ខ្មែរប៉ុស្ដិ៍ Close

គ្រោះថ្នាក់៦ចំណុច ពេលក្មេងតូចៗលេងទូរស័ព្ទ

ដោយ៖ សន ប្រាថ្នា ​​ | ថ្ងៃចន្ទ ទី៣០ ខែមេសា ឆ្នាំ២០១៨ ព័ត៌មានទូទៅ 3395
គ្រោះថ្នាក់៦ចំណុច ពេលក្មេងតូចៗលេងទូរស័ព្ទគ្រោះថ្នាក់៦ចំណុច ពេលក្មេងតូចៗលេងទូរស័ព្ទ

បច្ចេកវិជ្ជា​ កាន់តែ​ទំនើប​ និង​ការ​មមាញឹក​ការងារ​ពេក ជា​ហេតុផល​១ ធ្វើឲ្យ​ឪពុក​ម្ដាយ​ភាគច្រើន មិនសូវ​មាន​ចំណាយ​ពេល​ជាមួយ​កូន​តូច។ ជំនួស​ឲ្យ ភាព​រវល់​វក់វី​ទាំងនេះ ឪពុក​ម្ដាយ​សម័យ​នេះ បាន​ជ្រើសរើស​ ការហុច​ទូរស័ព្ទ​ទំនើប ឬ គ្រឿង​អេឡិចត្រូនិក​នានា​ ដើម្បី​ឲ្យ​កូន​លេង បាត់​យំ និង​មិន​មក​រំខាន​ជាដើម។

តាមរយៈ​កិច្ចសម្ភាស​ជាមួយ Sabay លោក ហឿ សេថុល អ្នក​ចិត្ត​សាស្ត្រ ជំនាញ​ខាង​ពិគ្រោះ​យោបល់​ផ្លូវចិត្ត​ បាន​បញ្ចប់​ការសិក្សា​ថ្នាក់​បរិញ្ញាបត្រ​ នៅ​សាកល​វិទ្យាល័យ​ភូមិន្ទ​ភ្នំពេញ​ និង​បរិញ្ញាបត្រ​ជាន់ខ្ពស់​ ពី​ប្រទេស​ហ្វីលីពីន​ បាន​មាន​ប្រសាសន៍​ថា កុមារអាយុក្រោម ២ឆ្នាំ​ មិនគួរ​បណ្ដោយ​ឲ្យ​លេង​ទូរស័ព្ទ​ ឬ គ្រឿង​អេឡិចត្រូនិក​ហួស​ហេតុ​ និង​គ្មាន​កំណត់​ជា​ប្រចាំ​ថ្ងៃ​នោះទេ។


(លោក ហឿ សេថុល អ្នក​ចិត្ត​សាស្ត្រ ជំនាញ​ខាង​ពិគ្រោះ​យោបល់​ផ្លូវចិត្ត​)

៦ចំណុចនេះហើយ ជា​គ្រោះថ្នាក់​ដែល​អាច​ប៉ះពាល់​ដល់​អនាគត​កុមារ ដែល​យើង​នឹកស្មាន​មិនដល់៖

១. ចាប់​ផ្ដើម​ផ្ដាច់​ខ្លួន​ពីសង្គម

កុមារ​ដែល​តែងតែជក់​នឹង​ការ​លេង​ទូរស័ព្ទ​ គឺ​មាន​បញ្ហា​ពេល​ចូលរួម​ក្នុង​សកម្មភាព​នានានៅ​សាលា នៅផ្ទះ ឬ​មិន​សូវ​ចូលចិត្ត​លេង​ជាមួយ​ក្រុម​កុមារ​ដទៃ។ ដោយ​ហេតុ​ផល​នេះ​ កុមារ​ទាំងនោះ​ពិបាក​ចុះចូល ឬ​អាច​ហៅថា​ ចូល​ចំណោម​គេ​មិន​ចុះ។ គេ​សង្កេត​ឃើញ​ថា៖ ពួក​គេ​ចូលចិត្ត​លាក់ខ្លួន​នៅ​ម្នាក់ឯង និង​មិនសូវ​ហ៊ាន​និយាយ​ស្ដី។

២. ទំនាក់​ទំនង​មាន​បញ្ហា

ដោយសារ​មិនសូវ​ហ៊ាន​ចូលរួម​សកម្មភាព​ជាមួយ​គេ កុមារ​អាច​ក្លាយទៅជា​មនុស្ស​បាក់ស្បាត​ ងាយ​ចាញ់​ច្រាប​គេ​ លែង​សូវ​ក្លាហាន ដែល​ខ្មែរ​យើង​ច្រើន​ហៅថា រុយ​ទុំ​មិន​បក់ អសកម្មភាព​ គ្មាន​ទំនុក​ចិត្ត​ខ្លួន​ឯង។

៣. ងាយ​រងគ្រោះ​ពី​ជំងឺ​បាក់ទឹកចិត្ត

ជាចំណុចសំខាន់១ ដែល​អាច​ឲ្យ​កុមារ​ងាយ​ធ្លាក់​ចូល​ក្នុង​ក្រុម នៃជំងឺកាចសហាវលាក់មុខ១នេះ។ កុមារ​មាន​ភាព​បត់បែន​ខ្សោយ ដោយ​មិន​អាច​បែងចែក រឿង​ហេតុ​នានា​បាន​ល្អ​ទេ។ ជួនកាល​គេនិយាយញោះ​លេង​សោះ តែ​កុមារ​ទៅជា​គិត​តូច​ចិត្ត តូច​ថ្លើម ស្រមើស្រមៃ​ខុស​រឿង​ ងាយ​យំ ឆេវឆាវ ខឹង​គេង ដាច់​ក្បាល​ដាច់​កន្ទុយ​ ជាដើម។

៤. មិន​អាច​ភ្ជាប់​ខ្លួន​ជាមួយ​មនុស្ស​ពិត

មានន័យថា កុមារ​ចាប់​ផ្ដើម​ប្រើប្រាស់​តែ​ភាសា​ដែល​មាន​នៅ​ក្នុង​រឿង​តុក្កតា​ល្បី​ដែល​ពួកគេ​បាន​មើល​ដដែលៗ។ កុមារ​អាច​មិន​ចូលចិត្ត​និយាយ​លេងសើច​ ដោយ​ប្រើ​ភាសា​ធម្មតា​ជាមួយ​ក្រុម​គ្រួសារ ឬ​មនុស្ស​នៅ​ជុំវិញ​ទេ។

៥. អាកប្បកិរិយា​ខុស​ប្រក្រតី

​ពេលខ្លះ​អាណាព្យាបាល​ ប្រហែល​ជា​ឆ្ងល់​ថា ហេតុអ្វី​កូន​ខ្លួន​ពិបាក​គ្រប់គ្រង? រឹងឌឺ​ដង​ម្ល៉េះ? ជា​ការ​ពិត​ ក្មេង​តូច​ប្រៀប​ដូច​ក្រដាស សអីចឹង។ កុមារ​ឃើញ​អ្វី​ៗ នឹង​ថត​ទុក​ភ្លាម ដោយ​កែវភ្នែក​ ដ៏បរិសុទ្ធ​របស់​គេ​ និង​បង្ហាញ​ចេញ​មកវិញ​ដោយ​កាយវិការ​ទាំងដុល​ គ្មាន​ការ​បែងចែក។ ឧទាហរណ៍៖ បើ​គេ​មើល​ចំ​រឿង​វីដេអូ​មិនល្អ ហិង្សា វៃ​ ទាត់ ធាក់ ប្រាកដ​ណាស់ គេ​នឹង​យក​មក​ប្រើ​ភ្លាមៗ ដោយ​មិន​ដឹង​ថា​វា​ទង្វើ​ល្អ ឬ​មិនល្អ​នោះ​ទេ។


(រូបតំណាង)

៦. កា​រីក​លូតលាស់​ខួរក្បាល​មាន​បញ្ហា

កុមារ​ខ្លះ​ ផ្ដោត​មើល​ទូរស័ព្ទ​យូរ​ពេក​ រហូតដល់ ៣ ឬ៤ម៉ោង សឹងតែ ភ្លេចបាយ ភ្លេចទឹក ដេក​ពួន។ បើ​ចំ​ឪពុកម្ដាយ​ខ្លះ រវល់​ដក​ដៃ​ ដក​ជើង​មិន​រួច ឬ មិនបាន​រំលឹក​កូន​ទៀត​ គឺ​ចប់។ កុមារ​តូច​អាយុ​ក្រោម​ពី២ឆ្នាំទៅ ជា​វ័យ​ត្រូវ​ការ​អាហារ​បំប៉ន​ច្រើន​មុខ​ ដើម្បី​ទៅ​ចិញ្ចឹម​រាងកាយ​ និង​ខួរក្បាល។ កាលបើ​ញ៉ាំ​អាហារ​មិន​គ្រប់​ជីវជាតិ​ នោះ​គឺ​អាច​នាំ​អំពល់​ដល់​បញ្ហា​សុខភាព​កុមារ​ខ្លាំង​បំផុត៕

 

ប្រភព៖ Sabay