ការជូនដំណឹង! ទូតខ្មែរនៅថៃ ប្រាប់ពលរដ្ឋឲ្យប្រយ័ត្នករណីបោកថ្មី ១ ដែលភ្ជាប់នឹងរាជវង្សខ្មែរ
ការជូនដំណឹង! ទូតខ្មែរនៅថៃ ប្រាប់ពលរដ្ឋឲ្យប្រយ័ត្នករណីបោកថ្មី ១ ដែលភ្ជាប់នឹងរាជវង្សខ្មែរ
តាមសេចក្ដីជូនដំណឹងរបស់ស្ថានទូតព្រះរាជាណាចក្រកម្ពុជា ប្រចាំព្រះរាជាណាចក្រថៃឡង់ដ៍ បានប្រកាសប្រាប់ឲ្យពលរដ្ឋខ្មែរ ដែលកំពុងស្នាក់នៅ ឬធ្វើការនៅទីនោះ ឲ្យមានការប្រុងប្រយ័ត្នករណីភូតកុហកថ្មី១ មានភ្ជាប់ខ្លួនទៅនឹងរាជវង្សខ្មែរ ដែលនាំឲ្យមានការយល់ច្រឡំ។
ស្ថានទូតខ្មែរនៅថៃ បានសរសេរថា មានប្រភពព័ត៌មានក្រៅផ្លូវការ១ បានផ្សព្វផ្សាយថា មានអ្នកអង្គម្ចាស់ ស៊ីសុវត្ថិ កុសុមៈមុនីរតនា នៃព្រះរាជាណាចក្រកម្ពុជា កំពុងស្ថិតនៅក្នុងទឹកដីថៃ រៀបចំជំនួប១ ជាមួយពលរដ្ឋខ្មែរ នៅខេត្តឈៀងរ៉ៃ ប្រទេសថៃ កាលពីថ្ងៃទី ២៩ ខែឧសភា ឆ្នាំ២០១៨ កន្លងទៅ។
ទាក់ទងនឹងព័ត៌មាននេះ ពលរដ្ឋខ្មែរ១រូប សុំមិនបញ្ចេញឈ្មោះ ដែលកំពុងធ្វើការនៅក្នុងប្រទេសថៃ បានប្រាប់ក្រុមការងារ Sabay ថា អ្នកស្រីធ្លាប់លឺដំណឹងនេះមែន។ អ្នកស្រីថា មានអ្នកស្គាល់គ្នា គេឲ្យជួយហៅកើនតៗគ្នា នឹងត្រៀមខ្លួន ដើម្បីទៅជួប ម្ចាស់ក្សត្រីខ្មែរ១អង្គ ដែលនឹងយាងមកជួបពលរដ្ឋខ្មែរ ដល់ទឹកដីថៃ។
ឆ្លើយតបនឹងរឿងនេះ ស្ថានទូតព្រះរាជាណាចក្រកម្ពុជា ប្រចាំព្រះរាជាណាចក្រថៃឡង់ដ៍ សូមទាត់ចោល និងបដិសេធ នូវព័ត៌មានឃោសនាបោកប្រាស់ ភូតកុហកខាងលើនេះ នឹងកុំចូលរួមរាល់ពិធីជួបជុំ នៅខេត្តឈៀងរ៉ៃ ប្រទេសថៃ។ ទាក់ទងនឹងសកម្មភាពខាងលើ ពលរដ្ឋខ្មែរអាចរាយការណ៍ទៅកាន់ស្ថានទូត តាមលេខ ០៨៦ ៧៩៩ ៩៩ ៥៧ និងលេខ ០៩២ ៨០៥ ០៥៦១។
ព័ត៌មានលម្អិត សូមអានសេចក្ដីជូនដំណឹង របស់ស្ថានទូតខ្មែរ ប្រចាំប្រទេសថៃ ខាងក្រោម៖
(សេចក្ដីជូនដំណឹងស្ថានទូតកម្ពុជា ប្រចាំព្រះរាជាណាចក្រថៃឡង់ដ៍)
