ខ្មែរប៉ុស្ដិ៍ Close

    ព្រះមហាក្សត្រ តែងតាំងលោក ហឿន សំនៀង ជានាយកវិទ្យាស្ថាន «តេជោសែនសាធារណការ និងដឹកជញ្ជូន»

    ដោយ៖ លី វិទ្យា ​​ | ថ្ងៃចន្ទ ទី១៤ ខែមិថុនា ឆ្នាំ២០២១ ព័ត៌មានទូទៅ 1658
    ព្រះមហាក្សត្រ តែងតាំងលោក ហឿន សំនៀង ជានាយកវិទ្យាស្ថាន «តេជោសែនសាធារណការ និងដឹកជញ្ជូន»ព្រះមហាក្សត្រ តែងតាំងលោក ហឿន សំនៀង ជានាយកវិទ្យាស្ថាន «តេជោសែនសាធារណការ និងដឹកជញ្ជូន»

    ព្រះមាហាហក្សត្រខ្មែរ ព្រះករុណា ព្រះបាទ សម្តេចព្រះបរមនាថ នរោត្តម សីហនមុនី បានសព្វព្រះរាជហឫទ័យត្រាស់បង្គាប់តែងតាំង លោក ហឿន សំនៀង ជានាយកវិទ្យាស្ថាន «តេជោសែនសាធារណការ និងដឹកជញ្ជូន» ដែលជាវិទ្យាស្ថានបណ្តុះបណ្តាលលើជំនាញសាងសង់ផ្លូវ និងស្ពានដំបូងគេនៅកម្ពុជា។

    ការត្រាស់បង្គាប់តែងតាំងបានធ្វើឡើងតាមព្រះរាជក្រឹត្យដែលប្រថាប់ព្រះរាជលញ្ជករដោយព្រះមហាក្សត្រខ្មែរ កាលពីថ្ងៃទី១២ ខែមិថុនា កន្លងទៅនេះ។ ក្នុងព្រះរាជក្រឹត្យ បានគូសបញ្ជាក់ថា ការតែងតាំងបានធ្វើឡើងក្រោយមានការក្រាបង្គំទូលថ្វាយពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា។

    លោក ហឿន សំនៀង គោរពថ្លែងអំណរព្រះគុណ និងអរគុណយ៉ាងជ្រាលជ្រៅចំពោះព្រះមហាក្សត្រខ្មែរ ក៏ដូចជាសម្តេចេជោ ហ៊ុន សែន ដែលបានទុកព្រះទ័យ និងទុកចិត្ត ប្រគល់តួនាទីភារកិច្ចឱ្យរូបលោកដឹកនាំលើការងារដ៏មានសារៈសំខាន់មួយនេះ។

    លោក ហឿន សំនៀង ក៏បានថ្លែងអំណរគុណដល់លោកទេសរដ្ឋមន្ត្រី ស៊ុន ចាន់ថុល ដែលតែងតែបង្ហាត់បង្ហាញ បណ្តុះបណ្តាល ក៏ដូចជាផ្តល់ឱកាសដល់រូបលោក ក្នុងការបំពេញការងារនៅក្រសួងសាធារណការ និងដឹកជញ្ជូន។

    លោក ហឿន សំនៀង បានបង្ហាញតាំងចិត្តខ្ពស់ក្នុងការបំពេញការងារថ្មីនេះឱ្យទទួលបានលទ្ធផលល្អប្រសើរ ដើម្បីបង្កើនធនធានមនុស្សសម្រាប់អភិវឌ្ឍសង្គមជាតិ ជាពិសេសលើវិស័យហេដ្ឋារចនាសម្ព័ន្ធ ដែលជាបំណងប្រាថ្នាដ៏ធំធេងរបស់រាជរដ្ឋាភិបាលកម្ពុជា។

    សូមបញ្ជាក់ថា មុនទទួលបានការទទួលបានការតែងតែងជានាយកវិទ្យាស្ថានតេជោសែន សាធារណការ និងដឹកជញ្ជូន លោក ហឿន សំនៀង ជាអគ្គនាយករងនៃអគ្គនាយកដ្ឋានរដ្ឋបាល និងហិរញ្ញវត្ថុក្រសួងសាធារណការ និងដឹកជញ្ជូន ជានាយករងខុទ្ទកាល័យលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

    លោក ហឿន សំនៀង ជាស្ថាបនិក និងជាអតីតនាយកប្រតិបត្តិសមាគមជីវិត និងក្តីសង្ឃឹម មានទីតាំងនៅវត្តដំណាក់ ខេត្តសៀមរាប (www.lifeandhopeangkor.org) ដែលបានជួយកុមារកំព្រា កុមារគ្រួសារក្រីក្រ យុវជនយុវតី ស្ត្រីរងគ្រោះ និងងាយរងគ្រោះ ឱ្យមានជំនាញ និងបានចូលរៀនសិក្សាចប់ថ្នាក់ឧត្តមសិក្សា តាមរយ:គម្រោងនានា របស់សមាគម រួមមានសាលាបណ្តុះបណ្តាលវិជ្ជាជីវ:កាត់ដេរ គម្រោងលើកកំពស់សម្រាប់សិស្សស្រីក្រីក្រកម្រិតវិទ្យាល័យ សាលាភាសារបរទេសវត្ដដំណាក់ ភូមិកុមារអភិវឌ្ឍន៍(មណ្ឌលក្មេងកំព្រា) និងគម្រោងអាហារូបករណ៍សម្រាប់ព្រះសង្ឃ។

    លោក ហឿន សំនៀង ជាអតីតអ្នកបួសខ្មែរមួយរូប ដែលធ្លាប់បួសរៀនជ្រៅជ្រះ ក្នុងសំណាក់ព្រះពុទ្ធសាសនា អស់រយ:ពេល ១៩ព្រះវស្សា នៅវត្ដដំណាក់ និងបានចូលរួមសកម្មភាពសង្គម និងព្រះពុទ្ធសាសនាទាំងជាតិ និងអន្តជាតិ ជាច្រើនផងដែរ។

    លោក ហឿន សំនៀង បានបញ្ចប់ការសិក្សាថ្នាក់បរិញ្ញាបត្រជាន់ជាន់ខ្ពស់ជំនាញរដ្ឋបាលសាធារណ: ពីសកលវិទ្យាល័យហាវឺដ (Harvard University, Kennedy School of Governemnt 2013) សហរដ្ឋអាមេរិក និងបរិញ្ញាបត្រជំនាញគ្រប់គ្រងពីសាកលវិទ្យាល័យសិនអែមប្រុស (St. Ambrose University) រដ្ឋអាយូវ៉ា សហរដ្ឋអាមេរិក។ កាលនោះ លោកនៅជាព្រះសង្ឃនៅឡើយ។

    សូមបញ្ជាក់ដែរថា វិទ្យាស្ថានតេជោសែនសាធារណាការ និងដឹកជញ្ជូន ជាវិទ្យាស្ថានបណ្តុះបណ្តាលជំនាញសាងសង់ផ្លូវ និងស្ពាន ក៏ដូចហេដ្ឋារចនាសម្ព័ន្ធនានាលើកដំបូងនៅកម្ពុជា។ ក្រសួងសាធារណការ និងដឹកជញ្ជូន បានសាងសង់ និងសម្ពោធជាផ្លូវការនូវវិទ្យាស្ថានតេជោសែន សាធារណការ និងដឹកជញ្ជូនកាលពីថ្ងៃទី២២ ខែមករា ឆ្នាំ២០២១ ក្រោមអធិបតីភាពដ៍ខ្ពង់ខ្ពស់បំផុតរបស់សម្តេចតេជោ ហ៊ុន សែន។

    វិទ្យាស្ថានបានបើកទទួលនិស្សិតជំនាន់ទី១ ចំនួន ១៩១នាក់ បាននិងកំពុងសិក្សាតាមប្រព័ន្ធអនឡាញលើជំនាញ ចំនួន៦ ក្នុងដេប៉ាតឺម៉ង់ចំនួន៣ រួមមាន៖

    1. ដេប៉ាតឺម៉ង់សំណង់ សាធារណការ៖ លើជំនាញសំណង់ផ្លូវ ថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ, និងជំនាញប្រព័ន្ធចម្រោះទឹកកខ្វក់។
    2. ដេប៉ាតឺម៉ង់គ្រប់គ្រងដឹក ជញ្ជូន និងភស្តុភារកម្ម៖ លើជំនាញសេដ្ឋកិច្ចនិងគ្រប់គ្រងដឹកជញ្ជូនផ្លូវគោក និងជំនាញគ្រប់គ្រងភស្ដុភារកម្ម និងខ្សែច្រវ៉ាក់ផ្គត់ផ្គង់
    3. ដេប៉ាតឺម៉ង់នាវាចរណ៍៖ លើជំនាញបរិបាលនាវា និងម៉ាស៊ីននាវា ដែលកម្ម វិធីសិក្សា ពេញមួយថ្ងៃ (ព្រឹក/រសៀល) ៥ថ្ងៃក្នុងមួយសប្តាហ៍ (ចន្ទ-សុក្រ) ព្រឹកចាប់ពីម៉ោង៧.០០ ដល់ម៉ោង១១.០០ និងរសៀលចាប់ពីម៉ោង១.០០ ដល់ម៉ោង៥.០០ល្ងាច៕