សមាជិករដ្ឋសភា និងមន្រ្តីពាក់ព័ន្ធ ត្រូវបានធ្វើតេស្តរកមេរោគកូវីដ-១៩ មុនចូលរួមប្រជុំពេញអង្គ នៅថ្ងៃស្អែក
សមាជិករដ្ឋសភា និងមន្រ្តីពាក់ព័ន្ធ ត្រូវបានធ្វើតេស្តរកមេរោគកូវីដ-១៩ មុនចូលរួមប្រជុំពេញអង្គ នៅថ្ងៃស្អែក
ថ្នាក់ដឹកនាំ សមាជិក សមាជិការដ្ឋសភា តំណាងរាជរដ្ឋាភិបាល និងមន្រ្តីបម្រើការងារសម័យប្រជុំរដ្ឋសភាលើកទី៦ នីតិកាលទី៦ បានធ្វើតេស្តរហ័សរកជំងឺកូវីដ-១៩ ទាំងអស់គ្នា នៅថ្ងៃទី២៣ ខែមិថុនានេះ មុនចូលរួមសម័យប្រជុំពេញអង្គនៅថ្ងៃស្អែក ដើម្បីធានាសុវត្ថិភាពពីការរាតត្បាតជំងឺកូវីដ-១៩។
រដ្ឋសភាកម្ពុជា នឹងបើកកិច្ចប្រជុំពេញអង្គរបស់ខ្លួន នៅថ្ងៃទី២៤ ខែមិថុនា ឆ្នាំ២០២១ ស្អែកនេះ ដើម្បីបោះឆ្នោតផ្តល់សេចក្តីទុកចិត្តលើ បេក្ខជនប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក ប្រាជ្ញ ចន្ទ ដែលត្រូវជំនួសតំណែង លោក ស៊ិក ប៊ុនហុក ដែលលាលែងពីតំណែង។ ក្រៅពីរបៀបវារៈសំខាន់នេះ កិច្ចប្រជុំពេញអង្គនេះ ក៏មានរបៀបវារៈមួយចំនួនទៀតដែររួមមាន៖
- ព្រះរាជសាររបស់ព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជូនសម័យប្រជុំរដ្ឋសភា លើកទី៦ នីតិកាលទី៦
- របាយការណ៍សង្ខេបស្តីពីសកម្មភាពការងាររបស់រដ្ឋសភា ចន្លោះសម័យប្រជុំរដ្ឋសភាលើកទី៥ និងលើកទី៦ នីតិកាលទី៦
- ការសម្រេចអំពីសុពលភាពនៃអាណត្តិរបស់បេក្ខជនជាប់ឆ្នោតតំណាងរាស្រ្តនៃរដ្ឋសភា នីតិកាលទី៦ ចំនួនពីររូប ជំនួសសមាជិកដែលបានលាលែង ដែលមានលោក ខឹម ច័ន្ទគីរី តំណាងរាស្រ្តមណ្ឌលខេត្តកណ្តាល ជំនួស លោក ង៉ោ សុវណ្ណ ដែលបានសុំលាលែង និងលោក ម៉ែន កួន តំណាងរាស្រ្តមណ្ឌលខេត្តត្បូងឃ្មុំ ជំនួស លោក ប្រាជ្ញ ចន្ទ ដែលបានសុំលាលែង និងការបោះឆ្នោតជ្រើសតាំង លោកជំទាវ ពៅ សុភាព ជាសមាជិកគណៈកម្មការនីតិកម្ម និងយុត្តិធម៌ នៃរដ្ឋសភា។
ចំណែកសេចក្តីព្រាងច្បាប់ដែលនឹងលើកយកមកពិភាក្សា និងអនុម័តនៅក្នុងសម័យប្រជុំរដ្ឋសភា លើកទី៦ នីតិកាលទី៦ នោះរួមមាន៖
- សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្មេថេក ខូ អិលធីឌី សម្រាប់គម្រោងអភិវឌ្ឍខ្សែបណ្តាញបញ្ជូនអគ្គិសនី តង់ស្យុង ៥០០គីឡូវ៉ុល ពីខេត្តបាត់ដំបង ទៅកាន់ព្រំដែនកម្ពុជា-ថៃ
- សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្មេថេក ខូ អិលធីឌី សម្រាប់គម្រោងអភិវឌ្ឍខ្សែបណ្តាញបញ្ជូនអគ្គិសនី តង់ស្យុង ៥០០គីឡូវ៉ុល ពីរាជធានីភ្នំពេញ ទៅកាន់ព្រំដែនកម្ពុជា-ឡាវ
- សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន អគ្គិសនីវៀតណាមនៃសាធារណរដ្ឋសង្គមនិយមវៀតណាម សម្រាប់ធានាលើការទិញថាមពលអគ្គិសនីពីប្រទេសវៀតណាម។
- និងសេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ឆាយណា ណេសិនណល ហេវី ម៉ាស៊ីនណឺរី ខបភើរេសិន សម្រាប់គម្រោងអភិវឌ្ឍវារីអគ្គិសនីស្ទឹងតាតៃលើ អានុភាព ១៥០មេហ្កាវ៉ាត់ ខេត្តកោះកុង៕
