សម្ដេចតេជោ ហ៊ុន សែន ផ្ដល់ជំនួយថវិកាបន្ថែម ៥០០លានរៀលទៀតដល់ខេត្តបន្ទាយមានជ័យ និងឧត្តរមានជ័យ ដើម្បីរៀបចំធ្វើចត្តាឡីស័កសម្រាប់ពលករ
សម្ដេចតេជោ ហ៊ុន សែន ផ្ដល់ជំនួយថវិកាបន្ថែម ៥០០លានរៀលទៀតដល់ខេត្តបន្ទាយមានជ័យ និងឧត្តរមានជ័យ ដើម្បីរៀបចំធ្វើចត្តាឡីស័កសម្រាប់ពលករ
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២២ ខែមករា ឆ្នាំ២០២១នេះ បានសម្រេចផ្ដល់ថវិកាបន្ថែមចំនួន ៥០០លានរៀលថែមទៀត ដល់ខេត្តបន្ទាយមានជ័យ និងឧត្តរមានជ័យ ដើម្បីរៀបចំទប់ស្កាត់ជំងឺកូវីដ-១៩ និងធ្វើចត្តាឡីស័ក សម្រាប់ពលករខ្មែរដែលត្រឡប់មកពីប្រទេសថៃ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានបញ្ជាក់ឲ្យដឹងថា ក្នុងចំណោមជំនួយថវិកា៥០០លានរៀលរបស់សម្តេចតេជោថ្មីនេះ គឺខេត្តបន្ទាយមានជ័យទទួលបាន ៣០០លានរៀល និងខេត្តឧត្តរមានជ័យ ទទួលបាន ២០០លានរៀល បូករួមទឹកសុទ្ធ ៣០០០កេសថែមទៀត។
លោកស្រីបានបញ្ជាក់ទៀតថា ថវិកាទាំងនេះរួមទាំងសម្ភារៈ ត្រូវបានក្រសួងសុខាភិបាល រៀបចំចាត់ចែងប្រគល់ដល់ជូន អភិបាលនៃគណៈអភិបាលខេត្តទាំងពីរផងដែរ។
ចាប់តាំងពីប្រទេសថៃ មានការផ្ទុះជំងឺកូវីដ-១៩ នៅក្នុងសហគមន៍យ៉ាងខ្លាំងក្លា ក្នុងខេត្តសមុទ្រសាខន ដែលជាប់ព្រំដែនជាមួយគ្នា កម្ពុជាបានរកឃើញមានពលករជាបន្តបន្ទាប់មានផ្ទុកជំងឺកូវីដ-១៩ ក្រោយពេលត្រឡប់មកពីប្រទេសថៃ។
ឆ្លើយតបនឹងស្ថានភាពនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដល់ជំនួយថវិកាជាបន្តបន្ទាប់ដល់ខេត្តជាប់ព្រំដែនថៃទាំង ៧ ដើម្បីរៀបចំធ្វើចត្តាឡីស័កដល់ពលករដែលត្រឡប់មកពីប្រទេសថៃ។
បើតាមក្រសួងសុខាភិបាល, រហូតដល់ពេលនេះ មានពលករខ្មែរមិនតិចជាង១,២ម៉ឺននាក់ បានត្រឡប់ពីប្រទេសថៃ ហើយត្រូវបានដាក់ឱ្យធ្វើចត្តាឡីស័ក នៅខេត្តជាប់ព្រំដែន ក្នុងប្រទេសកម្ពុជា៕
