ដំណឹងថ្មី! ប្រវត្តិបុរាណដ្ឋានខ្មែរដ៏ល្អឯកមួយនឹងបង្ហាញខ្លូនឆាប់ៗ
ដំណឹងថ្មី! ប្រវត្តិបុរាណដ្ឋានខ្មែរដ៏ល្អឯកមួយនឹងបង្ហាញខ្លូនឆាប់ៗ
ស្រះដំរី គឺជារមណីយដ្ឋានមួយដែលក្រសួងវប្បធម៌ និងវិចិត្រសិល្បៈ កំពុងធ្វើវីដេអូឯកសារ ក្នុងគោលបំណងបង្ហាញនូវសម្រស់ដ៏ស្រស់ត្រកាល និងប្រវត្តិនៃតំបន់មួយនេះ។
បុរាណដ្ឋានដែលបានលាក់ខ្លួននៅក្នុងដែនមួយយ៉ាងជ្រៅក្នុងព្រៃភ្នំ ស្ថិតក្នុងឃុំខ្នងភ្នំ ស្រុកស្វាយលើ ខេត្តសៀមរាប មិនសូវមានអ្នកស្គាល់ ឬអ្នកទៅដល់នោះទេ។ ពេលនេះក្រសួងវប្បធម៌ និងវិចិត្រសិល្បៈ កំពុងធ្វីវីដេអូឯកសារដើម្បីផ្សព្វផ្សាយឲ្យសាធារណៈបានស្គាល់ បានដឹងពីជំនឿវប្បធម៌នៅក្នុងតំបន់មួយនេះ និងបង្ហាញប្រវត្តិ។ នេះតាមការបញ្ជាក់លោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌។
លោកបន្ថែមឲ្យដឹងថា គម្រោងវីដេអូឯកសារនេះនេះក្រសួងធ្វើមានរយៈពេល១៥ ទៅ២០នាទី ។ លោកបានបញ្ជាក់ បុរាណដ្ឋានមួយនេះពិបាកក្នុងការធ្វើដំណើរចូលទៅដល់បន្តិច ព្រោះត្រូវជិះឡាន ម៉ូតូ និងដើរកាត់ព្រៃជាដើម។ លោកបន្តថា ទម្រាំតែអាចផ្ដិតយករូបភាពបុរាណដ្ឋានដែលមានអាយុកាលរាប់ពាន់ឆ្នាំនេះ គឺត្រូវធ្វើដំណើរដល់ទៅ៣លើក ព្រោះនៅតំបន់ភ្នំតែងមានភ្លៀងធ្លាក់ញឹកញាប់។
ការលះបង់ ការតស៊ូជំនះការលំបាក និងការតាំងចិត្តដ៏មោះមុត របស់ក្រុមការងារក្នុងការផលិតលើកនេះលោកសង្ឃឹមថា វីដេអូនេះនឹងអាចជាចំណែកធ្វើឲ្យមានការចាប់អារម្មណ៍ទៅទស្សនាតំបន់ដ៏ប្រសិទ្ធនេះទាំងភ្ញៀវជាតិ និងអន្តរជាតិ។
រមណីយដ្ឋានស្រះដំរី មានចម្លាក់ថ្មភ្នំ មានរូបសត្វដំរីដ៏ធំ បែរមុខទៅទិសខាងលិចដែលមានស្រះទឹកនៅពីមុខ និងមានចម្លាក់សត្វកង្កែប តោ គោ ខ្លា នៅជិតគ្នា។ តាមអ្នកស្រាវជ្រាវជនជាតិបារាំង លោក ប៊ូល បេ (Boul Bet) សន្និដ្ឋានថា តំបន់នេះអាចមានកើតឡើងក្នុងសតវត្សទី ៩ ។ ប៉ុន្តែបើតាមសិលាចារិក ដែលបានចារក្រោមរូបសត្វដំរី មួយឃ្លាថា «ឥន្ទ្រតបតិសីហ» បង្ហាញថា អក្សរនេះមានអាយុកាលមុនសម័យអង្គរ ប្រហែលជាកើតឡើងក្នុង សតវត្សទី៨ ហើយពាក្យនេះ អាចសម្គាល់ដល់ឈ្មោះ ព្រះមហាក្សត្រ ឬជាឈ្មោះ អ្នកណាម្នាក់ដែលគេហៅថា សីហ ហើយក៏អាចជាឈ្មោះតំបន់នេះពីសម័យមុនក៏ថាបាន៕
