តើសេដ្ឋកិច្ចអាស៊ានមានភាពធន់ទៅនឹងវិបត្តិហិរញ្ញវត្ថុពិភពលោកដែរឬទេ?

តើសេដ្ឋកិច្ចអាស៊ានមានភាពធន់ទៅនឹងវិបត្តិហិរញ្ញវត្ថុពិភពលោកដែរឬទេ?

ជាមួយនិងការងើបឡើងវិញយ៉ាងរឹងមាំនៃសេដ្ឋកិច្ច ក្រោយការដួលរលំបណ្តោះអាសន្នដែលបណ្តាលមកពីវីរុសកូវីដ-១៩ ចាប់តាំងពីត្រីមាសទី៤ នៃឆ្នាំ ២០២០ បណ្តាប្រទេសដែលមានទីផ្សារកំពុងរីកចម្រើនមួយចំនួននៅក្នុងតំបន់អាស៊ី កំពុងទទួលបានផលប្រយោជន៍យ៉ាងច្រើនពីការបើកតំបន់អាស៊ីឡើងវិញ។

ទោះជាយ៉ាងណាក៏ដោយ ការបើកតំបន់អាស៊ីឡើងវិញ អាចជួបប្រទះនឹងបញ្ហាប្រឈមមួយចំនួន ជាពិសេសគឺបញ្ហាតម្លៃទំនិញ ដែលនៅតែបន្តកើនឡើង ហើយធនាគារកណ្តាលរបស់បណ្តាប្រទេសសំខាន់ៗមួយចំនួនក៏កំពុងតែបង្កើនអត្រាការប្រាក់នៅក្នុងគោលនយោបាយរបស់ពួកគេផងដែរ។

ថ្លៃនាំចូលខ្ពស់ បូករួមនឹងលក្ខខណ្ឌហិរញ្ញវត្ថុអន្តរជាតិដ៏តឹងរ៉ឹងនឹងបង្កើនសម្ពាធលើជញ្ជីងទូទាត់អន្តរជាតិ (External Balances) របស់បណ្តាប្រទេសដែលមានទីផ្សារកំពុងរីកចម្រើននិងដែល ងាយរងគ្រោះ។ ដូច្នេះ វាពិតជាមានសារៈសំខាន់ក្នុងការតាមដាននិងវិភាគទៅលើវិធានការផ្សេងៗដើម្បីស្វែងរកចំណុចដែលបង្កឱ្យមានភាពងាយរងគ្រោះនៅក្នុងប្រទេសដែលមានទីផ្សារកំពុងរីកចម្រើន។

ក្រុមហ៊ុន QNB បានធ្វើការវាយតម្លៃលើភាពងាយរងគ្រោះពីមជ្ឈដ្ឋានខាងក្រៅ ដោយផ្អែកលើវិមាត្រ ២ ដែលរួមមានសមតុល្យគណនីចរន្ត និងកម្រិតទូទៅនៃទុនបម្រុងប្តូរប្រាក់បរទេសផ្លូវការ (FX)។ ប្រទេសដែលមានឱនភាពគណនីចរន្តចាំបាច់ត្រូវផ្តល់ហិរញ្ញប្បទានដល់គណនីចរន្ត ដោយប្រើដើមទុនបរទេស ឬត្រូវកាត់បន្ថយទុនបម្រុង FX ផ្លូវការរបស់ពួកគេ។

នៅក្នុងអំឡុងពេលកើតមានបញ្ហាប្រឈម ជាពិសេសនៅពេលដែលស្ថានភាពសេដ្ឋកិច្ច ឬហិរញ្ញវត្ថុសកលជួបប្រទះនឹងការលំបាក លំហូរមូលធនអាចនឹងរងនូវការជាប់គាំង ឬអាចមានការហូរបញ្ច្រាស់វិញដែលជាហេតុបង្កភាពស្មុគស្មាញកាន់តែខ្លាំងដល់ការដោះស្រាយបញ្ហាឱនភាព ហើយនេះគឺជាមូលហេតុដែលសមតុល្យគណនីចរន្តបានក្លាយជារង្វាស់ដ៏សំខាន់ក្នុងការវាយតម្លៃផលប៉ះពាល់ និងហានិភ័យពាក់ព័ន្ធនឹងលំហូរមូលធន។

ទុនបម្រុងប្តូរប្រាក់បរទេសផ្លូវការ (FX) អាចជារនាំងការពារដ៏សំខាន់ប្រឆាំងនឹងផលប៉ះពាល់ពីខាងក្រៅ។ ទោះជាយ៉ាងណាក៏ដោយ ទុនបម្រុង FX ផ្លូវការគួរតែត្រូវបានពិចារណាដោយផ្អែកលើតម្រូវការហិរញ្ញប្បទាន គណនីចរន្តរយៈពេលខ្លី បូករួមនឹងកត្តាម៉ាក្រូសំខាន់ៗផ្សេងទៀត។

មូលនិធិរូបិយវត្ថុអន្តរជាតិ (IMF) បានបង្កើតសូចនាករដ៏មានសារៈប្រយោជន៍មួយ ដែលមានឈ្មោះថា «មាត្រដ្ឋានទុនបម្រុងគ្រប់គ្រាន់របស់ IMF» ។ ទុនបម្រុង FX ផ្លូវការរបស់ប្រទេសមួយនឹងត្រូវបានចាត់ទុកថាមានកម្រិតគ្រប់គ្រាន់ នៅពេលណាដែលវាអាចគ្របដណ្តប់លើកម្រិតនៃមាត្រដ្ឋានរបស់ IMF ចន្លោះពី ១០០-១៥០% ។

ការវិភាគរបស់ក្រុមហ៊ុន QNB បានផ្តោតទៅលើស្ថានភាពគណនីចរន្ត និងទុនបម្រុង FX ផ្លូវការរបស់បណ្តាប្រទេសដែលមានសេដ្ឋកិច្ចកំពុងរីកចម្រើនធំៗចំនួន៤ របស់អាស៊ានដែលរួមមានឥណ្ឌូណេស៊ី, ថៃ, ម៉ាឡេស៊ី និងហ្វីលីពីនដើម្បីទាញនូវការសន្និដ្ឋានអំពីភាពរឹងមាំរបស់ពួកគេប្រឆាំងនឹងវិបត្តិសកល ឬវិបត្តិក្នុងតំបន់។

បើទោះបីជាមានការប្រឈមខ្លាំងទៅនឹងសេដ្ឋកិច្ចពិភពលោកបូករួមនឹងឱនភាពគណនីចរន្តតិចតួចក៏ដោយ ក៏ប្រទេសថៃនៅតែស្ថិតនៅក្នុងស្ថានភាពដ៏ល្អក្នុងការទប់ទល់នឹងការប្រែប្រួលភ្លាមៗនៃលំហូរមូលធន។ ទោះបីជាវិស័យទេសចរណ៍អន្តរជាតិ នៅតែបន្តធ្លាក់ចុះជាង ៨០% បើប្រៀបធៀបនឹងកម្រិតនៅមុនពេលកើតមានវីរុសរាតត្បាត បូករួមនឹងលក្ខខណ្ឌពាណិជ្ជកម្មកាន់តែយ៉ាប់យ៉ឺន ដោយសារតម្លៃទំនិញកាន់តែកើន ឡើងក៏ដោយ ក៏ស្ថានភាពនៅតែមានស្ថិរភាពសម្រាប់ប្រទេសថៃ។

ប្រទេសថៃមានអតិរេកគណនីចរន្តដ៏ច្រើនអស់រយៈពេលជាច្រើនឆ្នាំ និងមានថវិកា ២២០ ពាន់លានដុល្លារនៅក្នុងទុនបម្រុង FX ផ្លូវការ ដែលជាចំនួនមួយគ្របដណ្តប់រហូតដល់ ២៤៩% នៃមាត្រដ្ឋានរបស់ IMF។  ប្រទេសហ្វីលីពីនគឺជាប្រទេសខ្ចីប្រាក់បរទេសសុទ្ធ (Net External Borrower) ដែលមានន័យថា «ប្រទេសនេះបាននិងកំពុងជួបប្រទះនឹងឱនភាពគណនីចរន្ត»។

ជាមួយនឹងឱនភាពពាណិជ្ជកម្មដ៏ធំដែលបច្ចុប្បន្នកំពុងត្រូវបានទូទាត់ មួយផ្នែកដោយប្រើប្រាស់លំហូរផ្ទេរប្រាក់យ៉ាងច្រើនពីសហគមន៍កម្មករនិរទេសហ្វីលីពីន ប្រទេសនេះត្រូវបានគេរំពឹងថានឹងត្រូវជួបប្រទះនឹងឱនភាពគណនីចរន្តដែលមានទំហំស្មើនឹង ៣% នៃ GDP។ ការធ្លាក់ចុះនៃស្ថានភាពខាងក្រៅ (External Position) រហូតមកដល់ពេលនេះគឺមានទំហំធំធេងណាស់។ ទោះជាយ៉ាងណាក៏ដោយ អាជ្ញាធររូបិយវត្ថុអាចរក្សាទុនបម្រុង FX បានគ្រប់គ្រាន់ ដោយក្នុងនោះទុនបម្រុងផ្លូវការមានចំនួន ៩៩ ពាន់លានដុល្លារដែលគ្របដណ្តប់លើ ២៣០% នៃមាត្រដ្ឋានរបស់ IMF ។

ម៉ាឡេស៊ីដែលជាប្រទេសផលិតទំនិញដ៏ធំជាងគេ គឺជាប្រទេសអាស៊ានមួយទៀតដែលមានភាពធន់រឹងមាំ។ ដូចគ្នានឹងប្រទេសថៃដែរ ប្រទេសនេះមានអតិរេកគណនីចរន្តជាប់រហូតអស់រយៈពេលជាច្រើនឆ្នាំ។ ក្នុងនាមជាអ្នកនាំចេញប្រេងនិងទំនិញប្រើប្រាស់ ប្រទេសម៉ាឡេស៊ីបានទទួលរងឥទ្ធិពលជាវិជ្ជមានដោយសារភាពរឹងមាំនៃទីផ្សារទំនិញ ដែលជាហេតុនាំមកនូវអតិរេកគណនីចរន្តកាន់តែធំ។

រង្វាស់នៃទុនបម្រុងរបស់ម៉ាឡេស៊ីគឺមានចំនួនតិចជាងប្រទេសថៃ ដោយក្នុងនោះធនាគារកណ្តាលម៉ាឡេស៊ីមានទុនបម្រុង FX ចំនួន ១០៩ ពាន់លានដុល្លារដែលតិចជាងពាក់កណ្តាលនៃចំនួនដែលប្រទេសថៃមាន។ ទោះជាយ៉ាងណាក៏ដោយ ម៉ាឡេស៊ីនៅតែស្ថិតនៅក្នុងតំបន់សុវត្ថិភាព ជាមួយនឹងការគ្របដណ្តប់លើ ១២២% នៃមាត្រដ្ឋានរបស់ IMF។

ឥណ្ឌូណេស៊ី ដែលជាប្រទេសដ៏ធំជាងគេបំផុតនៅក្នុងអាស៊ាន និងដែលបានប្រឈមមុខនឹងការប៉ះទង្គិចពីខាងក្រៅដ៏ខ្លាំង ឥឡូវនេះកំពុងទទួលបានផលប្រយោជន៍យ៉ាងច្រើនពីការកើនឡើងនៃតម្រូវការទំនិញដែលបានជួយបង្កើនប្រាក់ចំណូលពីប្រភពខាងក្រៅ បើទោះបីជាតួលេខពាក់ព័ន្ធនឹងវិស័យទេសចរ នៅតែមានចំនួនទាបក៏ដោយ។ តម្លៃដ៏ខ្ពស់នៃធ្យូងថ្ម, ឧស្ម័ន និងប្រេងដូងកំពុងតែផ្តល់នូវការគាំទ្រជាពិសេសដល់ប្រទេសឥណ្ឌូណេស៊ី។

ជាក់ស្តែង ប្រទេសនេះត្រូវបានគេរំពឹងថានឹងមានអតិរេកគណនីចរន្តប្រហែល ៤,៥% នៃ GDP នៅឆ្នាំនេះ បន្ទាប់ពីបានជួបប្រទះនឹងឱនភាព ៩ ឆ្នាំជាប់ៗគ្នា។ ទោះជាយ៉ាងណាក៏ដោយ អតិរេកនេះអាចនឹងមិនមានរយៈពេលលើសពី ២ ឬ ៣ ឆ្នាំនោះទេ។ ទុនបម្រុង FX ផ្លូវការរបស់ឥណ្ឌូណេស៊ីមានចំនួន ១៣២ ពាន់លានដុល្លារ ដោយបានគ្របដណ្តប់លើ ១១១% នៃមាត្រដ្ឋានរបស់ IMF ។

សរុបមក ប្រទេសដែលមានសេដ្ឋកិច្ចធំៗនៅក្នុងអាស៊ាន មានភាពធន់រឹងមាំទៅនឹងការផ្លាស់ប្តូរភ្លាមៗ។ ភាពរឹងមាំបែបនេះគឺជាប្រភពនៃការគាំទ្រដ៏សំខាន់នៅក្នុងបរិបទនៃភាពមិនច្បាស់លាស់ខ្ពស់ ដែលបណ្តាលមកពីការរឹតបន្តឹងនៅក្នុងវិស័យហិរញ្ញវត្ថុអន្តរជាតិនិងជម្លោះភូមិសាស្ត្រនយោបាយ៕

The Peninsula Qatar