ដំណឹងល្អ! ឡានក្រុងសាធារណៈទំនើប ៨០គ្រឿង នឹងមកដល់ភ្នំពេញខែក្រោយ
ដំណឹងល្អ! ឡានក្រុងសាធារណៈទំនើប ៨០គ្រឿង នឹងមកដល់ភ្នំពេញខែក្រោយរដ្ឋាភិបាលជប៉ុន បានសន្យាផ្ដល់រថយន្តក្រុងឲ្យសាលារាជធានីភ្នំពេញ ចំនួន ១៤០គ្រឿង ស្មើនឹងតម្លៃជាង ៨លានដុល្លារ ចាប់ពីឆ្នាំ២០១៨ ដល់ ២០២០។ ក្នុងនោះ ជំហ៊ានទី១ រថយន្តក្រុងចំនួន ៨០គ្រឿង នឹងមកដល់រាជធានីភ្នំពេញនៅក្នុងអំឡុងខែមិថុនា ឆ្នាំ២០១៨ខាងមុខនេះ។ នេះបើតាមប្រភពពី Asean Infrastructure Post។
(រូបភាព៖ Asean Infrastructure Post)
រថយន្តក្រុងទំនើបជាជំនួយឥតសំណងរបស់ជប៉ុនទាំងនេះ មានបំពាក់នូវបច្ចេកវិទ្យាទំនើបដូចជា៖ ម៉ាស៊ីនត្រជាក់ អេក្រង់ LED សម្រាប់បង្ហាញជើងរថយន្តក្រុង មានទូរទស្សន៍នៅក្នុង ដើម្បីបង្ហាញពីស្ថានភាព និងទីតាំងរថយន្តក្រុង។
ដោយឡែកបើតាមការបញ្ជាក់ របស់លោក ម៉េត មាសភក្តី កន្លងមកបានឲ្យដឹងថា ការសន្យារបស់ជប៉ុន ក្នុងការផ្តល់រថយន្តក្រុងនេះ គឺក្រោយពីសាលារាជធានីភ្នំពេញ បានសិក្សា និងចរចាជាមួយភាគីជប៉ុន អស់រយៈពេលជិត៣ឆ្នាំមកហើយ។
អ្នកនាំពាក្យរូបនេះ បានអះអាងថា ជំនួយរបស់ជប៉ុននេះ គឺដើម្បីពង្រីកសេវារថយន្តក្រុង នៅរាជធានីភ្នំពេញ ឲ្យបានល្អប្រសើរជាងមុន ផ្ដល់ភាពងាយស្រួលសម្រាប់ប្រជាពលរដ្ឋរស់នៅក្នុងរាជធានីភ្នំពេញ និងកាត់បន្ថយការកកស្ទះចរាចរណ៍។
(រូបភាព៖ Asean Infrastructure Post)
គួរឲ្យដឹងដែរថា កាលពីឆ្នាំ២០១៧ ចិនក៏បានផ្ដល់ជំនួយរថយន្តក្រុងស៊េរីទំនើបចំនួន១០០គ្រឿងដែរ ដែលកំពុងធ្វើចរាចរណ៍នាបច្ចុប្បន្ននេះ៕
(រូបភាព៖ Asean Infrastructure Post)
