ក្រសួងសុខាភិបាល ប្រកាសអំពីករណីជនជាតិចិនម្នាក់ អាយុ៤២ឆ្នាំ ស្លាប់ដោយសារជំងឺកូវីដ-១៩
ក្រសួងសុខាភិបាល ប្រកាសផ្លូវការពីករណីជនជាតិចិនម្នាក់ អាយុ៤២ឆ្នាំ រស់នៅក្នុងអគារ Prince Tower សង្កាត់វាលវង់ រាជធានីភ្នំពេញ បានស្លាប់ដោយសារជំងឺកូវីដ-១៩ នៅយប់ថ្ងៃទី០៤ ខែមេសា ឆ្នាំ២០២១។
ក្រសួងសុខាភិបាល បានបញ្ជាក់ថា អ្នកជំងឺម្នាក់នេះ ត្រូវបានរកឃើញវិជ្ចមានជំងឺកូវីដ-១៩ នៅថ្ងៃទី២៧ ខែមីនា ឆ្នាំ២០២១ ហើយត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ ដោយសារតែស្ថានភាពអ្នកជំងឺមានសភាពធ្ងន់ធ្ងរតាំងពីចូលសម្រាកពេទ្យដំបូង តម្រូវឱ្យក្រុមគ្រូពេទ្យប្រើប្រាស់ម៉ាស៊ីនជំនួយផ្លូវដង្ហើមតាំងពីថ្ងៃចូលសម្រាកពេទ្យដំបូង ទោះបីជាក្រុមគ្រូពេទ្យបានខិតខំជួយសង្គ្រោះតាមលក្ខណៈបច្ចេកទេសយ៉ាងណាក៏ដោយ ក៏មិនអាចជួយអ្នកជំងឺបាន ហើយស្ថានភាពអ្នកជំងឺកាន់តែធ្ងន់ធ្ងរឡើងៗ ដែលបណ្តាលឱ្យគាត់ស្លាប់បាត់បង់ជីវិត នៅថ្ងៃទី០៤ ខែមេសា ឆ្នាំ២០២១ វេលាម៉ោង២២៖០០នាទី។
ក្រសួងសុខាភិបាល បានបញ្ជាក់បន្ថែមទៀតថា៖ «ការសន្និដ្ឋានរប់សក្រុមគ្រូពេទ្យ៖ បុរសជនជាតិចិន អាយុ៤២ឆ្នាំ ខាងលើនេះ បានស្លាប់ដោយសារខ្សោយសួតធ្ងន់ធ្ងរ និងរលាកសួតសងខាងដោយសារជំងឺកូវីដ-១៩»។
គិតរហូតមកដល់ពេលនេះ កម្ពុជារកឃើញអ្នកឆ្លងជំងឺកូវីដ-១៩ សរុបចំនួន២៧៥២នាក់ ក្នុងនោះព្យាបាលជាសះស្បើយចំនួន១៧៤៧ និងស្លាប់សរុប២១នាក់៕
