ខ្មែរប៉ុស្ដិ៍ Close

ប្រសាសន៍សំខាន់ៗរបស់សម្តេចតេជោ ហ៊ុន សែន អញ្ជើញប្រគល់ស្រូវពូជ ជូនកសិករជាង ៥ពាន់គ្រួសារនៅខេត្តពោធិ៍សាត់

ដោយ៖ លី វិទ្យា ​​ | ថ្ងៃអង្គារ ទី២៥ ខែតុលា ឆ្នាំ២០២២ ទស្សនៈ - នយោបាយ 195
ប្រសាសន៍សំខាន់ៗរបស់សម្តេចតេជោ ហ៊ុន សែន អញ្ជើញប្រគល់ស្រូវពូជ ជូនកសិករជាង ៥ពាន់គ្រួសារនៅខេត្តពោធិ៍សាត់ ប្រសាសន៍សំខាន់ៗរបស់សម្តេចតេជោ ហ៊ុន សែន អញ្ជើញប្រគល់ស្រូវពូជ ជូនកសិករជាង ៥ពាន់គ្រួសារនៅខេត្តពោធិ៍សាត់

នៅព្រឹកថ្ងៃអង្គារ ទី២៥ ខែតុលា​ ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញប្រគល់ស្រូវពូជប្រមាណ ៥១៤,៥០០គីឡូក្រាម ជូនកសិករប្រមាណ ៥,១៤៥គ្រួសារ រងគ្រោះដោយសារគ្រោះទឹកជំនន់នៅខេត្តពោធិ៍សាត់។

ខេត្តពោធិ៍សាត់ គឺជាខេត្តដែលបានរងការជន់លិចធ្ងន់ធ្ងរផងដែរ ដោយសារជំនន់ទឹកភ្លៀង និងទឹកហូរធ្លាក់មកពីតំបន់ដទៃទៀត។ នៅក្នុងឱកាសចែកស្រូវពូជ សម្តេចតេជោ ហ៊ុន សែន បានថ្លែងសំណេះសំណាលប្រមាណប្រមាណ៤០នាទី។ ខាងក្រោមជាខ្លឹមសារសំខាន់ៗ៖

  1. សម្តេចតេជោ ហ៊ុន សែន បានកោតសរសើរ និងវាយតម្លៃខ្ពស់ចំពោះអាជ្ញាធរ កងកម្លាំងប្រដាប់អាវុធ និងប្រជាពលរដ្ឋទាំងអស់ ដែលបានប្រឹងប្រែងរួមគ្នាដោះស្រាយ និងជម្នះបញ្ហាទឹកជំនន់។
  2. សម្តេចតេជោ ហ៊ុន សែន បានថ្លែងកោតសរសើរលោកទេសរដ្ឋមន្ត្រី គន់ គីម និងរដ្ឋមន្ត្រីកសិកម្ម ដែលបានប្រឹងប្រែងរួមគ្នាដោះស្រាយបញ្ហាទឹកជំនន់ និងការស្តារឡើងវិញនូវការធ្វើស្រែ និងដាំដុះដំណាំផ្សេងៗ។
  3. សម្តេចតេជោ ហ៊ុន សែន បានថ្លែងថា រាជរដ្ឋាភិបាលមិនបានព្រងើយកន្តើយចំពោះការរងគ្រោះរបស់ប្រជាពលរដ្ឋនោះឡើយ។ ក្នុងអាជ្ញាធរមូលដ្ឋាន សហការជាមួយអាជ្ញាធរថ្នាក់ជាតិ និងកាកបាទក្រហម បានសហការគ្នាយ៉ាងសស្រាក់សស្រាំ ដើម្បីដោះស្រាយបញ្ហា។
  4. សម្តេចតេជោ ហ៊ុន សែន បានថ្លែងថា បម្រែបម្រួលអាកាសធាតុបានបង្កើតជាបញ្ហាដ៏ធ្ងន់ធ្ងរសម្រាប់កម្ពុជា តំបន់ និងពិភពលោក។
  5. សម្តេចតេជោ ហ៊ុន សែន បានថ្លែងថា ការដោះស្រាយស្បៀងជាដំណោះស្រាយរយៈពេលខ្លី តែការផ្តល់ស្រូវពូជជូនកសិករជាដំណោះស្រាយរយៈពេលវែង។
  6. សម្តេចតេជោ ហ៊ុន សែន បានថ្លែងថា ការចែកស្រូវពូជមិនបានបែងចែករវាងដីតូ ឬធំនោះទេ គឺចែក ១០០គីឡូក្រាមក្នុងមួយគ្រួសារស្មើៗគ្នា។ សម្តេចតេជោ រំពឹងថា អ្នកដីតូចពេលសល់ស្រូវពូជអាចចែករំលែកទៅឱ្យអ្នកមានដីធំ។
  7. សម្តេចតេជោ ហ៊ុន សែន ថ្លែងរំពឹងថា ប្រជាកសិករនឹងប្រឹងប្រែងបង្កបង្កើនផលឡើងវិញ បន្ទាប់ពីបានស្រូវពូជ។
  8. សម្តេចតេជោ ហ៊ុន សែន បាននាំយកនូវព្រះរាជបណ្តាំសាកសួរសុខទុក្ខរបស់ព្រះមហាក្សត្រ និងសម្តេចម៉ែ ជូនប្រជាពលរដ្ឋរងគ្រោះទាំងអស់នៅក្នុងខេត្តពោធិ៍សាត់។
  9. សម្តេចតេជោ ហ៊ុន សែន ណែនាំអាជ្ញាធរយកចិត្តទុកដាក់លើការបែងចែកស្បៀងអាហារជូនកសិកររងគ្រោះដោយទឹកជំនន់។
  10. សម្តេចតេជោ ហ៊ុន សែន ថ្លែងអំណរគុណដល់សប្បុរសជនទាំងអស់ ដែលបានចូលរួមដោះស្រាយការលំបាករបស់ប្រជាពលរដ្ឋរងគ្រោះទឹកជំនន់ ជាមួយរាជរដ្ឋាភិបាល។ នេះជាការវប្បធម៌នៃការចែករំលែកនៅក្នុងសង្គមខ្មែរ។
  11. សម្តេចតេជោ ហ៊ុន សែន ក៏បានថ្លែងអំណរព្រះគុណ និងអរគុណដល់ព្រះសង្ឃ និងប្រជាពលរដ្ឋ ដែលបានចូលរួមដោះស្រាយបញ្ហាប្រជាពលរដ្ឋក្នុងពេលរងគ្រោះដោយទឹកជំនន់។
  12. សម្តេចតេជោ ហ៊ុន សែន បានថ្លែងថា រាជរដ្ឋាភិបាលមិនទាន់ក្ស័យធន់នោះទេ តែការចូលរួមរបស់ប្រជាពលរដ្ឋ ធ្វើឱ្យរាជរដ្ឋាភិបាលមានលទ្ធភាពកាន់តែច្រើនក្នុងការជួយប្រជាពលរដ្ឋ។
  13. សម្តេចតេជោ ហ៊ុន សែន ថ្លែងអំណរគុណប្រជាពលរដ្ឋខេត្តពោធិ៍សាត់ ក៏ដូចជានៅទូទាំងប្រទេស ដែលបានបោះឆ្នោតគាំទ្រគណបក្សប្រជាជនកម្ពុជាឱ្យឈ្នះឆ្នោតភ្លូកទឹកភ្លូកដី។ ជាពិសេសអ្នកខេត្តពោធិ៍សាត់ ដែលមានអត្រាគាំទ្រខ្ពស់លើសគេ។
  14. សម្តេចតេជោ ហ៊ុន សែន ប្រកាសថា នៅថ្ងៃម្សិលមិញមិនមានករណីឆ្លងជំងឺកូវីដ១៩នោះទេ។ នេះជាថ្ងៃទី៥ហើយ ដែលកម្ពុជាមិនមានអ្នកឆ្លងជំងឺកូវីដ១៩។
  15. សម្តេចតេជោ ហ៊ុន សែន បានថ្លែងថា ជំងឺកូវីដ១៩ បាននាំការលំបាកដល់កម្ពុជា តែការរួមគ្នាជម្នះរបស់ប្រជាពលរដ្ឋ ជាមួយការមានសុខសន្តិភាព និងស្ថិរភាពនយោបាយ ធ្វើឱ្យកម្ពុជាយកឈ្នះការលំបាកដោយសារជំងឺកូវីដ១៩។
  16. សម្តេចតេជោ ហ៊ុន សែន ប្រកាសអំពាវនាវឲ្យព្រះសង្ឃ និងប្រជាពលរដ្ឋ ក្រោកឈរប្រឆាំងជនក្បត់ជាតិដែលប្រមាថព្រះមហាក្សត្រខ្មែរ។
  17. សម្តេចតេជោ ហ៊ុន សែន បានថ្លែងថា ប៉ុន្មានថ្ងៃមុនគេ [សម រង្ស៉ី] ជេរសម្តេច តែពេលនេះគេជេររហូតដល់ព្រះមហាក្សត្រទៀត។
  18. សម្តេចតេជោ ហ៊ុន សែន ប្រកាសអំពាវនាវឱ្យប្រជាពលរដ្ឋខ្មែរក្រោកឡើងប្រឆាំងជនក្បត់ជាតិ៣ជំនាន់ សម រង្ស៉ី មិនត្រូវឱ្យជនក្បត់ជាតិនេះបំផ្លាញជាតិ បំផ្លាញសាសនា និងព្រះមហាក្សត្រនោះឡើយ៕

Fresh News

អត្ថបទទាក់ទង