ទម្លាយអាថ៌កំបាំងផ្ទះឧកញ៉ាខ្មែរ កាលពីសម័យបារាំងមានជណ្ដើរដល់ទៅ២
ទម្លាយអាថ៌កំបាំងផ្ទះឧកញ៉ាខ្មែរ កាលពីសម័យបារាំងមានជណ្ដើរដល់ទៅ២
ទម្លាយអាថ៌កំបាំងផ្ទះឧកញ៉ាខ្មែរ កាលពីសម័យបារាំងមានជណ្ដើរដល់ទៅ២
ផ្ទះបុរាណមានអាយុកាលជិត១០០ឆ្នាំក្នុងខេត្តបាត់ដំបង បានក្លាយជាទីតាំងមួយដ៏ទាក់ទាញបំផុត ដល់ភ្ញៀវទេសចរបរទេសចូលមកសិក្សា និងស្រាវជ្រាវពីផ្ទះដ៏រឹងមាំមួយនេះ។
បើតាមលោក សម្បត្តិ វីរៈ ត្រូវជាក្មួយម្ចាស់ផ្ទះ និងជាអ្នកជំនាន់ទី៣រស់នៅក្នុងផ្ទះមួយនេះ បានប្រាប់ពីមូលហេតុដែលផ្ទះសាងសង់ឡើងក្នុងសម័យបារាំងនេះ មានជណ្ដើរដល់ទៅ២។ អំឡុងឆ្នាំ១៩២០ អ្នកដែលមានផ្ទះប្រភេទនេះ គឺជាអ្នកដែលមានមុខមាត់កិត្តិយសក្នុងសង្គម មានទ្រព្យសម្បត្តិច្រើន ដែលគេហៅថាជាដង្ខៅ ឬអ្នកឧកញ៉ា។ ផ្ទះដែលមានបណ្ដោយរហូតដល់២៩ម៉ែត្រនេះ មានជណ្ដើរ២ ដែលជណ្ដើរនៅមុខផ្ទះសាងសង់ឡើងពីស៊ីម៉ងត៍ ដែលរកឃើញដំបូងបំផុតក្នុងសម័យនោះ។ ជណ្ដើរនៅមុខផ្ទះនេះ គឺសម្រាប់តែម្ចាស់ផ្ទះ និងភ្ញៀវសំខាន់ឡើងចុះប៉ុណ្ណោះ។
បុរសវ័យ៤៤ឆ្នាំរូបនេះបន្តទៀតថា ចំណែកជណ្ដើរនៅខាងក្រោយដែលសាងសង់ពីឈើ ហើយមានប្រក់ដំបូល គឺសម្រាប់បាវព្រាវ អ្នកបម្រើឡើងចុះ។ នៅមុខជណ្ដើរនោះ គឺមានបន្ទប់មួយសម្រាប់អ្នកបម្រើស្នាក់នៅ។ អ្នកបម្រើទាំងអស់ ត្រូវឡើងចុះតាមជណ្ដើរនោះ ហើយតម្រង់ចូលផ្ទះបាយ ធ្វើម្ហូបអាហារស្លស្លុក សម្រាប់ម្ចាស់ផ្ទះ និងគ្មានសិទ្ធិចូលក្នុងផ្ទះធំដោយគ្មានការអនុញ្ញាតឡើយ។
ដោយសារមានការបែងចែកវណ្ណៈបែបនេះហើយ ទើបផ្ទះដង្ខៅនៅសម័យហ្លួងព្រះស៊ីសុវត្ថិ មានជណ្ដើរដល់ទៅ២ ព្រោះមូលហេតុដូចរៀបរាប់ខាងលើនេះ។
ផ្ទះនេះមានបណ្ដោយ ២៩ ម៉ែត្រ និង ទទឹង ១០.៥ម៉ែត្រ សង់លើផ្ទៃដី ៥៤៥០ម៉ែត្រការ៉េ។ សង់តាមលំនាំម៉ូត ប៉ិត មានន័យថា មានហោណាំង (រានហាល) នៅ ខាងមុខ។ ផ្ទះនេះមានជណ្ដើរពីរ ខាងមុខធ្វើពីថ្ម រីឯខាងក្រោយធ្វើពីឈើ។ ដំបូលប្រក់ក្បឿងស្រកានាគបុរាណតែខាងក្នុងគ្មានពិតានទេ នឹងមានក្បូរក្បាច់យ៉ាងប្រណីតនៅលើព្រំផ្ទះ។ ឈើផ្នែកខាងលើនៃដំបូលធ្វើពីឈើផ្ចឹក ក្ដារក្រាលខាងក្នុងផ្ទះធ្វើពីឈើបេង ក្ដារក្រាលរានហាលធ្វើពីឈើកកោះ។ ចំណែកជញ្ជាំងវិញធ្វើអំពីឫស្សីត្បាញបូកជាមួយបាយអ។ សសរ ទាំង ៣៦ សុទ្ធតែធ្វើពីឈើផ្ចឹកទាំងអស់ ហើយនៅតែមានសភាពរឹងមាំរហូតមកដល់បច្ចុប្បន្ននេះ។
សូមជម្រាបជូនថា ផ្ទះបុរាណនេះ មានទីតាំងនៅភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង៕
អត្ថបទ៖ សប្បាយ
