កម្ពុជាកំពុងរៀបចំធ្វើវិសោធនកម្មច្បាប់ចំនួនពីរទាក់ទងនឹងពាណិជ្ជកម្ម
កម្ពុជាកំពុងរៀបចំធ្វើវិសោធនកម្មច្បាប់ចំនួនពីរទាក់ទងនឹងពាណិជ្ជកម្ម
កម្ពុជាកំពុងតែរៀបចំធ្វើវិសោធនកម្មច្បាប់ចំនួនពីរទាក់ទងនឹងពាណិជ្ជកម្ម ដើម្បីជំរុញការធ្វើធុរកិច្ចនៅកម្ពុជា។ ច្បាប់ទាំងពីរដែលក្រសួងពាណិជ្ជកម្មរៀបចំសេចក្តីព្រាងធ្វើវិសោធនកម្មនោះ រួមមានច្បាប់ស្តីពីសហគ្រាសពាណិជ្ជកម្ម និងច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម។
គោលដៅសំខាន់៣ដែលក្រសួងសេដ្ឋកិច្ចជាអ្នកសម្របសម្រួលក្នុងការងារវិសោធនកម្មច្បាប់ទាក់ទងនឹងការធ្វើពាណិជ្ជកម្មនេះ គឺទី១លើកកម្ពស់ភាពងាយស្រួលនៃការធ្វើធុរកិច្ចនៅកម្ពុជា។ ទី២បំពេញបន្ថែមបទបញ្ញត្តិ នីតិវិធីឲ្យមានភាពច្បាស់លាស់ សម្រាប់ទ្រទ្រង់យន្តការដែលមានស្រាប់ និងកំពុងអនុវត្តកន្លងមក។ ទី៣គឺធានាសង្គតិភាពរវាងច្បាប់ទាំងពីរ«ច្បាប់ស្តីពីសហគ្រាសពាណិជ្ជកម្ម និងច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម»ជាមួយច្បាប់នឹងបទបញ្ញត្តិផ្សេងទៀតដូចជា ច្បាប់បោះពុម្ពផ្សាយ និងការជួញដូរមូលបត្រមហាជន និងច្បាប់ស្តីពីគណនេយ្យភាព និងសវនកម្ម ជាដើម។
អ្នកនាំពាក្យក្រសួងសេដ្ឋកិច្ច លោក មាស សុខសេនសាន ពន្យល់បន្ថែមថា ការធ្វើវិសោធនកម្មច្បាប់ទាំងពីរនេះ និយាយស្រួលស្តាប់គឺជាការកែសម្រួលច្បាប់ឲ្យងាយស្រួលសម្រាប់អ្នករកស៊ី កាន់តែមានតែកិច្ចការពារខ្ពស់ និងជាការទាក់ទាញអ្នកវិនិយោគបន្ថែមទៀតមកកាន់កម្ពុជា។
គួរកត់សំគាល់ថា រដ្ឋាភិបាលកម្ពុជាកំពុងតែធ្វើការងារចាំបាច់មួយចំនួនដើម្បីស្តារវិបត្តិសេដ្ឋកិច្ចក្រោយពេលកូវីដ-១៩ ខណៈដែលសហភាពអឺរ៉ុបបានដកហូតប្រព័ន្ធអនុគ្រោះEBAពីកម្ពុជា២០ភាគរយ។
នៅថ្ងៃទី១៨មករា ក្រសួងការបរទេសកម្ពុជា បានដាក់ឲ្យអនុវត្តយុទ្ធសាស្ត្រការទូតសេដ្ឋកិច្ចពីឆ្នាំ២០២១ដល់២០២៣ គឺជាឧបករណ៍គោលនយោបាយមួយដើម្បីលើកស្ទួយវិស័យពាណិជ្ជកម្មអន្តរជាតិរបស់កម្ពុជា ទាក់ទាញការវិនិយោគផ្ទាល់ពីបរទេស ជំរុញវិស័យទេសចរណ៍ និងលើកកម្ពស់ភាពប្រកួតប្រជែងរបស់កម្ពុជា ព្រមទាំងគាំទ្រការធ្វើកំណែទម្រង់លើគ្រប់វិស័យ។
ផ្អែកតាមយុទ្ធសាស្ត្រនេះ កម្ពុជារំពឹងថា នឹងមានកំណើនសេដ្ឋកិច្ចងើបឡើងវិញខ្ទង់ ៣,៥ភាគរយនៅឆ្នាំ២០២១ បន្ទាប់ពីបានធ្លាក់ចុះយ៉ាងគំហុក-១,៩ភាគរយនៅឆ្នាំ២០២០៕ RFI
