ប្រសាសន៍សំខាន់ៗរបស់សម្តេចតេជោ ហ៊ុន សែន ឱកាសអញ្ជើញចុះជួបកម្មករ ជិត២ម៉ឺននាក់ នៅក្រុងច្បារមន ខេត្តកំពង់ស្ពឺ

ប្រសាសន៍សំខាន់ៗរបស់សម្តេចតេជោ ហ៊ុន សែន ឱកាសអញ្ជើញចុះជួបកម្មករ ជិត២ម៉ឺននាក់ នៅក្រុងច្បារមន ខេត្តកំពង់ស្ពឺ

នៅព្រឹកថ្ងៃអង្គារ ទី២៧ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រី​កម្ពុជា បានបន្តចុះជួបសំណេះសំណាលជាមួយកម្មករ និយោជិតសរុប ១៩,០៨៥ នាក់ មកពីរោង​ចក្រ សហគ្រាសចំនួន៩ ដែលកំពុងដំណើរការអាជីវកម្មក្នុងក្រុងច្បារមន និងស្រុកសំរោងទង ខេត្តកំពង់​ស្ពឺ។

ខាងក្រោមជាខ្លឹមសារសំខាន់ៗរបស់សម្តេចតេជោ ហ៊ុន សែន ឱកាសអញ្ជើញចុះជួបកម្មករ ជិត២ម៉ឺននាក់ នៅក្រុងច្បារមន ខេត្តកំពង់ស្ពឺ៖

1. សម្តេចតេជោ ហ៊ុន សែន បានថ្លែងថា មន្ត្រីរាជរដ្ឋាភិបាលខ្លះ លេងហ្វេសប៊ុកចាញ់កម្មករ កម្មការិនី។
2. សម្តេចតេជោ ហ៊ុន សែន អរគុណកម្មករ និយោជិត ដែលបានផ្តល់នូវការគោរពស្រឡាញ់ចំពោះសម្តេច។ សម្តេចតេជោ ចាត់ទុកការស្រឡាញ់ និងភាពស្និទ្ធស្នាលនោះ ប្រៀបដូចជាសាច់ញាតិ។
3. សម្តេចតេជោ ហ៊ុន សែន បានថ្លែងថា ក្រោយពេលបោះឆ្នោត ចាប់ពីថ្ងៃទី២៧ ខែកក្កដា សម្តេចនឹងជួបកម្មករ និយោជិតចំនួន១០លើកទៀត។
4. សម្តេចតេជោ ហ៊ុន សែន បានថ្លែងថា ការចុះជួបជាមួយកម្មករ និយោជិត មិនមែនដើម្បីតែសន្លឹកឆ្នោតប៉ុណ្ណោះទេ តែជាការចុះជួបដើម្បីសិក្សាដាក់ចេញនូវគោលនយោបាយនានា។
5. សម្តេចតេជោ ហ៊ុន សែន បានថ្លែងថា មិនមាននរណានឹកស្មានដល់ថាកំពង់ស្ពឺមានការអភិវឌ្ឍ និងរីកចម្រើនដូចពេលបច្ចុប្បន្ននេះឡើយ។
6. សម្តេចតេជោ ហ៊ុន សែន បានថ្លែងថា នៅពេលខាងមុខខេត្តកំពង់ស្ពឺ នឹងមានរោងចក្រស៊ីម៉ង់តិ៍ដ៏ធំមួយ មានសមត្ថភាពផលិតស៊ីម៉ង់តិ៍ បានប្រមាណ ២លានតោនក្នុងមួយឆ្នាំ។
7. សម្តេចតេជោ ហ៊ុន សែន បានថ្លែងថា ខេត្តកំពង់ស្ពឺ នៅមានសក្តានុពលផ្នែកសេដ្ឋកិច្ចច្រើនទៀត។
8. សម្តេចតេជោ ហ៊ុន សែន បានថ្លែងថា បើគេក្រឡេកទៅមើលគោលនយោបាយសម្រាប់ការវិនិយោគ គឺគេមើលឃើញថា គោលនយោបាយអភិវឌ្ឍន៍ប្រទេសរបស់សម្តេច មិនមែនជាគោលនយោបាយឆក់កណ្តៀតនោះឡើយ។
9. សម្តេចតេជោ ហ៊ុន សែន បានថ្លែងថា គោលដៅរបស់រាជរដ្ឋាភិបាល ប្រឹងប្រែងបង្កើតការងារឱ្យបាន ៣០ម៉ឺននាក់ក្នុងមួយឆ្នាំ។
10. សម្តេចតេជោ ហ៊ុន សែន បានថ្លែងថា ភាគនិរតីប្រទេសនៅមានសក្តានុពលវិនិយោគធំណាស់ ដោយសារមានហេដ្ឋារចនាសម្ព័ន្ធតភ្ជាប់ល្អ។
11. សម្តេចតេជោ ហ៊ុន សែន បានថ្លែងថា សម្តេចមានមោទនភាព និងពេញចិត្ត ចំពោះនយោបាយដែលសម្តេច អនុញ្ញាតឱ្យប្រជាពលរដ្ឋលក់ដីនៅតាមបណ្តោយផ្លូវជាតិលេខ៣ និងលេខ៤។
12. សម្តេចតេជោ ហ៊ុន សែន បានថ្លែងថា ពេញចិត្តនឹងនយោបាយ ទស្សនៈវិជ្ជាដឹកនាំរបស់សម្តេច ដែលនាំឱ្យមានការរីកចម្រើន។ ការដឹកនាំនេះ មិនមានការបង្គាប់បញ្ជាពីណាមួយនោះឡើយ។
13. សម្តេចតេជោ ហ៊ុន សែន ទម្លាយថា សម្តេចមានអារម្មណ៍ថាកម្សត់នៅពេលធ្វើជាប្រធានអាស៊ាននាឆ្នាំ២០០២ និង២០១២ តែឆ្នាំ២០២២ កម្ពុជា មានស្ថានភាពដូចគេដូចឯង។
14. នាយឧត្តមសេនីយ៍ កែវ ពង់ ជម្រាបសម្តេចថា អត់មានវត្តមាននៅថ្ងៃទី២០ ខែមិថុនា ក្នុងពិធីប្រារព្ធខួប៤៦ឆ្នាំ នៃដំណើរឆ្ពោះទៅការផ្តួលរំលំរបបប្រល័យពូជសាសន៍ ព្រោះតែអត់មានសំបុត្រអញ្ជើញ។
15. សម្តេចតេជោ ហ៊ុន សែន អំពាវនាវឱ្យកម្មករ កម្មការិនី ត្រូវហ៊ានប្រឈមមុខជាមួយពួក «អាចង្រៃ» ដែលព្យាយាមបំផ្លាញឆ្នាំងបាយកម្មករ កម្មការិនី ដោយរារាំងមិនឱ្យមានការវិនិយោគ និងមិនឱ្យទិញទំនិញពីកម្ពុជាជាដើម។
16. សម្តេចតេជោ ហ៊ុន សែន បានថ្លែងថា ក្រុមប្រឆាំង «ចេះតែព្រុស» តែរាជរដ្ឋាភិបាលចេះតែដើរ។
17. សម្តេចតេជោ ហ៊ុន សែន ឧបត្ថម្ភថវិកា៣ម៉ឺនដុល្លារ ដល់ម្តាយទារិកា «ខន សែនចរណៃ» ដែលសម្រាលពេលចូលរួមកម្មវិធីសំណេះសំណាលនៅបាវិត សម្រាប់សងធនាគារដែលយកមកសង់ផ្ទះ។ សម្តេចតេជោ ប្រកាសជួយចិញ្ចឹមរហូតដល់អាយុ៣ឆ្នាំ ដោយឧបត្ថម្ភប្រមាណ ១លានរៀលក្នុងមួយខែ។
18. សម្តេចតេជោ ហ៊ុន សែន បានថ្លែងថា កម្ពុជាមិនរើសអើងចំពោះអ្នកស្រឡាញ់ភេទដូចគ្នា តែមិនចេញច្បាប់ឱ្យរៀបអាពាហ៍ពិពាហ៍ជាមួយគ្នានោះឡើយ។
19. សម្តេចតេជោ ហ៊ុន សែន បន្តអំពាវនាវកម្មករ និយោជិត រួមគ្នារក្សាភាពសុខសាន្តតាមរោងចក្រ និងទប់ស្កាត់ការចម្លងមេរោគអេដស៍។
20. សម្តេចតេជោ ហ៊ុន សែន បានថ្លែងថា គ្រាន់តែលោកគ្រូ សាន សុជា មកជួបសម្តេច ក៏ហាមគេដែរ។ ទង្វើនេះ នឹងធ្វើឱ្យក្រុមប្រឆាំងកាន់តែឯកោ។
21. សម្តេចតេជោ ហ៊ុន សែន ប្រកាសកម្ទេចចោលក្រុមនយោបាយជ្រុលនិយម ដើម្បីបញ្ចៀសការនាំគ្រោះដល់ជាតិ។
22. សម្តេចតេជោ ហ៊ុន សែន ផ្តាំដល់អ្នកចម្រៀងប្រយ័ត្នខ្លួនកុំឧស្សាហ៍ភ្លក់ភេសជ្ជៈប៉ូវកម្លាំង ប្រយ័ត្នទឹកនោមផ្អែម៕

Fresh News