ធនាគារជាតិនៃកម្ពុជា និង KOICA ប្រកាសដាក់ឱ្យដំណើរការជាផ្លូវការប្រព័ន្ធរីធែលផេ ដើម្បីផ្ដល់ការទូទាត់ប្រកបដោយសុវត្ថិភាព និងឆាប់រហ័ស
ធនាគារជាតិនៃកម្ពុជា និង KOICA ប្រកាសដាក់ឱ្យដំណើរការជាផ្លូវការប្រព័ន្ធរីធែលផេ ដើម្បីផ្ដល់ការទូទាត់ប្រកបដោយសុវត្ថិភាព និងឆាប់រហ័ស
ធនាគារជាតិនៃកម្ពុជា និងទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានប្រកាស “ការដាក់ឱ្យដំណើរការជាផ្លូវការ ប្រព័ន្ធរីធែលផេ” ដើម្បីចូលរួមចំណែកអភិវឌ្ឍន៍សេដ្ឋកិច្ច តាមរយៈការផ្តល់នូវការទូទាត់ប្រកបដោយសុវត្ថិភាព ប្រសិទ្ធភាព និងជាឧបករណ៍ទូទាត់រហ័ស សម្រាប់ការទូទាត់ពាណិជ្ជកម្ម។ ការប្រកាសដាក់ឱ្យដំណើរការនេះ ធ្វើឡើងដោយមានការអញ្ជើញចូលរួមពីលោកស្រី នាវ ច័ន្ទថាណា ទេសាភិបាលរង ធនាគារជាតិនៃកម្ពុជា លោក ផាក ហ៊ឹងខ្យង់ (Park Heung-kyeong) ឯកអគ្គរដ្ឋទូតនៃសាធារណរដ្ឋកូរ៉េ ប្រចាំនៅកម្ពុជា និងលោក នោ ហ្យន់ជូន (Rho HyunJun) ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំនៅកម្ពុជា តំណាងមកពីសមាគមធនាគារនៅកម្ពុជា តំណាងមកពីសមាគមមីក្រូហិរញ្ញវត្ថុកម្ពុជា និងធនាគារ និងមីក្រូហិរញ្ញវត្ថុ នាព្រឹកថ្ងៃទី២៦ ខែមករា ឆ្នាំ២០២១។ នេះបើយោងតាមសេចក្ដីប្រកាសព័ត៌មានរបស់ KOICA។
ក្នុងសេចក្ដីប្រកាសបានគូសបញ្ជាក់ថា សាធារណរដ្ឋកូរ៉េ និងព្រះរាជាណាចក្រកម្ពុជា បានព្រមព្រៀងធ្វើការរួមគ្នាលើគម្រោងការពង្រឹងប្រព័ន្ធទូទាត់ជាតិក្នុងប្រទេសកម្ពុជា ពីឆ្នាំ២០១៥ ដល់ឆ្នាំ២០២០ ដោយផ្តល់ជំនួយឥតសំណងចំនួន ៨ ០០០ ០០០ លានដុល្លារ (ប្រាំបីលានដុល្លារអាម៉េរិក) តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (KOICA) សម្រាប់ការធ្វើផែនការ ការកំណត់អត្តសញ្ញាណ ការបញ្ជាក់ ការរចនា ការអនុវត្ត ការសាកល្បង និងការបង្កើតប្រព័ន្ធទូទាត់ចំនួន៣ រួមមាន ប្រព័ន្ធផ្ទេរមូលនិធិភ្លាមៗ(real-time fund transfer “RFT”) ប្រព័ន្ធទូទាត់ចល័ត(mobile payment system “MPS”) និងប្រព័ន្ធទូទាត់តាមរយៈQRកូដ (QR-code payment system “QPS”) ។ ទន្ទឹមនេះ វាក៏រួមបញ្ចូល ប្រព័ន្ធផាត់ទាត់អេឡិចត្រូនិក (electronic clearing system “ECS”) ផងដែរ។
ជាមួយគ្នានេះ ប្រព័ន្ធទូទាត់ថ្មី ឬ “ប្រព័ន្ធរីធែលផេ” ត្រូវបានបង្កើតឡើង ក្រោមការផ្តល់ជំនួយឥតសំណងពី KOICA គឺជាហេដ្ឋារចនាសម្ព័ន្ធហិរញ្ញវត្ថុដ៏សំខាន់ ដែលដើរតួយ៉ាងសំខាន់ ក្នុងការចូលរួមចំណែកអភិវឌ្ឍន៍សេដ្ឋកិច្ច តាមរយៈការផ្តល់នូវការទូទាត់ប្រកបដោយសុវត្ថិភាព ប្រសិទ្ធភាព និងជាឧបករណ៍ទូទាត់ដោយរហ័ស សម្រាប់ការទូទាត់ពាណិជ្ជកម្ម។ លើសពីនេះទៀត ធនាគារជាតិនៃកម្ពុជា បាននិងកំពុងធ្វើការលើការអភិវឌ្ឍ ប្រព័ន្ធរីធែលផេ ដែលជាអាទិភាពមួយដើម្បីកាត់បន្ថយការប្រើប្រាស់សាច់ប្រាក់ និងជំរុញការប្រើប្រាស់ការទូទាត់តាមអេឡិចត្រូនិកក្នុងសេដ្ឋកិច្ច ក៏ដូចជាជំរុញការដាក់បញ្ចូលហិរញ្ញវត្ថុ ស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុរបស់រាជរដ្ឋាភិបាលកម្ពុជា។
បើតាម KOICA បានបន្ថែមថា តាមរយៈ“ប្រព័ន្ធរីធែលផេ”នៅពេលអ្នកផ្ញើប្រាក់ផ្ញើប្រាក់(រៀល ឬដុល្លារ)ដែលទៅធនាគារដោយផ្ទាល់ឬប្រើប្រាស់សេវាធនាគារចល័តលុយត្រូវបានដាក់ទៅក្នុងគណនីធនាគារ របស់អ្នកទទួលក្នុងរយៈពេលតែពីរបីវិនាទីប៉ុណ្ណោះ។ សេវាកម្មនេះបានអនុញ្ញាតឱ្យយើង បង់ថ្លៃឈ្នួល ថ្លៃថែទាំ និងវិក័យប័ត្រប្រើប្រាស់ ដែលកាត់បន្ថយហានិភ័យ នៃការបាត់បង់សាច់ប្រាក់ ឬចោរលួច៕
