បញ្ចប់ការបោះឆ្នោត! លោក Erdogan ឈ្នះឆ្នោត ជាប្រធានាធិបតីតួកគី អាណត្តិទី២
បញ្ចប់ការបោះឆ្នោត! លោក Erdogan ឈ្នះឆ្នោត ជាប្រធានាធិបតីតួកគី អាណត្តិទី២
មេដឹកនាំនៃគណបក្សយុត្តិធម៌ និងអភិវឌ្ឍន៍ (Justice and Development Party) និងជាប្រធានាធិបតីតួកគី លោក Recep Tayyip Erdogan បានឈ្នះការបោះឆ្នោតសម្រាប់អាណត្តិទី២។
(លោក Recep Tayyip Erdogan)
លោក Sadi Guven ប្រធានក្រុមប្រឹក្សាកំពូលនៃការបោះឆ្នោត បាននិយាយថា លោក Erdogan ទទួលបានសំឡេងភាគច្រើន នៃសំឡេងឆ្នោតដែលមានសុពលភាពទាំងអស់។
ជាមួយគ្នានេះ របាយការណ៍របស់ប្រព័ន្ធផ្សព្វផ្សាយរដ្ឋ បានបង្ហាញថា លោក Erdogan ទទួលបានសំឡេង ៥៣% ពីការរាប់សន្លឹកឆ្នោត ៩៩% ខណៈមេបក្សប្រឆាំង លោក Muharrem Ince ទទួលបានសំឡេងត្រឹមតែ ៣១% ប៉ុណ្ណោះ។
(លោក Muharrem Ince)
ទោះបីជាយ៉ាងណាក៏ដោយ លទ្ធផលដែលចេញផ្សាយដោយប្រព័ន្ធផ្សព្វផ្សាយរបស់រដ្ឋ បានធ្វើឲ្យមានការសង្ស័យ។ យ៉ាងណាមិញ លទ្ធផលចុងក្រោយបង្អស់ នឹងត្រូវប្រកាសនៅថ្ងៃសុក្រនេះតែម្ដង។
(អ្នកគាំទ្រលោក Erdogan ដង្ហែក្បួនតាមដងផ្លូវក្នុងទីក្រុង Istanbul ដើម្បីអបអរ)
គួររំលឹកឲ្យដឹងថា ប្រធានាធិបតីតួកគី វ័យ៦៤ឆ្នាំ លោក Erdoğan បានឈ្នះឆ្នោតអាណត្តិទី១ កាលពីឆ្នាំ២០១៤ ហើយបានឡើងកាន់អំណាច នៅថ្ងៃទី២៨ ខែសីហា៕
