លោក ថោង ខុន ទទួលសញ្ញាបត្របណ្ឌិតកិត្តិយសជំនាញទេសចរណ៍នៃសាកលវិទ្យាល័យបច្ចេកវិទ្យា រាចាម៉ាន់ហ្កាឡា ថាន់យ៉ាបុរី ពីអង្គម្ចាស់ក្សត្រី មហាចក្រី សុរិនថន
លោក ថោង ខុន ទទួលសញ្ញាបត្របណ្ឌិតកិត្តិយសជំនាញទេសចរណ៍នៃសាកលវិទ្យាល័យបច្ចេកវិទ្យា រាចាម៉ាន់ហ្កាឡា ថាន់យ៉ាបុរី ពីអង្គម្ចាស់ក្សត្រី មហាចក្រី សុរិនថន
កាលពីរសៀលថ្ងៃទី២៧ ខែសីហា ឆ្នាំ ២០១៨ លោក ថោង ខុន រដ្ឋមន្រ្តីក្រសួងទេសចរណ៍ ត្រូវបាន ព្រះអង្គម្ចាស់ក្សត្រី មហាចក្រី សុរិនថន ប្រទាន សញ្ញាបត្របណ្ឌិតកិត្តិយសជំនាញទេសចរណ៍ នៃសាកលវិទ្យាល័យបច្ចេកវិទ្យារាចាម៉ាន់ហ្កាឡា ថាន់យ៉ាបុរី នៃព្រះរាជាណាចក្រថៃឡង់ដ៏ដោយផ្អែកតាមសេចក្តីសម្រេចជាឯកច្ឆន្ទរបស់ក្រុមប្រឹក្សានាយកនៃសាកលវិទ្យាល័យបច្ចេកវិទ្យា រាចាម៉ាន់ហ្កាឡា ថាន់យ៉ាបុរី ដោយបានពិនិត្យ និងទទួលស្គាល់នូវគុណតម្លៃប្រកបដោយឆន្ទៈខ្ពស់ក្នុងការសម្រេចឱ្យមានសមិទ្ធផល និងការអភិវឌ្ឍវិស័យទេសចរណ៍ប្រកបដោយនិរន្តរភាព ការទទួលខុសត្រូវ និងបរិយាបន្ន រួមចំណែកលើកកម្ពស់ដល់ការអភិវឌ្ឍសេដ្ឋកិច្ចសង្គមនៅកម្ពុជា និងបែងចែកផលប្រយោជន៍ដល់គ្រប់ភាគីពាក់ព័ន្ធនៅក្នុងវិស័យទេសចរណ៍ ពិសេសប្រជាពលរដ្ឋមូលដ្ឋាន។
លោក ថោង ខុន បានទទួលសញ្ញាបត្របណ្ឌិតកិត្តិយសជំនាញទេសចរណ៍ ព្រមជាមួយនឹងការផ្តល់បណ្ឌិតកិត្តិយសចំនួន០៥រូបផ្សេងទៀតលើជំនាញ វិស្វកម្មឧស្សាហកម្ម អប់រំ គ្រប់គ្រង និងសិល្បៈរចនាលម្អ ស្របពេលនឹងពិធីប្រគល់សញ្ញាបត្រដល់និស្សិតនៃសាកលវិទ្យាល័យបច្ចេកវិទ្យា រាចាម៉ាន់ហ្កាឡា សថាន់យ៉ាបុរី ក្រោមព្រះរាជអធិបតីភាពដ៏ខ្ពង់ខ្ពស់បំផុតរបស់មហាក្សត្រីមហាចក្រីសីរិនថន និងមានការចូលរួមពីសំណាក់មន្រ្តីរាជការ សាស្រ្តាចារ្យ លោកគ្រូ អ្នកគ្រូ និងសិស្ស និស្សិត សរុបប្រមាណ ៦០០០នាក់។
សមិទ្ធផល និងវឌ្ឍនភាពគួរជាទីមោទនៈនៃវិស័យទេសចរណ៍កម្ពុជា ពិតណាស់គឺពិតជាបានកើតចេញមកពីការដឹកនាំដ៏ឈ្លាសវៃ ប្រកបដោយគតិបណ្ឌិតរបស់លោក ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានដាក់ចេញនូវនយោបាយឈ្នះ ឈ្នះ នាំមកនូវសុខសន្តិភាព ការអភិវឌ្ឍ និងលទ្ធិប្រជាធិបតេយ្យ ជារួម និងដោយឡែកគោលនយោបាយ និងផែនការយុទ្ធសាស្រ្តអភិវឌ្ឍទេសចរណ៍គ្រប់ជ្រុងជ្រោយស្របជាមួយនឹងការប្តេជ្ញាចិត្តយ៉ាងសកម្មក្នុងការអនុវត្តគោលនយោបាយទេសចរណ៍សកល និងតំបន់ ព្រមជាមួយ ការចូលរួមគាំទ្រ សហការ និងអនុវត្តប្រកបដោយការទទួលខុសត្រូវខ្ពស់ពីសំណាក់មន្រ្តីរាជការ ស្ថាប័នពាក់ព័ន្ធ ផ្នែកឯកជន ដៃគូអភិវឌ្ឍ និងប្រជាពលរដ្ឋកម្ពុជាទាំងអស់ផងដែរ៕
