ខ្មែរប៉ុស្ដិ៍ Close

    តើប្រទេសកូរ៉េខាងជើងមានមីស៊ីលប្រភេទអ្វីខ្លះ?

    ដោយ៖ លី វិទ្យា ​​ | ថ្ងៃព្រហស្បតិ៍ ទី៦ ខែតុលា ឆ្នាំ២០២២ ព័ត៌មានអន្តរជាតិ 2130
    តើប្រទេសកូរ៉េខាងជើងមានមីស៊ីលប្រភេទអ្វីខ្លះ?តើប្រទេសកូរ៉េខាងជើងមានមីស៊ីលប្រភេទអ្វីខ្លះ?

    កូរ៉េខាងជើង​បាន​បាញ់​មីស៊ីល​ឆ្លង​កាត់​ប្រទេស​ជប៉ុន​ ដោយបាន​ហោះ​ក្នុង​រយៈចម្ងាយ​ប្រហែល ៤៥០០ គីឡូម៉ែត្រ មុន​ពេល​ដែលវាធ្លាក់​ចូល​ទៅក្នុង​មហាសមុទ្រ​ប៉ាស៊ីហ្វិក។ ប្រទេសនេះ​បាន​នឹង​កំពុង​ធ្វើ​ការ​សាកល្បង​កាំជ្រួច​មីស៊ីលជា​ប្រចាំ​ ដែល​ជា​ផ្នែកមួយនៃ​កម្មវិធី​អាវុធ​របស់​ខ្លួន ក៏ប៉ុន្តែ​នេះ​គឺជា​ការ​បាញ់​លើក​ដំបូង​ឆ្លងកាត់លើ​ប្រទេស​ជប៉ុន​ បើគិតចាប់​តាំង​ពី​ឆ្នាំ ២០១៧ មក។

    កូរ៉េ​ខាងជើង​បាន​ធ្វើ​ការ​សាកល្បង​កាំជ្រួច​មីស៊ីលជាង​ ៣០ លើក​នៅក្នុង​ឆ្នាំ​នេះ ដោយ​ក្នុងនោះ ​​មីស៊ីលខ្លះ​អាច​មាន​រយៈ​ចម្ងាយ​ឆ្ងាយ​ល្មមដែល​អាច​បាញ់​រហូតដល់​សហរដ្ឋអាមេរិក។ មីស៊ីល​ទាំង​នោះ​រួម​មាន​មីស៊ីល​បាលីស្ទិក (Ballistic Missiles), មីស៊ីលបណ្ដែត (Cruise Missiles) និង​មីស៊ីល​លឿន​ជាង​សំឡេង (Hypersonic Missiles)។ មីស៊ីល Hypersonic អាចហោះក្នុងល្បឿនលឿនជាងសំឡេងច្រើនដង និងអាចហោះនៅរយៈកម្ពស់ទាបដើម្បីគេចពីការចាប់បានរបស់រ៉ាដា។

    មីស៊ីលចុងក្រោយបំផុតដែលត្រូវបានសាកល្បងពីលើប្រទេសជប៉ុន ត្រូវបានគេគិតថាជា «មីស៊ីល Hwasong-12» រយៈចម្ងាយមធ្យម ដែលអាចហោះបានចម្ងាយ ៤ ៥០០ គីឡូម៉ែត្រដែលឆ្ងាយល្មមក្នុងការអាចវាយប្រហារលើកោះ Guam របស់សហរដ្ឋអាមេរិក។

    លោក Joseph Byrne ដែលជាអ្នកស្រាវជ្រាវនៅវិទ្យាស្ថាន «Royal United Services Institute» បាននិយាយថា «ប្រទេសកូរ៉េខាងជើងបាននិងកំពុងសាកល្បងមីស៊ីលដែលមានរយៈចម្ងាយឆ្ងាយ និងឆ្ងាយខ្លាំង។ នេះគឺជាមីស៊ីលរយៈចម្ងាយឆ្ងាយបំផុតដែលកូរ៉េខាង ជើងធ្លាប់បានបាញ់រំលងពីលើប្រទេសជប៉ុន។ វាអាចត្រូវបានធ្វើឡើងនៅមុនការសាកល្បងបាញ់ក្បាលគ្រាប់នុយក្លេអ៊ែរមួយផ្សេងទៀតដែលត្រូវ បានគេព្យាករថានឹងអាចកើតមាននៅក្នុងពេលខាងមុខ»។

    កូរ៉េ​ខាង​ជើង​ក៏​បាន​និង​កំពុង​សាក​ល្បង​ «​មីស៊ីល​ផ្លោង Hwasong-14» ផងដែរ ដែលមានរយៈចម្ងាយ ៨ ០០០ គីឡូម៉ែត្រ ក៏ប៉ុន្តែការសិក្សាខ្លះបានលើកឡើងថា «វាអាចហោះបានចម្ងាយរហូតដល់ ១០ ០០០ គីឡូម៉ែត្រ ដែលអាចធ្វើឱ្យវា ហោះទៅដល់ទីក្រុងញូវយ៉ក»។ វាគឺជាមីស៊ីលផ្លោងអន្តរទ្វីប (ICBMs) ដំបូងរបស់កូរ៉េខាងជើង។

    មីស៊ីលជាច្រើន​ត្រូវ​បាន​ដាក់​តាំង​បង្ហាញ​នៅ​ក្នុង​ពិធី​ព្យុហយាត្រា​យោធា​កាលពីខែ​មករា ឆ្នាំ​២០២១

    «មីស៊ីល Hwasong-15» ត្រូវបានគេជឿថាមានរយៈចម្ងាយរហូតដល់ ១៣ ០០០ គីឡូម៉ែត្រដែលអាចហោះទៅដល់គ្រប់ទីកន្លែងទាំងអស់នៃទឹកដីរបស់សហរដ្ឋអាមេរិក។ កាលពីខែតុលា ឆ្នាំ ២០២០ ប្រទេសកូរ៉េខាងជើងបានបង្ហាញនូវមីស៊ីលផ្លោងចុងក្រោយបំផុតរបស់ខ្លួនគឺ «មីស៊ីល Hwasong-17» ដែលអាចមានរយៈចម្ងាយ ១៥ ០០០ គីឡូម៉ែត្រ ឬអាចបាញ់បានឆ្ងាយជាងនេះ។

    មីស៊ីល Hwasong-17 អាចបាញ់ក្បាលគ្រាប់បានម្ដង ៣ ទៅ ៤ គ្រាប់ ដែលនឹងធ្វើឱ្យប្រទេសមួយពិបាកក្នុងការការពារខ្លួនណាស់។ អ្នកជំនាញបាននិយាយថា «ការបង្ហាញមីស៊ីលថ្មីនេះហាក់ដូចជាការផ្ញើសារមួយទៅកាន់រដ្ឋបាលរបស់លោក Biden អំពីភាពរីកចម្រើនខាងផ្នែកយោធារបស់កូរ៉េខាងជើង»។

    កាលពីខែមីនា ឆ្នាំ ២០២១ កូរ៉េខាងជើងបានអនុវត្តការបាញ់បង្ហោះនូវ «មីស៊ីលបាលីស្ទីកតាក់ទីកចង្អុលប្រាប់ទិសស៊េរីថ្មី» (New-type Tactical Guided Projectile) ដែលអាចផ្ទុកទម្ងន់បាន ២,៥ តោន និងអាចមានសមត្ថភាពដាក់ក្បាលគ្រាប់នុយក្លេអ៊ែរបាន។ អ្នកវិភាគនៅមជ្ឈមណ្ឌល James Martin បាននិយាយថា «វាអាចមានប្រភពដើមមកពីមីស៊ីលដែលបានសាកល្បងកាលពីមុន គឺមីស៊ីល KN-23»។

    លើកចុងក្រោយ ដែលកូរ៉េខាងជើងបានសាកល្បងគ្រាប់បែកនុយក្លេអ៊ែរគឺនៅឆ្នាំ ២០១៧ ។ ការផ្ទុះរបស់វានៅទីតាំងសាកល្បង «Punggye-ri» មានកម្លាំងចន្លោះពី ១០០ ទៅ ៣៧០ គីឡូតោន។ គ្រាប់បែក ១០០ គីឡូតោនមានកម្លាំងខ្លាំងជាងគ្រាប់បែកដែលអាមេរិកទម្លាក់លើទីក្រុងហ៊ីរ៉ូស៊ីម៉ាក្នុងឆ្នាំ ១៩៤៥ រហូតដល់ទៅ ៦ ដង។

    កូរ៉េ​ខាង​ជើង​បាន​អះអាង​ថា​ «នេះ​គឺជា​អាវុធ​បរមាណូ​​​​ដ៏​មាន​ឥទ្ធិពល​បំផុត​របស់ខ្លួន»។ ទោះជាយ៉ាងណាក៏ដោយ លោក Byrne បាននិយាយថា «នៅពេលនេះកូរ៉េខាងជើងប្រហែលជាមានបំណងចង់សាកល្បងក្បាលគ្រាប់នុយក្លេអ៊ែរប្រភេទតូចជាងនេះ ក៏ប៉ុន្តែអាចមានកម្លាំងផ្ទុះស្រដៀងគ្នា»។

    ការធ្វើតេស្តក្រោមដីចំនួន ៦ លើក ត្រូវបានធ្វើឡើងកាលពីលើកមុន នៅទីតាំង Punggye-ri ។ ប៉ុន្តែ នៅក្នុងឆ្នាំ ២០១៨ ប្រទេសកូរ៉េខាងជើងបាននិយាយថា «ខ្លួននឹងបិទទីតាំងនេះ» ហើយផ្លូវក្រោមដីមួយចំនួនចូលទៅក្នុងទីតាំងនេះ ក៏ត្រូវបានបំផ្ទុះជាបន្តបន្ទាប់នៅចំពោះមុខអ្នកកាសែតបរទេសផងដែរ។

    ទោះជាយ៉ាងណាក៏ដោយ កូរ៉េខាងជើងមិនបានអញ្ជើញអ្នកជំនាញអន្តរជាតិឱ្យមកផ្ទៀងផ្ទាត់ថា «តើខ្លួនពិតជាបានបញ្ឈប់ការប្រើប្រាស់មែនដែរឬអត់» នោះទេ ហើយរូបភាពផ្កាយរណបដែលបានចេញផ្សាយកាលពីដើមឆ្នាំនេះ បានបង្ហាញថា «ការងារជួសជុលនៅទីតាំង Punggye-ri បានចាប់ផ្តើមហើយ»។

    រាល់​ការ​សាកល្បង​នុយក្លេអ៊ែរ​នៅ​ពេល​អនាគត​នៅ​ទីតាំង​នេះ នឹង​បំពាន​លើ​សេចក្តីសម្រេច​របស់​ក្រុមប្រឹក្សា​សន្តិសុខនៃ​អង្គការ​សហប្រជាជាតិ។ នៅឆ្នាំ ២០១៨ មេដឹកនាំកូរ៉េខាងជើង លោក Kim Jong-un បានសន្យាជាមួយអតីតប្រធានាធិបតីអាមេរិក Donald Trump ថា «កូរ៉េខាងជើងនឹងបំផ្លាញសម្ភារៈបរិក្ខារនុយក្លេអ៊ែរទាំងអស់របស់ខ្លួន»។

    ទោះជាយ៉ាងណាក៏ដោយ ទីភ្នាក់ងារបរមាណូរបស់អង្គការសហប្រជាជាតិបាននិយាយថា «រូបភាពផ្កាយរណបបានបង្ហាញថា កូរ៉េខាងជើងបានចាប់ផ្ដើមដំណើរការឡើងវិញនូវរ៉េអាក់ទ័រដែលផលិតសារធាតុភ្លុយតានីញ៉ូម (Plutanium) សម្រាប់ការផលិតអាវុធនុយក្លេអ៊ែរ»។

    ទីភ្នាក់ងារថាមពលអាតូមិកអន្តរជាតិ (IAEA) ក៏បាននិយាយផងដែរថា «កម្មវិធីនុយក្លេអ៊ែររបស់កូរ៉េខាងជើងកំពុងដំណើរការទៅមុខយ៉ាងពេញទំហឹង ជាមួយនឹងការងារបំបែកសារធាតុភ្លុយតានីញ៉ូម, ការចម្រាញ់សារធាតុអ៊ុយរ៉ានីញ៉ូម បូករួមនឹងសកម្មភាពផ្សេងៗទៀត»៕

    BBC News

    អត្ថបទទាក់ទង