ប្រសាសន៍សំខាន់ៗរបស់សម្តេចតេជោ ហ៊ុន សែន ឱកាសអញ្ជើញចុះជួបកម្មករ កម្មការិនីជិត ២ម៉ឺននាក់ នៅស្រុកអង្គស្នួល ខេត្តកណ្តាល
ប្រសាសន៍សំខាន់ៗរបស់សម្តេចតេជោ ហ៊ុន សែន ឱកាសអញ្ជើញចុះជួបកម្មករ កម្មការិនីជិត ២ម៉ឺននាក់ នៅស្រុកអង្គស្នួល ខេត្តកណ្តាល
នៅថ្ងៃព្រហស្បតិ៍ ទី២៩ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអញ្ជើញចុះជួបសំណេះសំណាលជាមួយកម្មករ កម្មការិនីសរុបប្រមាណ ១៨,២៥៥នាក់ មកពីរោងចក្រសហគ្រាសចំនួន១១ ក្នុងស្រុកអង្គស្នួល ខេត្តកណ្តាល។
ខាងក្រោមជាប្រសាសន៍សំខាន់ៗរបស់សម្តេចតេជោ ហ៊ុន សែន ឱកាសអញ្ជើញចុះជួបកម្មករ កម្មការិនីជិត ២ម៉ឺននាក់ នៅស្រុកអង្គស្នួល ខេត្តកណ្តាល៖
- សម្តេចតេជោ ហ៊ុន សែន បានថ្លែងថា គោលនយោបាយគាំពារសង្គមត្រូវបានដាក់ចេញជាបន្តបន្ទាប់ ដើម្បីឆ្លើយតបនឹងសុខុមាលភាពរបស់ប្រជាពលរដ្ឋ។
- សម្តេចតេជោ ហ៊ុន សែន បន្តអំពាវនាវឱ្យរួមគ្នារក្សាភាពសុខសាន្តតាមរោងចក្រ ទប់ស្កាត់ការជួញដូរគ្រឿង និងការចម្លងមេរោគអេដស៍។
- សម្តេចតេជោ ហ៊ុន សែន បានថ្លែងថា ជំងឺអេដស៍ និងកូវីដ១៩ មិនទាន់បញ្ចប់ទេ សូមរួមគ្នាការពារវា។
- សម្តេចតេជោ ហ៊ុន សែន អំពាវនាវឱ្យរួមគ្នារក្សាសុខសន្តិភាព ដើម្បីធានានិរន្តភាពនៃការអភិវឌ្ឍ។
- សម្តេចតេជោ ហ៊ុន សែន បានថ្លែងថា សង្គ្រាមបានបំផ្លាញកម្ពុជា តែពលរដ្ឋកម្ពុជា បានប្រឹងប្រែងរួមគ្នាបន្លត់នូវភ្លើងសង្គ្រាមនេះ។
- សម្តេចតេជោ ហ៊ុន សែន លើកទឹកចិត្តដល់ប្រជាពលរដ្ឋរួមគ្នាកម្ចាត់នូវភាពក្រីក្រ។
- សម្តេចតេជោ ហ៊ុន សែន ប្រកាសជាសាធារណៈថា កាលពីយប់មិញនេះ មិនមានដ្រូនហោះចូលដីខ្មែរនោះឡើយ។
- សម្តេចតេជោ ហ៊ុន សែន ផ្តាំទៅអ្នកលេង Facebook កុំបង្ហោះព័ត៌មានដោយគ្មានការអនុញ្ញាតពាក់ព័ន្ធសន្តិសុខជាតិ។
- សម្តេចតេជោ ហ៊ុន សែន ប្រកាសជាថ្មីម្តងទៀត ផ្អាកការប្រើប្រាស់ Facebook ដោយងាកមកប្រើប្រាស់ Telegram ជំនួសវិញ។
- សម្តេចតេជោ ហ៊ុន សែន ថ្លែងទៅកាន់កម្មករ និយោជិតថា បើរោងចក្របិទ គឺកម្មករ កម្មការិនី គឺជាអ្នកជួបការលំបាកមុនគេ ព្រោះអត់ការងារធ្វើ។
- សម្តេចតេជោ ហ៊ុន សែន បានថ្លែងថា ដើរកាត់ភក់មិនមែនជាបញ្ហាសម្រាប់សម្តេចនោះឡើយ សម្តេចធ្លាប់ដើរកាត់ដល់ទៅចម្ការមីន។
- សម្តេចតេជោ ហ៊ុន សែន បានថ្លែងថា តាំងពីក្មេងមកសម្តេចមិនដែលដេកឆ្អែតនោះឡើយ។
- សម្តេចតេជោ ហ៊ុន សែន អំពាវនាវកម្មករ កម្មការិនី ទៅចូលរួមបោះឆ្នោតនៅថ្ងៃទី២៣ ខែកក្កដា ហើយហាមការផឹកស្រា។
- សម្តេចតេជោ ហ៊ុន សែន បានថ្លែងថា ស្ត្រីជាមន្ត្រីរាជការ និងជាប់កិច្ចសន្យា ទទួលបានការឧបត្ថម្ភថវិកា ពីដំណាក់កាលមានផ្ទៃពោះ រហូតដល់កូនអាយុ២ឆ្នាំ។
- សម្តេចតេជោ ហ៊ុន សែន ប្រកាសណែនាំឱ្យកម្មករ កម្មការិនី ទៅពិនិត្យ និងព្យាបាលជំងឺនៅមន្ទីរពេទ្យ «តេជោសន្តិភាព» ដោយមិនគិតប្រាក់។
Fresh News
