CDC អនុម័តឲ្យដំណើរការគម្រោងវិនិយោគចំនួន ២បន្ថែមទៀត ដែលអាចបង្កើតការងារបានជាង ១,២០០កន្លែង

CDC អនុម័តឲ្យដំណើរការគម្រោងវិនិយោគចំនួន ២បន្ថែមទៀត ដែលអាចបង្កើតការងារបានជាង ១,២០០កន្លែង

ក្រុមប្រឹក្សាអភិវឌ្ឍន៍កម្ពុជា (CDC) អនុម័តឲ្យបើកដំណើរការគម្រោងវិនិយោគថ្មីៗចំនួន ២បន្ថែមទៀត ដែលមានទុនវិនិយោគសរុបប្រមាណ ៥,៥លានដុល្លារអាមេរិក និង​អាចបង្កើតការងារបាន ១,២២៧កន្លែង។ នេះបើតាម Facebook ផ្លូវការរបស់ CDC ចុះផ្សាយនៅថ្ងៃទី១៣ ខែសីហា ឆ្នាំ២០២១។

CDC បានបញ្ជាក់ឲ្យដឹងយ៉ាងដូច្នេះថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១- COLLABORATION PACKAGING MATERIAL PRODUCTS CO., LTD : គម្រោងបង្កើតរោងចក្រផលិតគ្រឿងបន្សំកាបូប និងគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិថ្លើក ឃុំពើក ស្រុកអង្គស្នួល ខេត្តកណ្តាល មានទុនវិនិយោគប្រមាណ ២,២លានដុល្លារអាមេរិក និងអាចបង្កើតការងារបានចំនួន ២០៦កន្លែង។

២- CHASEFIRE OUTDOORS (CAMBODIA) CO., LTD : គម្រោងបង្កើតរោងចក្រកាត់ដេរសម្លៀកបំពាក់សុវត្ថិភាព ផលិតកាបូប និងឧបករណ៍សម្ភារៈសម្រាប់បោះជំរំគ្រប់ប្រភេទ ដែលមានទីតាំងវិនិយោគស្ថិតនៅភូមិពេជចង្វា ឃុំបឹងត្រាញ់ខាងជើង ស្រុកសំរោង ខេត្តតាកែវ មានទុនវិនិយោគប្រមាណ ៣,៣លានដុល្លារអាមេរិក និងអាចបង្កើតការងារបានចំនួន ១.០២១កន្លែង៕