ឥណ្ឌូណេស៊ី ប្រកាសពីភាពអាសន្ននៅពេលដែលចំនួនអ្នកស្លាប់ដោយកូវីដ១៩ ហក់ឡើងខ្ពស់
ឥណ្ឌូណេស៊ី ប្រកាសពីភាពអាសន្ននៅពេលដែលចំនួនអ្នកស្លាប់ដោយកូវីដ១៩ ហក់ឡើងខ្ពស់
មេដឹកនាំឥណ្ឌូណេស៊ីលោកជូកូ វីដូដូ បានប្រកាសពីភាពអាសន្ន នៅថ្ងៃអង្គារ ទី៣១ មីនា ខណៈពេលដែលចំនួនអ្នកស្លាប់ដោយសារវីរុសកូវីដ-១៩ ហក់ឡើងខ្លាំងនៅក្នុងប្រទេស។ តែទោះជាបែបនេះក្តី លោកជូកូ វីដូដូ បានបដិសេធចំពោះការអំពាវនាវឲ្យចាត់វិធានការបិទប្រទេសទាំងមូល។
រដ្ឋបាលរបស់លោកប្រធានាធិបតីឥណ្ឌូណេស៊ីជូកូ វីដូដូ បានទទួលរងការរិះគន់យ៉ាងខ្លាំង ចំពោះការបដិសេធមិនព្រមបិទទ្វារចាក់សោការធ្វើដំណើរចេញចូលក្នុងទីក្រុងធំៗ រួមទាំងរដ្ឋធានីហ្សាការតា ដែលមានប្រជាជនប្រមាណ ៣០ លាននាក់។ គឺនៅហ្សាការតានេះហើយ ដែលមានចំនួនអ្នកស្លាប់ដោយសារវីរុសកូវីដ-១៩ ច្រើនជាងគេបំផុត នៅក្នុងទឹកដីនៃប្រទេសឥណ្ឌូណេស៊ី។
វិធានការបិទទីក្រុងធំៗ ឬក៏បិទប្រទេសទាំងមូល ត្រូវបានអ្នកជំនាញខាងជំងឺឆ្លងទទួលស្គាល់ថា មានប្រសិទ្ធភាព ក្នុងការការពារកុំឲ្យវីរុសកូវីដ-១៩ ឆ្លងរីករាលដាលខ្លាំង។ ក៏ប៉ុន្តែ ទន្ទឹមគ្នានេះ គេក៏ទទួលស្គាល់ដែរថា វិធានការណ៍នេះ ប៉ះពាល់ខ្លាំងណាស់ដល់ប្រជាពលរដ្ឋដែលមានជីវភាពក្រីក្រ រកមួយថ្ងៃ រស់មួយថ្ងៃ ហើយបញ្ហានេះ ទំនងជាកត្តាមួយដែលជំរុញឲ្យមេដឹកនាំឥណ្ឌូណេស៊ី បដិសេដមិនព្រមបិទទីក្រុងធំៗដែរ។
នៅពេលប្រកាសពីភាពអាសន្ន ក្រៅតែពីបានអំពាវនាវឲ្យមានការរក្សាគំលាតសង្គម លោកប្រធានាធិបតីជូកូ វីដូដូ ក៏បានប្រកាសបញ្ចេញថវិកាជំនួយសង្គម និងប្រាក់ឧបត្ថម្ភចំនួន ១,៥ ពាន់លានដុល្លារផងដែរ ដល់អ្នកដែលមានប្រាក់ចំណូលទាប។
គួរជម្រាបជូនថា នៅឥណ្ឌូណេស៊ី មានមនុស្សរាប់សិបលាននាក់ ធ្វើការដោយទទួលបានប្រាក់កម្រៃទាប។ លោកប្រធានាធិបតីជូកូ វីដូដូ បាននិយាយថា ដើម្បីដោះស្រាយវិបត្តិបង្កឡើងដោយមេរោគកូរ៉ូណាថ្មី ឥណ្ឌូណេស៊ី បានជ្រើសរើសវិធីសាស្ត្ររក្សាគំលាតសង្គមក្នុងលក្ខណៈទ្រង់ទ្រាយធំ។
“យើងត្រូវតែរៀនពីបទពិសោធន៍របស់ប្រទេសដទៃទៀត ក៏ប៉ុន្តែ យើងមិនអាចចម្លងបទពិសោធន៍របស់គេទាំងដុល យកមកអនុវត្តនៅក្នុងប្រទេសឥណ្ឌូណេស៊ីយើងនោះទេ ពីព្រោះថាប្រទេសនីមួយៗមានស្ថានភាពខុសៗគ្នា”។ លោកប្រធានាធិបតីជូកូ វីដូដូ បញ្ជាក់បន្ថែម។
សូមរំឭកជូនថា គិតត្រឹមថ្ងៃអង្គារ ទី៣១ មីនា ឥណ្ឌូណេស៊ីមានករណីឆ្លងវីរុសកូវីដ១៩ ចំនួន ១ ៥២៨ ករណី ហើយមានអ្នកស្លាប់ ១៣៦ នាក់។ នេះបើតាមតួលេខរបស់អាជ្ញាធរឥណ្ឌូណេស៊ី។ ក៏ប៉ុន្តែ គេគិតថា តួលេខដែលចេញដោយអាជ្ញាធរឥណ្ឌូណេស៊ីនេះ មានចំនួនទាបជាងតួលេខពិតប្រាកដឆ្ងាយណាស់៕ RFI
