រាជធានីភ្នំពេញ បន្តជួសជុលនិងអ៊ុតកៅស៊ូផ្លូវចំនួន១៦ខ្សែក្នុងខណ្ឌដូនពេញ
រាជធានីភ្នំពេញ បន្តជួសជុលនិងអ៊ុតកៅស៊ូផ្លូវចំនួន១៦ខ្សែក្នុងខណ្ឌដូនពេញរាជធានីភ្នំពេញ៖ អាជ្ញាធររាជធានីភ្នំពេញ បាននិងកំពុងបន្តការងារជួសជុល និងអ៊ុតកៅស៊ូផ្លូវចំនួន១៦ខ្សែ នៅក្នុងមូលដ្ឋានខណ្ឌដូនពេញ ដែលរងការខូចខាតដោយជំនន់ទឹកភ្លៀងកន្លងមក ដើម្បីសម្រួលការធ្វើដំណើររបស់ប្រជាពលរដ្ឋ និងលើកសោភ័ណភាពរាជធានីភ្នំពេញផង ។
កាលពីល្ងាចថ្ងៃទី២៩ធ្នូនេះ លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ និងលោកសុខ ពេញវុធ អភិបាលខណ្ឌដូនពេញ បានចុះពិនិត្យដំណើរការនៃការជួសជុលកែលំអ នៅផ្លូវលេខ៥១ ចាប់ពីផ្លូវលេខ១១៤ ដល់មហាវិថីព្រះសីហនុ នៅក្នុងមូលដ្ឋានខណ្ឌដូនពេញ នៅពេលដែលក្រុមការងារកំពុងតែអ៊ុតកៅស៊ូACលើបណ្តោយផ្លូវនេះ ។
លោកសុខ ពេញវុធ បានលើកឡើងថា សកម្មភាពជួលជុលផ្លូវលេខ៥១ គឺចាប់ពីផ្លូវលេខ១១៤ ដល់មហាវិថីព្រះសីហនុ នេះជាផ្លូវមួយ ក្នុងចំណោមផ្លូវង១៦ខ្សែ ក្នុងខណ្ឌ ដែលឯកឧត្តម ឃួង ស្រេង អភិបាលនៃគណៈអភិបាល រាជធានីភ្នំពេញ បានសម្រេចធ្វើការជួសជុល កែលំអឡើងវិញជាបន្ទាន់ ក្រោយទទួលរងការខូចខាតដោយជំនន់ទឹកភ្លៀង ដើម្បីសម្រួលការធ្វើដំណើររបស់ប្រជាពលរដ្ឋ ។
ក្នុងនាមប្រជាពលរដ្ឋក្នុងខណ្ឌដូនពេញ លោក សុខ ពេញវុធ បានថ្លែងអំណរគុណយ៉ាងជ្រាលជ្រៅដល់ឯកឧត្តម ឃួង ស្រេង អភិបាលរាជធានី ភ្នំពេញ ដែលបានអនុវត្តតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ណែនាំឱ្យមានការជួសជុល និងស្តារឡើងវិញ រាល់ហេដ្ឋារចនាសម្ពន្ធ័ ដែលខូចខាតក្រោយជំនន់ទឹកភ្លៀង តាមបណ្តាខណ្ឌមួយចំនួននៅក្នុងរាជធានីភ្នំពេញ ហើយលោកក៏បានសំណូមពរដល់បងប្អូនប្រជាពលរដ្ឋដែលរស់នៅអមសងខាងផ្លូវដែលកំពុងជួសជុលនេះ សូមចូលរួមសហការ ដើម្បីឱ្យការដ្ឋានប្រព្រឹត្តទៅដោយរលូន និងបានរួចរាល់តាមការគ្រោងទុក។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានណែនាំឱ្យក្រុមការងារជួសជុល និងអ៊ុតកៅស៊ូផ្លូវ ត្រូវយកចិត្តទុកដាក់ឱ្យបានត្រឹមត្រូវ និងមានគុណភាពយូរអង្វែង ព្រមទាំងសុំការយោគយល់ អធ្យាស្រ័យពីប្រជាពលរដ្ឋ ចំពោះការបិទផ្លូវក្នុងរយៈពេលខ្លី និងការរំខាននៃការដ្ឋាននោះ ៕
