គ្រូ U21កម្ពុជា សង្ឃឹមជួយក្រុមលើកពានរង្វាន់អន្តរជាតិនៅក្រៅប្រទេសជាលើកដំបូង
គ្រូ U21កម្ពុជា សង្ឃឹមជួយក្រុមលើកពានរង្វាន់អន្តរជាតិនៅក្រៅប្រទេសជាលើកដំបូង
លោក ប្រាក់ សុវណ្ណារ៉ា គ្រូបង្វឹក U21កម្ពុជា បានឱ្យដឹងនៅថ្ងៃទី៤ឧសភានេះថា លោកពិតជាមានក្តីរំពឹងក្នុងការជួយក្រុម ឲ្យប្រកួតឈ្នះទីម័រខាងកើត នៅវគ្គផ្តាច់ព្រ័ត្រពានរង្វាន់ Hassanal Bolkiah Trophy 2018 នៅព្រុយណេ ដើម្បីគ្រងជើងឯកពានរង្វាន់អន្តរជាតិដែលលេងនៅក្រៅប្រទេសជាលើកដំបូង។
គួរបញ្ជាក់ថា ក្រុម U21 កម្ពុជា នឹងប្រកួតជាមួយក្រុម U21 ទីម័រខាងកើត នៅក្នុងវគ្គផ្តាច់ព្រ័ត្រពានរង្វាន់នេះ នាវេលាម៉ោង ៧:១៥នាទីយប់ថ្ងៃទី៥ ខែឧសភា ឆ្នាំ២០១៨។
ចំណុចដែលធ្វើឲ្យលោកមានក្ដីរំពឹងគឺ ដោយសារកម្លាំងចិត្តកីឡាករ និងសមត្ថភាពកូនក្រុមលោកមានភាពល្អប្រសើរ ហើយមិនមានបញ្ហារបួសនោះទេ។
ជាមួយគ្នានោះលោកក៏មានការសោកស្ដាយ ដែល ម៉ាត់ ណូរុន មានភាគរយខ្ពស់ក្នុងការមិនបានជួយជម្រើសជាតិនាជំនួបដ៏សំខាន់មួយនេះ ដោយសារតែរបួសចង្កា។
ក្រុមជម្រើសជាតិ U21 កម្ពុជា បានឡើងទៅកាន់វគ្គផ្ដាច់ព្រ័ត្រ ដោយសារទម្លាក់ក្រុមបាល់ទាត់ U21 មីយ៉ាន់ម៉ា ២-១ នៅវគ្គពាក់កណ្ដាលផ្ដាច់ព្រ័ត្រកាលពីថ្ងៃទី២ ខែឧសភា ឆ្នាំ២០១៨៕
ប្រភព៖ ខ្លីៗ
