យុវជនកម្ពុជា៥នាក់កំពុងលេចធ្លោគួរឲ្យចាប់អារម្មណ៍
យុវជន ស៊ីន កក្កដា របស់ភ្នំពេញក្រោនស្របពេលកីឡាករកម្ពុជាពេញវ័យមួយចំនួនហាក់ស្ងប់ស្ងាត់ពីការចាប់អារម្មណ៍របស់មហាជនជាអ្នកតាមកីឡាបាល់ទាត់ ក៏មានកីឡាករជាយុវជនមួយចំនួនកំពុងលេចធ្លោទាំងជម្រើសជាតិ លីគកំពូលកម្ពុជា និងពានរង្វាន់សម្តេចតេជោ ហ៊ុន សែន។ ថ្ងៃនេះយើងសូមលើកយកយុវជន៥នាក់កំពុងលេចធ្លោគួរឲ្យកត់សំគាល់៖
១-យុវជន ឃាង ម៉េងហ៊ួ របស់ព្រះខ័នរាជស្វាយរៀង
ខ្សែបម្រើប្រយុទ្ធរបស់របស់ជម្រើសជាតិកម្ពុជាក្រោមអាយុ១៩ឆ្នាំ ឃាង ម៉េងហួ ទើបត្រូវបានមហាជនចាប់អារម្មណ៍ថ្មីៗនេះទេ បន្ទាប់ពីរូបគេស៊ុតបាន៤គ្រាប់ក្នុងនោះ៣គ្រាប់ពេលកម្ពុជាឈ្នះប៊្រុយណេ ៥-០ និង១គ្រាប់ទៀតពេលកម្ពុជាឈ្នះ ទីម័រខាងកើត ២-១ នៃពានពាន AFF U-19 Championship 2018 នៅឥណ្ឌូណេស៊ី។
រឿងគួរឲ្យចាប់អារម្មណ៍មួយទៀត រូបគេត្រូវបានប្តូរចូលពាក់កណ្តាលវគ្គទី១នៃការប្រកួត១៦ក្រុមចុងក្រោយរវាងព្រះខ័នរាជស្វាយរៀង និងវិសាខាជើងទី២នៅស្តាតចាស់។ ពេលនោះរូបគេបានញាក់បាល់ដាច់ចង្កេះខ្សែការពារវិសាខាពីរបីនាក់បញ្ជូនបាល់ឲ្យ លី សារ័ត្ន ស៊ុតចូលតាមស្មើ ១-១ ដែលសរុបទាំងពីរជើង ស្វាយរៀងឈ្នះ ២-១ ឡើងវគ្គ៨ក្រុមចុងក្រោយពានសម្តេចតេជោ ហ៊ុន សែន។
២-យុវជន ម៉ាត់ ណូរ៉ុន របស់អគ្គិសនីកម្ពុជា
យុវជនខ្មែរ-ឥស្លាម ម៉ាត់ ណូរ៉ុន ជាសំណព្វចិត្តរបស់គ្រូបង្វឹកលោក ប្រាក់ វុទ្ធី ក្នុងការរកគ្រាប់បាល់ឲ្យក្រុម អគ្គិសនីកម្ពុជាទាំងក្នុងលីគ និងពានរង្វាន់សម្តេចតេជោ ហ៊ុន សែន។ រូបគេស៊ុតបាន២គ្រាប់ក្នុងការប្រកួតលីគកំពូលកម្ពុជាសប្តាហ៍ទី១៤ នៅពេលអគ្គិសនីកម្ពុជាចាញ់ព្រះខ័នរាជស្វាយរៀង ៤-២។
៣-យុវជន ណារ៉ុង កក្កដា របស់ក្រសួងការពារជាតិ
យុវជនរបស់ក្រសួងការពារជាតិរូបនេះត្រូវបានអ្នកគាំទ្របាល់ទាត់កម្ពុជាចាប់អារម្មណ៍ខ្លាំងនៅពេលដែលរូបគេស៊ុត២គ្រាប់ម្នាក់ឯងជួយឲ្យក្រុមជម្រើសជាតិក្រោមអាយុ២២ឆ្នាំឈ្នះមីយ៉ាន់ម៉ា ២-១ នៃពានរង្វាន់ស្តេចប៊្រុយណេដែលជួយកម្ពុជាឡើងវគ្គផ្តាច់ព្រ័ត្រ។ ថ្មីៗកន្លងទៅនេះ ក្នុងពានរង្វាន់ AFF U-19 Championship 2018 នៅឥណ្ឌូណេស៊ី ណារ៉ុង កក្កដា រកបាន២គ្រាប់ជួយកម្ពុជាឈ្នះប្រ៊ុយណេ ៥-០។ បន្ទាប់ត្រឡប់មកពីឥណ្ឌូណេស៊ី រូបគេក៏បានរួមចំណែកជួយក្រសួងការពារជាតិឡើងវគ្គ៨ក្រុមចុងក្រោយនៃពាន Hun Sen Cup បន្ទាប់ពីស៊ុតបាន១គ្រាប់ជួយការពារជាតិឈ្នះអាស៊ីអឺរ៉ុប ៧-១ ក្នុងជើងទី២។
៤-យុវជន ស៊ីន កក្កដា របស់ភ្នំពេញក្រោន
ស៊ីន កក្កដា បានក្លាយជាសមាជិកវ័យក្មេងដ៏សំខាន់សម្រាប់ភ្នំពេញក្រោនទាំងក្នុងលីគ និងពានរង្វាន់សម្តេចតេជោ ហ៊ុន សែន។ ប្រកួតជើងទី២ជាមួយអគ្គិសនីកម្ពុជា រូបគេស៊ុតបាន២គ្រាប់ជួយភ្នំពេញក្រោន ឈ្នះ ៤-០ ឡើងវគ្គ៨ក្រុមចុងក្រោយនៃពានរង្វាន់សម្តេចតេជោ ហ៊ុន សែន។ យ៉ាងណារូបគេមិនបានជួយជម្រើសជាតិអាយុក្រោម១៩ឆ្នាំពាន AFF U-19 Championship 2018 ទេដោយសារភ្នំពេញក្រោនត្រូវការរូបគេលេងលីគកាលពីប៉ុន្មានសប្តាហ៍កន្លងទៅ។
៥- យុវជន សាន គឹមហេង របស់វិសាខា
អតីតយុវជននៅសាលាបាល់ទាត់ជាតិបាទី សាន គឹមហេង ជាកីឡាករកម្ពុជាគួរឲ្យចាប់អារម្មណ៍ជាងគេក្នុងលីគកម្ពុជាពីការរកគ្រាប់បាល់។ ជារឿយៗ រូបគេរកគ្រាប់បាល់បានជួយចំណូលថ្មីវិសាខាទទួលបានជ័យជម្នះជាបន្តបន្ទាប់នៃការប្រកួតក្នុងលីគ។ យុវជនរូបនេះក៏សមាជិកសំខាន់ម្នាក់នៃក្រុមជម្រើសជាតិកម្ពុជាអាយុក្រោម១៩ឆ្នាំចូលរួមប្រកួតពានរង្វាន់ AFF U-19 Championship 2018 នៅប្រទេសឥណ្ឌូណេស៊ី៕
អត្ថបទ៖ សប្បាយ
