លោក ឈួន ដារ៉ា ជួបពិភាក្សាការងារជាមួយគណៈប្រតិភូសហគមន៍ពាណិជ្ជកម្ម និងពិព័រណ៍នៃទីក្រុងម៉ាកាវ

លោក ឈួន ដារ៉ា ជួបពិភាក្សាការងារជាមួយគណៈប្រតិភូសហគមន៍ពាណិជ្ជកម្ម និងពិព័រណ៍នៃទីក្រុងម៉ាកាវ

នៅទីស្តីការក្រសួង កាលពីព្រឹកថ្ងៃទី០៣ ខែកញ្ញា ឆ្នាំ២០១៨ លោក ឈួន ដារ៉ា រដ្ឋលេខាធិការ និងជាតំណាងរបស់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជួបពិភាក្សាការងារជាមួយគណៈប្រតិភូសហគមន៍ពាណិជ្ជកម្ម និងពិព័រណ៍នៃទីក្រុងម៉ាកាវ (Macau Fair & Trade Association [MFAT]) ដឹកនាំដោយលោក Li Xua Hui ប្រធាននៃ MICE Alliance of Pan-Pearl Delta Cities។

កិច្ចប្រជុំពិភាក្សានេះ ធ្វើឡើងក្នុងគោលបំណងផ្សព្វផ្សាយ និងធ្វើការផ្លាស់ប្តូរបទពិសោធន៍នៃការអភិវឌ្ឍលើវិស័យពាណិជ្ជកម្ម និងការតាំងពិព័រណ៍ ព្រមទាំងពង្រីកទំនាក់ទំនង និងការសហការគ្នារវាងប្រទេសកម្ពុជា និងឧស្សាហកម្ម MICE នៃទីក្រុងម៉ាកាវផងដែរ។

នៅក្នុងឱកាសនោះ លោក ឈួន ដារ៉ា បានធ្វើការបង្ហាញអំពីសក្កានុពល និងបរិយាកាសវិនិយោគនៅកម្ពុជា ដោយបានគូសបញ្ជាក់ថា កម្ពុជាមានស្ថេរភាពនយោបាយ ម៉ាក្រូសេដ្ឋកិច្ច និងរូបបីយប័ណ្ណ និងមានទីតាំងស្ថិតនៅចំកណ្តាលអាស៊ាន ហើយរាជរដ្ឋាភិបាលបានលើកទឹកចិត្តវិស័យវិនិយោគ តាមរយៈការផ្តល់ភាពអនុគ្រោះពន្ធដល់អ្នកវិនិយោគិន។

លោកបានបន្តទៀតថា ការវិនិយោគពីប្រទេសចិនឈរនៅលំដាប់ទី១ ដែលនេះបង្ហាញពីការទំនាក់ទំនងសហប្រតិបត្តិការរល្អវាងកម្ពុជា និងចិន ហើយក៏ជាសញ្ញាវិជ្ជមាននៃការពង្រឹងកិច្ចសហប្រតិបត្តិការរវាងកម្ពុជា និងទីក្រុងម៉ាកាវផងដែរ។

លោក Li Xua Hui បានសម្តែងអំណរគុណ និងកោតសរសើរយ៉ាងជ្រាលជ្រៅ ចំពោះរាជរដ្ឋាភិបាលកម្ពុជា ជាពិសេសក្រសួងពាណិជ្ជកម្ម ដែលបានគាំទ្រ និងតែងជួយសម្របសម្រួលវិនិយោគិនចិន។ លោកបានអញ្ជើញមន្ត្រីកម្ពុជា ចូលរួមវគ្គបណ្តុះបណ្តាលស្តីពីការតាំងពិព័រណ៍ ដែលនឹងប្រព្រឹត្តទៅ នៅខែវិច្ឆិកា ឆ្នាំ២០១៨ ខាងមុខនេះ ក្រោមការរៀបចំដោយក្រុមប្រឹក្សាភិបាលចិន សម្រាប់ការផ្សព្វផ្សាយពាណិជ្ជកម្មអន្តរជាតិ (CCPIT)។

ទន្ទឹមគ្នានេះ លោក Li Xua Hui បានផ្តល់នូវអាហារូបករណ៍ ៥០ភាគរយ លើការសិក្សាផ្នែករៀបចំពិព័រណ៍អន្តរជាតិ ដែលរៀបចំដោយគណៈកម្មាធិការជំរុញពាណិជ្ជកម្មទីក្រុងម៉ាកាវ ថែមទៀត។

ឆ្លើយតបនឹងការអញ្ជើញរបស់លោក Li Xua Hui តំណាងសហគមន៍ពាណិជ្ជកម្ម និងពិព័រណ៍នៃទីក្រុងម៉ាកាវ លោក ឈួន ដារ៉ា បានសន្យានឹងពាំនាំដំណឹងនេះ ធ្វើការជម្រាបជូនលោករដ្ឋមន្ត្រីក្រសួងពាណិជ្ជកម្ម ដើម្បីពិនិត្យ និងសម្រេច៕