កម្ពុជាទទួលបានភ្ញៀវទេសចរជាង ៥ម៉ឺននាក់ នៅចុងសប្តាហ៍ទីបី នៃខែឧសភានេះ
កម្ពុជាទទួលបានភ្ញៀវទេសចរជាង ៥ម៉ឺននាក់ នៅចុងសប្តាហ៍ទីបី នៃខែឧសភានេះ
គិតត្រឹមសប្តាហ៍ទីបីនៃខែឧសភានេះ បន្ទាប់ពីរាជរដ្ឋាភិបាលបានអនុញ្ញាតឱ្យបើក ដំណើរការរមណីយដ្ឋានទូទាំងប្រទេសឡើងវិញ ចំនួនភ្ញៀវទេសចរសរុបបានកើនឡើង ៦.១១ភាគរយ ធៀបនឹងចុងសប្តាហ៍កន្លងទៅ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍កាលពីថ្ងៃទី២៤ ខែឧសភា ឆ្នាំ២០២១ថា នៅចុងសប្តាហ៍ទីបីនៃខែឧសភា គឺចាប់ពីថ្ងៃទី២២ ដល់ថ្ងៃទី២៣ ខែ ឧសភា ឆ្នាំ២០២១ នៅទូទាំងប្រទេសកម្ពុជាទទួលបានភ្ញៀវទេសចរសរុប ៥២,៨៩១នាក់ កើន ឡើង ៦.១១ភាគរយ ធៀបនឹងចុងសប្តាហ៍កន្លងទៅ ក្នុងនោះមានភ្ញៀវជាតិ ៥២,២៤៧នាក់ កើនឡើង ៥.៨៤ភាគរយ និងភ្ញៀវបរទេសផ្ទៃក្នុង ៦៤៤នាក់ កើនឡើង ១៣.៧៨ភាគរយ។
ឯកឧត្តមរដ្ឋមន្ត្រីបានបន្តថា រយៈពេលបួនសប្តាហ៍ បន្ទាប់ពីរាជរដ្ឋាភិបាលបាន អនុញ្ញាតឱ្យបើកដំណើរការរមណីយដ្ឋានទូទាំងប្រទេសឡើងវិញ ភ្ញៀវសរុបមាន ចំនួនប្រមាណ ១៣១,៤៩០នាក់។ គោលដៅទេសចរណ៍សំខាន់ៗដែលមាន ភ្ញៀវទេសចរ ច្រើនជាងគេនាចុងសប្តាហ៍កន្លងមកនេះមាន៖ ខេត្តកំពតចំនួន១០,៩៤២នាក់, ខេត្តកែបចំនួន ៧,២៥៧នាក់, ខេត្តបាត់ដំបងចំនួន ៦,៩៣០នាក់, ខេត្តសៀមរាបចំនួន ៦,០៣៣នាក់, ខេត្តកំពង់ស្ពឺចំនួន ៣,៨៩០នាក់, ខេត្តព្រះសីហនុចំនួន ៣,២១៦នាក់ និងខេត្តពោធិ៍សាត់ ចំនួន២,៧៥៣នាក់។
ឯកឧត្តមរដ្ឋមន្ត្រី ថោង ខុន បានបង្ហាញការកត់សម្គាល់ថា ចលនាភ្ញៀវទេសចរនេះ មិនមានការប្រែប្រួលខ្លាំងទេធៀបនឹងសប្តាហ៍កន្លងមក ពោលគឺភ្ញៀវភាគច្រើននៅតែជាភ្ញៀវ ក្នុងខេត្តនៅឡើយ ហើយភ្ញៀវទេសចរពីភ្នំពេញនៅមិនទាន់មានចំនួនច្រើននៅឡើយ។
ឯកឧត្តមថា ចំនួនភ្ញៀវទេសចរក្នុងរយៈពេល ៤សប្តាហ៍កន្លងមកនេះ (បន្ទាប់ពី រាជរដ្ឋាភិបាលបានបើកដំណើរការឡើងវិញ) ហាក់មានការកើនឡើងយឺតនៅឡើយ ដោយ សារស្ថានភាពជំងឺកូវីដ-១៩ មានការកើនឡើងនៅតាមខេត្តមួយចំនួន ដែលធ្វើឱ្យអាជ្ញាធរនៅ បន្តប្រយ័ត្នប្រយែងខ្លាំង ក្នុងការបើកទទួលភ្ញៀវទេសចរនៅតាមគោលដៅមួយចំនួន។
ឯកឧត្តមរដ្ឋមន្ត្រីបានបន្តថា រមណីយដ្ឋាន និងគោលដៅទេសចរណ៍ទាំងអស់នៅ តែបន្តខិតខំយកចិត្តទុកដាក់ គោរពអនុវត្តនូវគោលការណ៍ ៣កុំ ៣ការពារ យ៉ាងខ្ជាប់ខ្ជូន។ ព្រមជាមួយនោះ ក៏មានរមណីយដ្ឋានខ្លះបានដាក់ចេញនៅគោលនយោបាយ បញ្ចុះតម្លែសេវាមួយចំនួនដើម្បីលើកទឹកដល់ភ្ញៀវទេសចរ ដែលបានទទួលការចាក់វ៉ាក់សាំង រួចរាល់ផងដែរ ដូចជារមណីយដ្ឋានវីគិរីរម្យ (Vkirirom) ក្នុងខេត្តកំពង់ស្ពឺ (បញ្ចុះតម្លៃ ២៥ភាគរយ សម្រាប់បន្ទប់ស្នាក់នៅ) រមណីយដ្ឋានកន្លែងបាញ់ធ្នូបន្ទាយជ័យ ៨០២ ក្នុងខេត្តសៀមរាប (បញ្ចុះតម្លៃ ២០ភាគរយ សម្រាប់ការបាញ់ធ្នូ និង ១០ភាគរយ សម្រាប់ការទទួលអាហារ) ជាដើម៕
