ក្រសួងទេសចរណ៍ ណែនាំឱ្យត្រៀមទទួលភ្ញៀវទេសចរឡើងវិញ ដោយបន្តវិធានបង្ការជំងឺកូវីដ-១៩ ឱ្យបានល្អ
ក្រសួងទេសចរណ៍ ណែនាំឱ្យត្រៀមទទួលភ្ញៀវទេសចរឡើងវិញ ដោយបន្តវិធានបង្ការជំងឺកូវីដ-១៩ ឱ្យបានល្អ
លោក ថោង ខុន រដ្ឋមន្ត្រីក្រសួងទេសចរណ៍ បានណែនាំឱ្យអ្នកប្រកបរបរទេសចរណ៍ត្រៀមលក្ខណៈទទួលភ្ញៀវទេសចរជាតិពេលដែលរាជរដ្ឋាភិបាលសម្រេចឱ្យឈប់សម្រាកសងបុណ្យចូលឆ្នាំខ្មែរនាពេលខាងមុខនេះ ដើម្បីបំពេញតម្រូវការសេវាផ្សេងៗរបស់ពួកគេ ប៉ុន្តែត្រូវបន្តអនុវត្តនូវវិធានទប់ស្កាត់ជំងឺកូវីដ-១៩ ឱ្យបានល្អ។
លោក ថោង ខុន បានមានប្រសាសន៍ថា ចំនួនភ្ញៀវទេសចរចាប់ផ្តើមមានការកើនឡើងបណ្តើៗហើយ។ ដូច្នេះប្រតិបត្តិករទេសចរ និងប្រជាពលរដ្ឋ ត្រូវតែប្រុងប្រយ័ត្នកុំភ្លេចខ្លួនព្រោះខ្លាចឆ្លងកូវីដ១៩ បើទោះបីជាដើរកំសាន្តសប្បាយនៅកន្លែងណាក៏ដោយ ត្រូវអនុវត្តវិធានសុវត្ថិភាពរបស់ក្រសួងសុខាភិបាល តាមរយៈ រក្សាគម្លាតសង្គម រក្សាអនាម័យ ពាក់ម៉ាស់ជាដើម។
នៅលើផេកហ្វេសបុកផ្លូវការរបស់ក្រសួងទេសចរណ៍ នាថ្ងៃទី១៣ ខែកក្កដា ឆ្នាំ២០២០ លោក ថោង ខុន បានបញ្ជាក់ថា រាជរដ្ឋាភិបាលនឹងអនុញ្ញាតឱ្យឈប់សម្រាកជំនួសបុណ្យចូលឆ្នាំខ្មែរនាពេលខាងមុខនេះ ហើយភ្ញៀវទេសចរក្នុងស្រុកនឹងមានកំណើន ដែលនេះជាចំណុចល្អមួយទៀត។
លោកបន្តថា៖ «ទេសចរក្នុងស្រុករបស់យើងមួយឆ្នាំមានជាង ១លាននាក់ និងចេញទៅកំសាន្តក្រៅប្រទេសជាង ២លាននាក់ ដូច្នេះ ពេលឈប់ជិត១០ថ្ងៃនេះអ្នកមានលុយចេញទៅក្រៅជាង ២លាននាក់នោះមិនទៅណាទេ មានតែដើរលេងក្នុងស្រុកព្រោះចេញទៅក្រៅមិនកើត។ អញ្ចឹងយើងបានរំលឹកដល់មន្ទីរទេសចរណ៍គ្រប់រាជធានីខេត្ត និងផ្នែកឯកជនអស់ហើយដោយទី១ ត្រូវបង្កើនការត្រួតពិនិត្យសុខភាពភ្ញៀវទេសចរដែលបានដាក់ចុះដើម្បីការពារសុវត្ថិភាពបងប្អូន។ ទី២ សុំអោយផ្នែកឯកជនបន្ថែមសេវាថែមដូចជាភោជនីយដ្ឋានខ្លះពីមុនគាត់មិនទាន់បានបើកទេ ឥឡូវរៀបចំឱ្យគាត់បើកឡើងវិញ សណ្ឋាគារខ្លះអីមិនទាន់បើកសុំអោយគាត់បើកឡើងវិញ»។
ជាមួយគ្នានោះ ក្នុងពេលដែលកម្ពុជា ក៏ដូចពិភពលោកកំពុងជួបវិបត្តិកូវីដ-១៩នេះ រាជរដ្ឋាភិបាលកម្ពុជាក៏លើកទឹកចិត្តដល់វិស័យឯកជន ដែលធ្វើការក្នុងវិស័យទេសចរតាមរយៈការលើកលែងការបង់កម្រៃបន្តអាជ្ញាបណ្ណទេសចរណ៍គ្រប់ប្រភេទនៅឆ្នាំ២០២១ និងការជួយគាំទ្រផ្សេងៗទៀតដើម្បីជួយសម្រាលបន្ទុកចំណាយច្រើនផងដែរ។
បើតាមលោករដ្ឋមន្ត្រីក្រសួងទេសចរណ៍ បញ្ហាកូវីដ-១៩ បានរុញឱ្យវិស័យទេសចរណ៍កម្ពុជាដើរថយក្រោយចាប់ពីបីទៅប្រាំឆ្នាំ ដូច្នេះក្រសួងទេចរណ៍ត្រូវប្តូរ និងបានដាក់ចេញផែនការថ្មីៗជាបន្តបន្ទាប់ដើម្បីលើកកម្ពស់វិស័យទេសចរណ៍ឱ្យរីកចំរើនឡើងវិញ៕
