អ្នកមិនទទួលទូទាត់ប្រាក់រៀលក្នុងទឹកដីព្រះរាជាណាចក្រកម្ពុជា នឹងត្រូវពិន័យធ្ងន់ករ
អ្នកមិនទទួលទូទាត់ប្រាក់រៀលក្នុងទឹកដីព្រះរាជាណាចក្រកម្ពុជា នឹងត្រូវពិន័យធ្ងន់ករ
ធនាគារជាតិនៃព្រះរាជាណាចក្រកម្ពុជានៅថ្ងៃនេះបានបង្ហោះមាត្រាចំនួនពីរនៃច្បាប់ស្តីពីការរៀបចំនិងការប្រព្រឹត្តទៅនៃធនាគារជាតិនៃព្រះរាជាណាចក្រកម្ពុជាដែលមានចែងពីការប្រើប្រាស់រូបិយវត្ថុរបស់កម្ពុជា និងការផ្ទន្ទាទោសពិន័យលើអ្នកដែលបដិសេធទូទាត់រូបិយវត្ថុនេះ។
តាមរយៈទំព័រហ្វេសប៊ុកផ្លូវការរបស់ខ្លួន ដោយមានភ្ជាប់មកជាមួយនូវមាត្រាចំនួនពីរផង ធនាគារជាតិបានសរសេរថាការពុំព្រមទូទាត់រូបិយវត្ថុដែលមានតម្លៃនីត្យានុកូលនឹងត្រូវផ្តន្ទាទោសពិន័យជាប្រាក់ចំនួន១០០ដងនៃទឹកប្រាក់ដែលពុំព្រមទទួលទូទាត់នោះ។
ធនាគារជាតិបានដកស្រង់មាត្រា៤៣ ដែលចែងថា «ក្នុងពេលដែលមិនបានដកចេញពីចរាចរទេនោះ ក្រដាសប្រាក់និងកាសដែលបោះផ្សាយដោយធនាគារកណ្តាល គឺជារូបិយវត្ថុមានតម្លៃនីត្យានុកូលក្នុងព្រះរាជាណាចក្រកម្ពុជា និងមានតេជានុភាពធ្វើសេរីកាគ្មានព្រំដែនចំពោះក្រដាសប្រាក់ និងមានព្រំដែនចំពោះកាសក្នុងលក្ខខណ្ឌកំណត់ដោយធនាគារកណ្តាល»។
ដោយឡែកទោសបញ្ញត្តិក្នុងមាត្រា៦៤ ចែងថា «ជនណាពុំព្រមទូទាត់រូបិយវត្ថុដែលមានតម្លៃនីត្យានុកូលនិងមានតេជានុភាពធ្វើសេរីកាលើដែនដីនៃព្រះរាជាណាចក្រកម្ពុជា ជននោះនឹងត្រូវបានផ្តន្ទាទោសពិន័យជាប្រាក់ស្មើនឹង ១០០ដងនៃទឹកប្រាក់ដែលពុំព្រមទូទាត់នោះ»។
ធនាគារជាតិបន្តថា តាមច្បាប់ជាធរមាន ក្នុងករណីប្រជាពលរដ្ឋជួបប្រទះបញ្ហាមិនទទួលឬប្រើប្រាស់ប្រាក់រៀលក្នុងព្រះរាជាណាចក្រកម្ពុជា អាចប្តឹងទៅអាជ្ញាធរមានសមត្ថកិច្ច ដោយភ្ជាប់ជាមួយនូវភស្តុតាងចាំបាច់នានា ដើម្បីមានវិធានការតាមផ្លូវច្បាប់៕
