមពាណិជ្ជកម្មនេះ ក៏នឹងធ្វើឱ្យប៉ះពាល់ដល់ក្រុមហ៊ុនលក់ទំនិញអនឡានយក្ស Alibaba ផងដែរ។ ជាក់ស្ដែងភាគហ៊ុនរបស់ Alibaba បានធ្លាក់ចុះ ២៥% ពីតម្លៃខ្ពស់បំផុតកាលពីខែមិថុនា។
លោក Jack Ma និយាយថា ពាណិជ្ជកម្មជាច្រើននៅចិន និងអាមេរិក នឹងជួបបញ្ហាក្នុងពេលដ៏ខ្លី ហើយចុងក្រោយ ក្រុមហ៊ុនរបស់ចិនទាំងអស់ នឹងត្រូវបង្ខំទៅរកប្រទេសផ្សេង។ នេះបើតាមសារព័ត៌មាន CNN បានស្រង់សម្ដីលោក Ma។ CNN បន្ថែមថា បែបនឹងគ្មានភាពធូរស្បើយឡើយ ចំពោះភាពតានតឹងរវាងមហាអំណាចសេដ្ឋកិច្ចទាំងពីរ លុះត្រាលោក ដូណាល់ ត្រាំ ចុះចេញពីតំណែង៕
