រមណីយដ្ឋានលំដាប់ពិភពលោក នឹងបង្ហាញខ្លួននៅខេត្តព្រះសីហនុ ឆាប់ៗ
រមណីយដ្ឋានលំដាប់ពិភពលោក នឹងបង្ហាញខ្លួននៅខេត្តព្រះសីហនុ ឆាប់ៗ
កោះតូចមួយ ស្ថិតនៅសមុទ្ររាម ដែលគេស្គាល់ថាជាកោះក្របី ចម្ងាយប្រហែល ៧ គីឡូម៉ែត្រ ពីឆ្នេរសមុទ្រខេត្តព្រះសីហនុដែលមានទំហំប្រមាណ ១២ ហិកតា បច្ចុប្បន្ន ត្រូវបានអភិវឌ្ឍប្រែក្លាយកោះនេះ ទៅជារមណីយដ្ឋានប្រណីត សម្រាប់ភ្ញៀវលំដាប់ខ្ពស់ គ្រោងនឹងដំណើរការមុនដំណាច់ ឆ្នាំ ២០១៨។ គម្រោងនេះ ត្រូវបានដំណើរការសាងសង់ និងវិនិយោគដោយក្រុមហ៊ុន RPB Investment អនុញ្ញាតដោយរដ្ឋាភិបាល ដើម្បីអភិវឌ្ឍជាកោះឯកជនសម្រាប់ភ្ញៀវលំដាប់ខ្ពស់ ដែលគម្រោងនេះបានសហប្រតិបត្តិការជាមួយក្រុមហ៊ុនលំដាប់ពិភពលោក SIX SENSES ។
លោក Bohnenberge ប្រធានគម្រោង Six Senses មានប្រសាសន៍ក្នុងសន្និសីទកាសែត នៅថ្ងៃទី ២៥ ឧសភា បង្ហើបថា គម្រោងរីសត និងសណ្ឋាគារ លំដាប់ខ្ពស់មួយនេះ នឹងបើកជាផ្លូវការនៅខែកញ្ញា ឆ្នាំនេះ។ យ៉ាងណាមិញ លោកមិនបានបង្ហាញពីទំហំទឹកប្រាក់វិនិយោគឡើយ ដោយរង់ចាំថ្ងៃសម្ពោធតែម្ដង។
លោក ឲ្យដឹងបន្ថែមថា Six Senses Group មានគម្រោងសណ្ឋាគារ និងរីសត បែបប្រណីតនៅក្នុងប្រទេសចំនួន ១១ ក្នុងនោះមានប្រទេសក្បែរខាង ដូចជា ថៃ វៀតណាម ជាដើម។
គួរជម្រាបថា គម្រោងរីសតនៅកោះក្របី មានសាងសង់វីឡាចំនួន ៤០ ដោយវីឡានីមួយៗ មានអាងហែលទឹក១ , មានភោជនីយដ្ឋាន ចំនួន ០២, មានកន្លែងកម្សាន្ត និងកន្លែងស្ប៉ា៕
